Lukas 3

Ka Pogwali ni Huan no Talagbautismu

(Matiu 3:1-12; Markos 1:1-8; Huan 1:19-28)

1 Nokouma on ka igkasampulu woy lalimma to tuid to pogsugu to Punuan dio to lunsud to Ruma no si Tibirius Sisar. Nokogdongan si Punsiu Pilatu no ian gobirnador dio to Probinsia to Hudia. Si Hirodis ka Datu dio to Galilia. Ka hari ni Hirodis no si Pilipi, kandin ka igbuyag to mgo ugpaan dio to Ituria woy ka Trakoniti, no si Lisanias, sikandin ka igbuyag dio to ugpaan to Abilina. 2 Dio to Hirusalim, si Annas darua ki Kaipas ka mgo Labow to mgo talagpanubad to mgo Hudiu.

Sikan pad ka mgo igbuyag dio to mgo ugpaan to si Huan no anak ni Sakarias, dio mog-ugpo to holholawan to probinsia Hudia no nokouma kandin no kagi to Magboboot. 3 Nò, nighipanow si Huan no niglougloug dio to agad hondoi no ugpaan dio to marani to woig to Hordan no nignangonnangon to mgo otow to oyow ogbautismuan din on sikandan dio to woig to Hordan tongod to nigsonditan dan ka salo dan woy og-ongkoran dan on ka maroot no mgo batasan dan oyow ogpasayluon to Magboboot ka mgo salo dan. 4 Nò, natuman to kagi no ingkasulat dongan ni Isaias to kagi to Magboboot to:

“Duon otow no ogbabansagon dio to holholawan. Ogkagi to, ‘Lantasi now woy gawhani now ka ogbayaan to Lagboy no Igbuyag ta oyow ogmatul-id.[a]

5 Pananglitan, og-awoson to oghiponuon now ka tano no niglusob-ong no ogtoparon on ka mgo matikang no bubungan woy ka malopot no bubungan.

Ogkatul-id on ka mgo dalan no ogkaliku-liku no ogkatapid on ka mgo dalan no nanggaalgaal.

6 No ka tibo no mgo otow, ogkakitaan dan on ka ogpakapangabang to Magboboot to mgo salo ta.’ ” Sikan ka ingkasulat ni Isaias.[b]

7 Mohon-ing lagboy ka mgo otow no nanhondio ki Huan su ogkoiniatan dan ko ogbautismuan din on sikandan dio to woig. Kagi ni Huan kandan, “Sikaniu, ian now ogkounawaan ka mgo ulod no oghilu su maroot ka mgo batasan now. Hontow ka nigbohog kaniu to oyow ogpakasalsalia kow on to igkabolu to Magboboot kaniu to sika mgo salo now? 8 Ko kono now ogkoiniatan to ogkoumaan kow to iglogpad uromo, balbalawi now ka goinawa now woy himua now ka maroyow no batasan now no igpakita now to nabalbalawan on ka goinawa now. Ko kow ogsalig to goinawa now to nahan now no kono kow ogkalogparan su si Abraham ka minuna now. Ko og-awoson to Magboboot to duon apu ni Abraham ogkagian din do ka soin no mgo batu no ogpokohimu no mgo kapunganan ni Abraham,” kagi ni Huan. 9 Nò, nigbohog ni Huan ka mgo otow to, “Kuntoon, ogkounawa to kaid on ka wasoy to lobut to mgo kayu no igbantaan pad igpolod dio to mgo dalig din. Ko maroot ka mgo batasan now, ogkalogparan kow on unawa to tibo no mgo kayu no kono no maroyow ogpamogas ogpoloron woy igtomog to hapuy,” kagi ni Huan.

10 Kagi to mgo otow no mohon-ing to, “Huan, nokoy naan ka litos no oghimuon noy?” 11 Nigtabak si Huan kandan, “Ko darua ka kinabo now, ibogoy nu ka sagboka to waro kinabo, woy ko duon koonon now, talari now ka waro ogkoonon,” kagi ni Huan.

12 Duon mgo talagkubla to buhis no songo nanhondio ki Huan oyow ogpabautismuan poron ki Huan sikandan. Kagi ran ki Huan to, “Maistru, sikanami naan, nokoy ka litos no oghimuon noy?” 13 Kagi ni Huan, “Ka bayad to buhis no innangon to igbuyag now, kono now pasubloi.”

14 No duon ka mgo sundalu dio no songo nig-inso ki Huan to, “Sikanami naan, songo nokoy ka litos no oghimuon noy?” Kagi ni Huan kandan to, “Ko kow ogpanakow. Kono kow on oghinallok to mgo otow no igpogos now kandan to salapi dan oyow igbogoy ran kaniu. Agad kono now ogbayungi to kono no malogot. No ka dangob no ignangon ku kaniu no mgo sundalu, tukawi now ka salapi no igbayad to gobirnu kaniu.”

15 Pogdinog to mgo otow to kagi ni Huan, pigtimulan dan ka pog-iman-iman dan no nanumansuman sikandan ko si Huan buwa ka Im-imanan to mgo Koot-otawan. 16 Omunaan, nigtabak si Huan kandan tibo to, “Sikoddi, ogbautismuan ku sikaniu to woig di duon dod otow no ogpokouma no labow pad koddi ka katondanan din. Doisok do ka koddi no katondanan agad to oghokad to mgo sandal din. Ko sikandin, ogbautismuan kow rin to Gimukud to Magboboot woy hapuy.”[c] 17 “Ogkounawa ka Gimukud to Magboboot to otow no oggongon to lirong din oyow ig-otap din no ogkalunsod ka otapon woy ka lupogas no oglimuron din ka tirigu dio to pinayag din. Di ka usangon woy ka otapon, ogsilaban din on to hapuy no kono ogkaparongan,” kagi ni Huan.

