1 Nò, nigbogayan a to sosokoroy no ogkoiling to tukod. No nignangonan a to, “Hondio kad on to dakol no Ampuanan to Magboboot woy sokora nud on. Woy songo sokora nud ka tubaranan, woy soola nud ka tibo no mgo otow no ogmanimba dio. 2 Di kono nu sokora ka lama to sikan no Dakol no Ampuanan to Magboboot, su igkabogoy pad to mgo otow no waro mogtokod to Magboboot. No taman to kohop-atan woy daruwa no bulan, ogpandaatdaaton dan ka dakol no lunsud to Hirusalim no ian ka lunsud no pig-indanan to Magboboot. 3 Woy igpohondio ku ka daruwa no otow no talagmalogot to kinagian ku. No igpanangon ku ka kinagian ku taman to 1,260[a] no allow. Ogkikinabo sikandan to saku no nighimu no kinabo.[b]

4 Ka sikan no daruwa no talagmalogot, ian ka ingkapanag-ilingan dongan to sikan no daruwa no kayu no oghingaranan to ulibu. Woy songo ingkapanag-ilingan dod sikandan to daruwa no ilawan no duon to tangkaan to Lagboy no Igbuyag to tibo no mgo otow kai to kalibutan.[c] 5 Ko duon agad hontow no oghisakit poron kandan, duon hapuy no oglibuwas to bo-bo dan no ogkatutung ka mgo usig dan no ogkoubus sikandan no ogkamatoy. 6 Woy tagood to ognangonnangon sikandan to kinagian to Magboboot, ogbogayan sikandan to kabogbogan oyow ogkohimu no ogpakaatang sikandan to mgo kibol oyow kono ogpokouran. Woy ogbogayan sikandan to kabogbogan to ogbaluy on no langosa ka woig. Woy songo ogbogayan to kabogbogan to oyow, agad kon-u ran ogkoiniati to ogboboot, ogkoumaan on ka tano to agad nokoy no igkabaybayari to mgo otow. 7 Pogkaponga ran to igmalogot to kinagian to Magboboot, oglibuwas on ka makahallokhallok no magintalunan no ogligkat to sikan no bitu no kono ogkatogkad ka karalomi rin. No ogsulungon din ka sikan no daruwa no talagmalogot to kinagian to Magboboot. No ogkaroog din woy oghimatayan din on. 8 Ka lawa to sikan no daruwa no nammatoy, nakatuus do duon to kalasara to sikan no dakol no lunsud. No dongan, dio ilansang ka Lagboy no Igbuyag ta to krus. Woy ian dod ka lunsud no songo ogpanag-iling to Suduma woy ko Ehipto.[d] 9 Nò, taman to tatolu no allow woy tonga, ka mgo otow no ogligkat to agad hondoi no ogkaloinloin no mgo ugpaan, woy to mgo kapunganan woy ka mgo kinagian, ogtotongtongan dan ka mgo lawa to sikan no daruwa no nammatoy, woy kono dan igbogoy ko iglobong on ka mgo lawa ran. 10 Lagboy no igkarago to mgo otow ka kamatayon to sikan no daruwa. No oghimu sikandan to ogkaragaan woy ogmabogbogayoy to mgo igkarago no mgo kalaglagan su namatoy ka sikan no daruwa no nakabayadbayad to sikan no mgo otow no og-ugpo kai to soini no tano.

11 Di pogligad to sikan no tatolu woy tonga no allow, og-uyagon do sikandan to Magboboot woy ogpakasasindog on. Ka tibo no mgo otow no ogpakakita, ogkakahallok lagboy. 12 No inogo on no ogdinogon to sikan no daruwa ka maagbot no kagi no ogligkat to langit no ognangon kandan to, “Hondini kow on.” No ogkabatun on sikandan dio to langit. No ogpakatotongtong ka mgo usig dan taman to ogkabukusan on sikandan to mgo salagapun. 13 No kono do ogbuloy no ogdagsang on ka maagbot lagboy no dinug woy ogkagulak on ka igkasampulu no baad to sikan no dakol no lunsud. Ogkammatoy ka papitu no malan no mgo otow. No ka mgo otow no waro nammatoy, ogkakahallok on lagboy. No ogkasayo dan ka Magboboot no ian mabogbog lagboy no dio to langit. 14 Napongaan ka igkararuwa no dakol no igkabaybayari to mgo otow, Di magaan on ogdatong ka igkatatolu no dakol no igkabaybayari.

15 Nò, ka igkapapitu no diwata to Magboboot, nighiup to bungag din. Inogo on no duon maagbot no mgo lagong ligkat dio to langit no nigkagi to, “Ligkat kuntoon taman to waro katamanan, waro loin no ogpakaalap to pandatuan to soini no kalibutan ko kono no ka Lagboy no Igbuyag woy ka Im-imanan to mgo Koot-otawan no pigsugu din no si Kristu.”[e] 16 Ka kawaan woy hop-at no pogbuyagon no ogpinpinnuu dio to mgo pinnuuanan dan to pogboboot duon to tangkaan to Magboboot, nanluhud to ogsimboon dan ka Magboboot. No nigkagi sikandan to,