1 Nelotiꞌ nene sipisipi angale neꞌmo bukuꞌmi nalaꞌve naba seveni nene huko apasavo Okulumokuꞌ minaniꞌ initeꞌ nene noꞌinesi milamavo eleseꞌ iki nizavoo gamene haf aua neꞌmine nene gaꞌme pize minineꞌ ve. 2 Neꞌmine ogavo nelotiꞌ ninguvoniꞌ nene Oꞌmosoꞌmi velela minaaꞌ aniꞌ angeloꞌ seveniꞌa ma nene ninguve. Engiꞌ nene pikuli seveniꞌa ma ngemavo di minaniꞌ ve.

3 Idoꞌ angeloꞌ gohi ma neve nene unuvo lamineꞌ ogaꞌ ineꞌ initeꞌ milaaꞌ aniꞌ lapese ngolidunuꞌ liliꞌ aniꞌ nene do mino ogo alata neida ote minineꞌ ve. Neivo ngolidunuꞌ liliꞌ aniꞌ alata Oꞌmosoꞌmi moꞌmosiꞌveꞌmi velela minidoꞌ nene aꞌmine angeloꞌ neꞌmo aꞌmine unuvo lamineꞌ ogaꞌ ineꞌ initeꞌ nene Oꞌmosoꞌmi evenelelite Oꞌmosola laniꞌ gamazisi nene olokuꞌ gizo Oꞌmoso emelive lisa vaiꞌ goloso nene imaniꞌ ve. 4 Idoꞌ neꞌmine ogavo aꞌmine unuvo lamineꞌ ogaꞌ ineꞌ initeliꞌmi sokile nene Oꞌmosoꞌmi evenelelite eita laniꞌ gamazisi aꞌmine Oꞌmosoꞌmi velela minineꞌ angeloliꞌmi anautiꞌ nene dizo vineꞌ ve. 5 Idoꞌ neꞌmine ogo aꞌmine angeloꞌ neꞌmo alatalotiꞌ oloꞌ vele ma do aꞌmine do minineꞌ lapeseuꞌ nene molosa hulo misubouko ogavo goꞌ ngilili ngilili lo nolo nolo molo goꞌ paꞌna neꞌmo lede ogo vogo ivo mimiꞌ ineꞌ ve.

6 Idoꞌ nelotiꞌ nene pikuli seveni di minaniꞌ angeloꞌ seveni mate nene aꞌmine pikuli di nolo milalisa gamunoꞌ i minaniꞌ ve.

7 Neꞌmine igi minadotiꞌ naba vani angeloꞌ neꞌmo nene pikuli hubu lo do nolo molavo osupo gihilesi olokisi nene vanisesi gopoꞌ napa o minineꞌ nene sotoꞌ ogavo misubouko mili hulikevo doꞌmozineꞌ ve. Idoꞌ doꞌmozineꞌ neꞌmo nene misubo lakaꞌni seto hamo miningutiꞌ linge hamoꞌ nene loꞌvoto osuꞌ lavo idoꞌ za lingelatikisi nene aꞌmineꞌmine votigileloꞌ ma lo osuꞌ lavo misuboloꞌ guvise navise ngomoꞌ nabaꞌ mukiꞌ nesi nene lo osuꞌ lineꞌ ve.

8 Neꞌmine ogavo angeloꞌ naba tuu neꞌmo nene pikuli hubu lo do nolo molavo golo naba neꞌmine gele vineꞌ initeꞌ nene ma oloꞌ lo neivo guvo nosouꞌ di hulaniꞌ ve. Neꞌmine ikevo guvo noso lakaꞌni seto hamo miningutiꞌ lingela hamoꞌ nene vanise nosovoꞌ loloꞌ ineꞌ ve. 9 Neꞌmine ogavo guvo nosouꞌ veꞌinesi minaniꞌ initekutiꞌ nene aꞌmineꞌmine votigileloꞌ nene hili osuꞌ laniꞌ ve. Idoꞌ aꞌmine guvo nosoloꞌ monaniꞌ sipiutiꞌ aꞌmineꞌmine votigileloꞌ nene vi goloso aniꞌ ve.

10 Neꞌmine ikevo angeloꞌ naba tili neꞌmo nene pikuliꞌve nene hubu lo do nolo molavo Okulumokutiꞌ sonohiꞌ naba goloso liviꞌ neꞌmino lo minineꞌ nene misubouꞌ noso hinipinikisi noso mukikisi minaniꞌ nene lakaꞌni seto hamo minangutiꞌ hamoꞌ maloꞌ nene limineꞌ ve. 11 Aꞌmine sonohiliꞌmi gulive nene Ekeseꞌ Malasini ve lo minineꞌ ve. Idoꞌ noso linge setaꞌ ha nizasivo noso linge ma neꞌmo ekeseꞌ malasini loloꞌ ineꞌ neꞌmo nene eveneꞌ mukiꞌ goloso hilaniꞌ ve.

12 Idoꞌ nelotiꞌ nene angeloꞌ naba fo neꞌmo nene pikuli hubu lo do nolo molavo hoꞌ nene lakaꞌni mili seto hamo minangutiꞌ linge hamota nene belavo litiꞌmuso izineꞌ ve. Idoꞌ aꞌmineꞌmine votigileloꞌ ikeꞌni miningutiꞌ lingela nene belavo litiꞌmuso izineꞌ ve. Idoꞌ aꞌmineꞌmine votigileloꞌ sonohiꞌ linge setata nene ha nizasivo hamota nene belavo litiꞌmuso izineꞌ ve. Holiseꞌ hamokuꞌ gamene seto hamo miningutiꞌ linge hamota nene labanaꞌve nomineꞌ minineꞌ ve. Idoꞌ aꞌmineꞌmine ogo litiꞌmuso hamokuꞌ ize gito seto hamo miningutiꞌ linge hamota nene labanaꞌ ngomosi minamivo litiꞌmuso gehepeve ize minineꞌ ve.

13 Idoꞌ ninge minuvoniꞌ nene nolise naba ma hamokovoꞌ minidiꞌmo nene okulumoꞌ veleta olusoꞌ gehepeve hozene patelo nomonineꞌ nene ninge nouvo nolo nabautiꞌ tiꞌ lo nolivo giluve: Agae, agae, agae. Angeloꞌ lumo seto hamo nizaniꞌ nete pikuliꞌine hubu li di noꞌine milalisa naaniꞌ neꞌmo nene misubouꞌ alevela mulumo geni atoliꞌmine ogo sotoꞌ o-ngedelesa neive.

<- LEVELESENI 7LEVELESENI 9 ->