LOMA 10

1 Neze zuhokizo, naza Zuda vemuꞌ nene luꞌneuꞌ amuzo molo gelaaꞌ nouvoniꞌ nene adoꞌ tiꞌ lo gelo Oꞌmosola aꞌminemuꞌ laaꞌ nouve: Oꞌmosoꞌmo do nguꞌ izeliho lo aꞌminemukovoꞌ laaꞌ nouve. 2 Nene nanitekumuꞌ ve. Engiꞌ monovo nene mo ninge lamineꞌ o nouve. Ingine nene gilingili igi Oꞌmosomuꞌ gilaaꞌ naniꞌza eze eꞌmetilizaniꞌ aka nene ninge nobe li ningi gili guni amave. 3 Idoꞌ neꞌmine noluvoniꞌ nene nemuꞌ noluve: Ingine Oꞌmosoꞌmo evenekumuꞌ eveneꞌ lisiheꞌ ve lo-ngedaaꞌ neineꞌ monovomuꞌ nene gili imami mini angiseꞌine di sotoꞌ aniꞌ monovoloꞌ di mili eveneꞌ lisiheꞌ ilisa igi mili minaaꞌ naniꞌza Oꞌmosoꞌmo eveneꞌ lisiheꞌ ve lo-ngedelineꞌ monovoloꞌ nene gelekeleꞌ amave. 4 Neꞌmine igaꞌ naniꞌza ezemuꞌ gili eleꞌvoleꞌ igi minave nene ve lisiheꞌ ve lo-ngedosa Kilisitoꞌ aza louꞌ gamaziloꞌ eꞌmetaatotiꞌ eveneꞌ lisiheꞌ loloꞌ ogaꞌ aka nene mo mudise hize tilineꞌ nenako nemuꞌ ingine nene mo ladani nave.

Guvelesi Vela Vise Liliza Aleve Mukiꞌ Nene Do nGuꞌ Izeleseive Lo Pauloꞌ Lineꞌ Gamazi

5 Naza mo laminetoꞌ noluve. Ingine ngelo amosoꞌ initeꞌ ilisa naniꞌ neineꞌ nene Moseꞌ aza louꞌ eꞌmetaatotiꞌ eveneꞌ lisiheꞌ loloꞌ ogakumuꞌ tiꞌ lo gizidotiꞌ nene ha gelelesune:

Ve ma ingine aꞌmine louꞌ gamazi vaitoꞌ eꞌmeti lamineꞌ ma ilizaniꞌ nene aꞌmine neꞌmine ilizadotiꞌ nene mine lamineꞌ igi ha miniviꞌ miniviꞌ igi minilisave.

6-7 Ne neiha Oꞌmosomuꞌ gele eleꞌvoleꞌ ogatotikovoꞌ nene eveneꞌ lisiheꞌ loloꞌ ogaꞌ neve nene lapa nomivo ha loloꞌ olonidoꞌ neineꞌ nene gamazi ma tiꞌ lo neidotiꞌ nene gelelesune:

Lingine aꞌmine nene mo amosoꞌ niteꞌ neive lisa lutinguꞌ tiꞌ li gilamilo: Okulumokuko zaho dizelive. Mo ma dizamilisave. Idoꞌ home galese golosouꞌ zaho lemelive. Mo ma limamilisave.

Neꞌmine lilizaniꞌ nene Kilisitoꞌni Okulumokukotiꞌ eleꞌmizi limilizangumukisi idoꞌ hilingutiꞌ di oti-di eleꞌmizi dizilizangumukisi lilizaniꞌ nenako idoꞌ Kilisitoꞌ aza mo Okulumokutiꞌ lemosa hilingutiꞌ nene mo otosa neineꞌ nenako nemuꞌ nene amosoꞌ initeꞌ ma nomineꞌ nenako neꞌmine li gililizadoꞌ ma nomive lo neineꞌ ma neive. 8 Ne neiha aꞌminemuꞌ nene gamazi ma tiꞌ lo neive:

Aꞌmine monoꞌ gamazi nene hota neꞌmine ma minamive.

Asi avitoꞌ mino

lingine ha vetinedunuꞌ lilizadoꞌ mino lutinguꞌ gililizadoꞌ neive.

Aꞌmine monoꞌ gamazi nene Oꞌmosomuꞌ gele eleꞌvoleꞌ ogaliꞌmi gamazi leliꞌ lo sotoꞌ o ngemaaꞌ nouneꞌ gamazi nene neive. 9 Adoꞌ lingine vetinedunuꞌ nene Izesuꞌ aza Guvetesi ve naba ve li li sotoꞌ igi idoꞌ lutinguꞌ nene Oꞌmosoꞌmo hilingutiꞌ do ote-dineꞌ ve li gili eleꞌvoleꞌ ilizaniꞌ nene Oꞌmosoꞌmo do lunguꞌ izeleseive. 10 Ee, lutedunuꞌ aꞌmine gamazi gele eleꞌvoleꞌ osoꞌ nene Oꞌmosoꞌmo eveneꞌ lisiheꞌ ve lo-ledelive. Idoꞌ vetedunuꞌ aꞌminemuꞌ lo soto sotoꞌ osoꞌ nene Oꞌmosoꞌmo do luꞌ izeleseive. 11 Idoꞌ mene noluvoniꞌ nene monoꞌ godolouꞌ tiꞌ li gizi nizadoꞌ nene vo miliseꞌ ogave:

Aꞌmine vemuꞌ gili eleꞌvoleꞌ ilizave mukiꞌ nene

aꞌmine gili eleꞌvoleꞌ ilizadotiꞌ nene gihileꞌve dami ngovozo hililizavoba

asi hilamilisave.