18 Mohon-ing dod ka in-anad ni Huan to mgo otow tongod to soini no Maroyow no Nangnangonon din kandan no awoson no ogtumanon dan ka innangon din. 19 Dokad di, duon ingkabolu ni Gobirnador Hirodis ki Huan su nigsaparan ni Huan sikandin, su nig-asawa on ni Hirodis ka ipag din no si Hirodias. Duon dod duma no maroot no mgo hinimuan ni Hirodis no inlagkos ni Huan to pogsapad din. 20 No si Hirodis, natimulan din pad ka salo din su impapirisu rin on si Huan.

Ka Pogbautismu ki Hisus

(Matiu 3:13-17; Markos 1:9-11)

21 Di to waro pad mapirisu si Huan nigbautismuan din pad ka mgo otow dio to woig to Hordan woy songo nigbautismuan din si Hisus. Naponga soini, niglonghag si Hisus nig-ampu no napuasan on ka langit, 22 no ka Gimukud to Magboboot, nigpohulughulug no ogkounawa to salapati no dio ki Hisus niglatun, no duon narinog no kagi ligkat to langit no nigkagi ki Hisus to, “Sikoykow ka koddi no anak no indakoli to goinawa ku. Dakol ka igkarago ku koykow.”[d]

Ka mgo Kapunganan ni Hisus

(Matiu 1:1-17)

23 Si Hisus, katoluan buwa ka tuid din woy rin bunsuri ka pog-anad din to mgo otow. Nahan to mgo otow no si Husi ka amoy rin.

Ka amoy ni Husi, si Hili.

24 Ka amoy ni Hili si Matat.

Ka amoy ni Matat si Libi.

Ka amoy ni Libi si Milki.

Ka amoy ni Milki si Hanai.

Ka amoy ni Hanai dangob no Husi.

25 Ka amoy ni Husi, Si Matatias.

Ka amoy ni Matatias, si Amos.

Ka amoy ni Amos, si Nahum.

Ka amoy ni Nahum, si Isli.

Ka amoy ni Isli, si Nagai.

26 Ka amoy ni Nagai, si Maat.

Ka amoy ni Maat, dangob no Matatias.

Ka amoy ni Matatias, si Samein.

Ka amoy ni Samein, si Husi.

27 Ka amoy ni Husi, si Huda.

Ka amoy ni Huda, si Hoanan.

Ka amoy ni Hoanan, si Risa.

Ka amoy ni Risa, si Sirobabil.

Ka amoy ni Sirobabil, si Salatiel.

Ka amoy ni Salatiel, si Niri.

28 Ka amoy ni Niri, si Milki.

Ka amoy ni Milki, si Adi.

Ka amoy ni Adi, si Kosam.

Ka amoy ni Kosam, si Elmadam.

Ka amoy ni Elmadam, si Ir.

29 Ka amoy ni Ir, si Husui (ko si Hisus).

Ka amoy ni Husui, si Eliasir.

Ka amoy ni Eliasir, si Horim.

Ka amoy ni Horim, si Matat.

Ka amoy ni Matat, si Libi.

30 Ka amoy ni Libi, si Simion.

Ka amoy ni Simion, si Huda.

Ka amoy ni Huda, si Husi.

Ka amoy ni Husi, si Honam.

Ka amoy ni Honam, si Eliakim.

31 Ka amoy ni Eliakim, si Milia.

Ka amoy ni Milia, si Mina.

Ka amoy ni Mina, si Matata.

Ka amoy ni Matata, si Natan.

Ka amoy ni Natan, si Dabid.

32 Ka amoy ni Dabid, si Jesse.

Ka amoy ni Jesse, si Obid.

Ka amoy ni Obid, si Boas.

Ka amoy ni Boas, si Salmon.

Ka amoy ni Salmon, si Naasom.

33 Ka amoy ni Naasom, si Aminadab.

Ka amoy ni Aminadab, si Admin.

Ka amoy ni Admin, si Arni.

Ka amoy ni Arni, si Hisron.

Ka amoy ni Hisron, si Piris.

Ka amoy ni Piris, si Huda.

34 Ka amoy ni Huda, si Hakub.

Ka amoy ni Hakub, si Isaak.

Ka amoy ni Isaak, si Abraham.

Ka amoy ni Abraham, si Tira.

35 Ka amoy ni Tira, si Nahor.

Ka amoy ni Nahor, si Sirug.

Ka amoy ni Sirug, si Riu.

Ka amoy ni Riu, si Pilig.

Ka amoy ni Pilig, si Ibir.

Ka amoy ni Ibir, si Sila.

36 Ka amoy ni Sila, si Kainan.

Ka amoy ni Kainan, si Arpaksad.

Ka amoy ni Arpaksad, si Sim.

Ka amoy ni Sim, si Noi.

Ka amoy ni Noi, si Lamik.

37 Ka amoy ni Lamik, si Matusala.

Ka amoy ni Matusala, si Inok.

Ka amoy ni Inok, si Yarid.

Ka amoy ni Yarid, si Mahalalil.

Ka amoy ni Mahalalil, si Kainan.

38 Ka amoy ni Kainan, si Inos.

Ka amoy ni Inos, si Sit.

Ka amoy ni Sit, si Adan,

no ka amoy ni Adan, ka Magboboot.

<- Lukas 2 Lukas 4 ->