2 Ogsayoon ku sikaniu no mgo nigtuu no dio to Kurintu su og-ungoron a now ogdoromdomon woy su ogtuman kow to sikan no innangonnangon ku kaniu. 3 Di ogkoiniatan ku to ogpakasabut kow to, ka mgo lukos, ogpaagad-agad ki Kristu. Ka mgo boi, ogpaagad-agad to asawa rin no lukos, no si Kristu, ogpaagad-agad to Magboboot no Amoy rin. 4 Ko oglimudlimud ki to og-ampu, ko duon lukos no og-ampu woy ko ognangon to kagi no ogligkat to Gimukud to Magboboot, ko ogtorongan din ka ulu rin, ogpakasipod ki Hisus no ian Igbuyag din.[a] 5 Dokad di, ko duon boi no og-ampu woy ko ognangon to kagi no ogligkat to Magboboot di waro mogtorong to ulu rin, ogpakasipod to asawa rin su waro igpapitow to asawa rin no igsugu kandin. No ogkounawa rod ko natabulugan ka ulu rin.[b] 6 Ian su, ko duon boi no kono ogtorongan ka ulu rin, litos no ogtamporan ka bulbul din. Di su ogkasipod man ko ogkatamporan woy ko ogkatabulugan ka ulu rin, litos no ogtorongan din ka ulu rin ko oglimudlimud kow no og-ampu. 7 Ka lukos, kono din ogtorongan ka ulu rin ko og-ampu su sikandin ka nakaalap to katondanan woy ka karoyawon no nigligkat to Magboboot. Di ka boi, ogtotorong su ian igpatokod to asawa rin. 8 Ian su ka an-anayan no lukos, waro nigligkat to boi. Di ka an-anayan no boi, nigligkat atag to lukos. 9 No igkaruwa, ka tuud to pighimu to Magboboot to lukos, kono to oyow duon duma to boi, di nighimu rin ka boi oyow duon duma to lukos. 10 Sikan ian to og-awoson to ogpatorongon ka mgo boi to ulu ran su oyow agad ka mgo diwata to Magboboot, songo ogkitoon to ogkasugu ka boi to asawa rin. 11 Di agad naan, sikanta no nigtuu on to Lagboy no Igbuyag ta, ogmabulbuligoy ki ka mgo lukos, woy ka mgo boi. 12 Ian su an-anayan nigligkat ka boi to lukos, di kuntoon, diad to boi ogligkat ka mgo lukos. No ka tibo to agad nokoy duon, nigligkat to Magboboot.

13 Doromdoma now ko nokoy ka maroyow ko oglimudlimud kow, ko litos no batasan to mgo boi no waro igtorong to ulu ran ko og-ampuan dan ka Magboboot? 14 Kono su nataga ki tahan to igkasipod ian to mgo lukos ko ogkoiling to mgo boi to malayat ka bulbul dan. 15 Di songo nataga ka goinawa ta to sikan no malayat no bulbul to boi, ian ka igmaroyow to lawa ran su imbogoy to Magboboot to boi ka malayat no bulbul dan no igtorong to ulu ran. 16 Ko duon otow no og-apul, sikan do ian ka batasan noy woy sikan dod ka mgo batasan to duma no mgo nigtuu no oglimudlimud no og-ampu dio to duma no mgo lunsud.