12 Idoꞌ ingine mukiꞌ ngovozo hilamilisave noluvoniꞌ nene Zuda vesi heta atoꞌ vesi nene ato atoliꞌmine minamavo engiꞌ sitatoꞌ gizebo ogaꞌ ive nene Guvelesi ve eiꞌ hamokovoꞌ mino hize eleꞌ o-ledelive li ezela laaꞌ nave ato atoꞌ mukiꞌ nene atoliꞌmine ogo nasahiliꞌ o-ngedaaꞌ neineꞌ nenako nemuꞌ nene noluve. 13 Ee, eveneꞌ mukiꞌ ingine Guvelesi veꞌmi gulive igi ezela lilizave ato atoꞌ mukiꞌ nene do nguꞌ izeleseive li monoꞌ godolouꞌ gizi nizaniꞌ ve.

14 Neꞌmino neineꞌza ingine Kilisitoꞌnimuꞌ gili eleꞌvoleꞌ amaniꞌ nenako nadiisa eiꞌ gulive igi ezela lilizave. Mo neꞌmine ma amilisave. Idoꞌ ezemuꞌ li-ngimavo ma gilamaniꞌ nenako haza nene nadiisa gili eleꞌvoleꞌ ilizave. Mo ngeli neꞌmine ma amilisave. 15 Idoꞌ Oꞌmosoꞌmo eze gamazi li sotoꞌ igi li-ngimilizave ma ngimiselamilineꞌ nene nadiisa vi li sotoꞌ igi li-ngimilizave. Mo neꞌmine ma amilisave. Gamazi lamineꞌ li-ngimilizave ngimiselingumuꞌ nene monoꞌ godolouꞌ tiꞌ li gizi nizave:

Gamazi lamineꞌ li sotoꞌ igi li-limilizave aniꞌ nene mo ede vineꞌ initeꞌ ikeve lo lolize izekune.

Gamazi lamineꞌ li sotoꞌ ilizave nene mo neꞌmino ngimiselavo igi li soto sotoꞌ aniꞌza 16 Isilaeleꞌ aleve mukiꞌ gidini nete aꞌmine gamazi laminetoꞌ nene gili damaniꞌ ve. Neꞌmine aniꞌ nene monoꞌ godolouꞌ polohete Isaiaꞌ gamazi ma tiꞌ lo lidoꞌ nene vo daniꞌ ve:

Guvekasi ve, laza lo-ngimuneꞌ gamaziloꞌ nene

mo ma gili eleꞌvoleꞌ amave.

17 Nemuꞌ nene laza tiꞌ lo gele none: Kilisitoꞌnimuꞌ gele eleꞌvoleꞌ oloneꞌ nene gamazi lamineꞌ gelosavoꞌ nene gele eleꞌvoleꞌ olosune. Idoꞌ gamazi lamineꞌ geleloneꞌ nene Kilisitoꞌ gamaziꞌve nelotikovoꞌ nene gamazi lamineꞌ gelelesune. 18 Neꞌmino neineꞌza naza tiꞌ lo noluve: Ingine nene aꞌmine gamazi mene gilamavoba asi mo gili nizave. Monoꞌ godolouꞌ tiꞌ li gizi nizaniꞌ maloꞌ vo dave:

Veꞌningutiꞌ gamazi neꞌmo nene mo misubouꞌ misubouꞌ vo osuꞌ lave.

Ee, gamaziꞌine nene eveneꞌ minaniꞌ misubo neꞌmo vo sididasi nene

buu lo vineꞌ ma neive.

19 Idoꞌ naza gohi tiꞌ lo noluve: Isilaeleꞌ aleve ingine gili vevesamilizadoꞌ minavoba asi gili vevesilizadoꞌ minaniꞌ ve. Aꞌmine nemuꞌ nene ganaꞌ Moseꞌ Oꞌmosoꞌmo lineꞌ gamazi tiꞌ lo gizineꞌ ve:

Eveneꞌ ma neniꞌ zuho nizave li gilamave haza ve engikutiꞌ nene

ma do nenita okuvo

lingine Isilaeleꞌ aleve aꞌminemuꞌ nene lavodine nalisave.

Ee, gaꞌine gili vevesamave nene ma do nenita okuvo

nemuꞌ nene mo lingizeboloꞌ molaloseive.

20 Idoꞌ Isaiaꞌ aza Oꞌmosoꞌmo lineꞌ gamazi gohi ma lovoꞌ kiselevoꞌ ogo tiꞌ lo gizineꞌ ve:

Nenikumuꞌ viseꞌ isaꞌmave nete nene nenikumuꞌ mo ningi gilikeve.

Ee, neniꞌ monovoꞌnemuꞌ gililisa longoꞌ isaꞌmavela nene

neniꞌ monovoꞌne do sotoꞌ ogo ngelebizekuvo

mo ningikeve.

21 Ne neiha Isilaeleꞌ alevemuꞌ aza tiꞌ lo lineꞌ ve:

Naza nene haza minamo

gamene gamene aꞌne do patelo nenita alo alo lo-ngedeꞌmo vovoꞌ minaaꞌ nouvoniꞌza

ingine nene gamaziꞌne gili huli eꞌmenga laaꞌ ave mini

mo gilisaꞌmave.

<- LOMA 9 LOMA 11 ->