17 Duon igtaloson ku kaniu. Di to soini, kono ad ogpakasayo kaniu su, ko oglimudlimud kow to og-ampu, ka ogkoumaan to poglimudlimud now, kono no maroyow. 18 Ian su, to an-anayan, nanangonan ad to ogloinloin kun ka goinawa now ko oglimudlimud kow to og-ampu. No ogpakapansob a ko tu-tuu buwa ian ka sikan. 19 Songo kuwo buwa ko og-awoson to duon ka sikan no mgo loin no goinawa now oyow ogtokoron ko hontow ka tu-tuu ian no nigtuu ki Hisus. 20 Ko oglimudlimud kow to oglabung oyow ogdoromdomon now ka kamatayon ni Hisus, kono now ogdoromdomon sikandin. 21 Ian su tag sagboka no otow, ogparagas do duon no ogkoon to kandin no iglabung di duon dod otow no oggutasan woy duon pad ka ogkalasing! 22 Bak waro baloy now su dii kow on oghinalantoy! Og-inso a kaniu ko goinawa now buwa ko oglomotan now ka mgo duma now no songo og-ampu to Magboboot? Woy og-inso a ko goinawa now rod ko ogpasiporan now ka mgo duma now no waro igkaalap dan no iglabung dan? Nokoy buwa ka ignangon ku kaniu, ko ogsayoon ku pad sikaniu to soini no batasan? Kono a man.

23 Ian su ian ku innangon kaniu ka sikan no in-anad kanak to Lagboy no Igbuyag ta no si Hisus to, ka sikan no marusilom no nigpanabod ni Hudas si Hisus, nigkokoon si Hisus woy ka mgo hibatoon din. No nigpurut din ka songo malison no paan. 24 Ko nigpasalamatan din on ka Magboboot, nanlotiblotib din on ka paan no kagi rin to, “Ka soini no paan no nalotiblotib on, lawa ku no igbogoy ku no igliwan kaniu. No himua now ka soini no ogdoromdomon a now.” 25 Pogkaponga to nigkoon sikandan, nigpurut din man do ka basu no duon woig to bogas to bunal. No kagi rin kuwo to mgo hibatoon din to, “Ka soini basu to woig to bunal, ian igmaganangon to ka langosa ku ka oghimu to iam no dalan dio to Magboboot. Libonglibongi now to og-inum, no ko og-inum kow, doromdomi a now ro to kamatayon ku.”[c] 26 Ian su to poghutuk ta to ogkoon to sikan no paan woy ka pog-inum ta to sikan no woig, igpohitaga ta ka kamatayon ni Hisus no ian Lagboy no Igbuyag ta taman to poglibong din kai to soini no kalibutan. 27 Nò, ko duon otow, agad hontow, no ogkoon to sikan no paan woy ko og-inum to sikan no woig no igparoromdom to Lagboy no Igbuyag ta di loin so tuud din, ogpakasalo on sikandin to lawa woy to mgo langosa ni Hisus no ian Lagboy no Igbuyag ta. 28 Sikan ian to og-awoson to ogsumsumanon ta ka goinawa ta. No ko maawang on, ogkohimu no ogkoon ki to sikan no paan woy og-inum ki to sikan no woig to bunal. 29 Ian su, ka sikan no otow no ogkoon to sikan no paan, woy og-inum to sikan no woig di kono din ogdoromdomon to ian ka igmaganangon to lawa ni Hisus no namatoy dio to krus, ogkabobootan on sikandin to iglogpad to Magboboot. 30 Sikan ian to mohon-ing kuntoon no mgo duma now no ogmalotoy, woy ka ogmandaralu, woy pila on ka nammatoy. 31 Di ko ogsumsumanon ta ka kanta no goinawa ko duon salo ta woy kid ogkoon, kono ki poron oglogparan to Magboboot. 32 Di ko ogbobootan ki to Lagboy no Igbuyag ta to duon salo ta, ogbogayan ki pad to igsapad to oyow uromo kono ki ogpakalagkos to logpad to mgo otow no waro nigtuu kai to soini no kalibutan.

33 Nò, sikan ian, mgo sulod, ko oglimudlimud kow no ogkoon to sikan no poglabung no igparoromdom to kamatayon ni Hisus, tatagad kow pad to mgo duma now. 34 No ko kono ka og-aguanta no ogtagad su oggutasan kad, dio ka pad ogkoon to baloy nu oyow kono ka ogkalogparan to Magboboot.

Duon dod inso now kanak. Di woy a ro ogtabak kaniu ogpakatood a no ogpanumbaloy.

<- 1 Kurintu 101 Kurintu 12 ->