7
Oꞌmosoꞌmo Misubo Do Goloso Ilineꞌ Gamene Nene Olihe Amivo Oꞌmosoꞌmo Eiꞌ Evenele Ve Lo Noso Molo-ledelingumuꞌ Nene Aꞌmine Gamene Hazavoꞌ Gizebo O Neivo Zohaneꞌ Ningineꞌ Nemuꞌ Gizineꞌ Gamazi
1 Nelotiꞌ ma ninguvoniꞌ nene angeloꞌ setaꞌve setaꞌve misubo lumola lumola otiꞌmi vi nizavo ninguve. Ingine misuboloꞌ nehe guvo nosoloꞌ nehe za mukitoꞌ nehe ne hepeꞌ elo do goloso ogalive li aꞌmine misuboloꞌ hepeꞌ elelineꞌ hepeꞌ setaꞌve setaꞌve nene di giliꞌ li miniꞌ miniꞌ aniꞌ ve. 2 Idoꞌ gohi ma ninguvoniꞌ nene angeloꞌ gohi maliꞌmo minevoꞌ minevoꞌ ogaꞌ neineꞌ Oꞌmosoꞌmo eiꞌ initeꞌveloꞌ noso molaaꞌ neineꞌ initeꞌve nene do mino hoꞌ dizaaꞌ idatiꞌ nene sotoꞌ ogo navo ninguve. Neꞌmine ogo aꞌmineꞌmo nene aꞌmine angeloꞌ setaꞌve setaꞌve adoꞌ misubosi guvo nososi di goloso ilizave lo Oꞌmosoꞌmo gele ngimivemuꞌ nene nolo nabautiꞌ vise naba lo 3 tiꞌ lo lo-ngidineꞌ ve: Laza Oꞌmosoteꞌmi gonouꞌ veꞌveti golihiꞌnidoꞌ Oꞌmosoꞌmi noso olihe molo-ngede osuꞌ lo-ngedamuninguꞌ lingine nene misubo nehe guvo noso nehe idoꞌ zaꞌnalaꞌ nehe neve nene olihe di goloso amilo. 4 Neꞌmine lavo Oꞌmosoꞌmi noso mili-ngidaniꞌ aleveti nabaꞌine nene mo li-nimikevo giluvoniꞌ ve. Adoꞌ Isilaeleꞌ gipeleti ngaꞌvopilemoꞌ zuho mukikutiꞌ nene eveneꞌ vanu hadeti foti fo tauseni (144,000) nene noso mili-ngidaniꞌ ve.
5 Adoꞌ Zudaꞌ aꞌvopilemokutiꞌ nene tuvelu tauseni (12,000) noso mili-ngidi
Idoꞌ Lubeniꞌ aꞌvopilemokutiꞌ nene tuvelu tauseni (12,000) noso mili-ngidii
Idoꞌ nGadiꞌ aꞌvopilemokutiꞌ nene tuvelu tauseni (12,000) noso mili-ngidii
6 Idoꞌ Aseliꞌ aꞌvopilemokutiꞌ nene tuvelu tauseni (12,000) noso mili-ngidii
Idoꞌ Nahataliꞌ aꞌvopilemokutiꞌ nene tuvelu tauseni (12,000) noso mili-ngidii
Idoꞌ Manaseꞌ aꞌvopilemokutiꞌ nene tuvelu tauseni (12,000) noso mili-ngidii
7 Idoꞌ Simeoniꞌ aꞌvopilemokutiꞌ nene tuvelu tauseni (12,000) noso mili-ngidii
Idoꞌ Leviꞌ aꞌvopilemokutiꞌ nene tuvelu tauseni (12,000) noso mili-ngidii
Idoꞌ Isakalaꞌ aꞌvopilemokutiꞌ nene tuvelu tauseni (12,000) noso mili-ngidii
8 Idoꞌ Zebuloniꞌ aꞌvopilemokutiꞌ nene tuvelu tauseni (12,000) noso mili-ngidii
Idoꞌ Zoseheꞌ aꞌvopilemokutiꞌ nene tuvelu tauseni (12,000) noso mili-ngidii
Idoꞌ Benizaminiꞌ aꞌvopilemokutiꞌ nene tuvelu tauseni (12,000) noso mili-ngidaniꞌ ve.
Oꞌmosoꞌmi Moꞌmosita Eveneꞌ Vaiꞌ Goloso nGelo Gatamosoꞌ I Minaniꞌ Nene Mokonoꞌ Initekovoꞌ nGili Nizavo Zohaneꞌ Ningineꞌ Nemuꞌ Gizebo Ve Engikutiꞌ Maliꞌmo Lo-imineꞌ Gamazi Gizineꞌ Ve
9 Nelotiꞌ ma ninguvoniꞌ nene eveneꞌ vaiꞌ goloso ngelo gatamolonidoꞌ i minaniꞌ nene adoꞌ misubouꞌ misuboutiꞌ eveneꞌ zuho ato atokutiꞌ okoꞌine ato atokisi noꞌine ato atokisi nene aꞌmine Oꞌmosoꞌmi moꞌmosiꞌve adoꞌ sipisipi angale ote minineꞌ velela nene oti mini mokonoꞌ initekovoꞌ ngili zavile davile ledi di mini 10 noꞌine nabautiꞌ gekeꞌ li tiꞌ li laniꞌ ve:
Lukuvo nuneꞌ nene moꞌmosiꞌveloꞌ minive Oꞌmosoteliꞌmosi
sipisipi angale neꞌmosi nene lukuvo limikesivo lukuvo nuneꞌ ve.
11 Idoꞌ neꞌmine likevo angeloꞌ mukiꞌ nene Oꞌmosoꞌmi moꞌmosiꞌvesi idoꞌ gizebo vesi idoꞌ eleꞌvoleꞌ igi veꞌinesi ha minaaꞌ naniꞌ initeꞌ setaꞌve setaꞌve nesi nene di vodo vodo i-ngidi oti mini aꞌmine Oꞌmosoꞌmi moꞌmosiꞌveꞌmi velela nene limi goꞌine hizi ingi Oꞌmoso opoꞌni li 12 tiꞌ li laniꞌ ve:
Mo lamineꞌ likeve.
Nemuꞌ nene leliꞌ Oꞌmosote aza amuzo ve mino idoꞌ eleꞌvoleꞌ ogo mino
idoꞌ gala gele nge lo minaaꞌ ive dizo neivo guvele monaaꞌ neingumuꞌ nene
isaaꞌ neve lo do naba o-do opoꞌni noluneꞌ nene
mo huko vamo minevoꞌ minevoꞌ ogo minelive. Mo neꞌmino miniliho.
13 Idoꞌ aꞌmidoꞌ nene gizebo ve mautiꞌ maliꞌmo tiꞌ lo longoꞌ o-nidive: Okoꞌnidoꞌ initeꞌ mokonokovoꞌ ngili minave mene zamote nizave. Idoꞌ zaalatiꞌ aniꞌ neve. 14 Neꞌmine lavo naza tiꞌ lo lo-imuve: Ve nabo, Naza ma gelamuve. Asi gasika nene gele naneꞌ ve. Neꞌmine lokuvo tiꞌ lo lo-nimive: Aꞌmine aleve meve nene goboni mili-ngidi nizavo aꞌmine geni ato atoꞌ sotoꞌ ineꞌ gameneuꞌ eleꞌvoleꞌ igi geni gihi mini lukuvo nave ma nene nizave. Engiꞌ geneganaꞌine nene sipisipi angaleꞌmi vanisedunuꞌ nosoꞌ izisa di guluviꞌ li di mokonoꞌ ilaniꞌ ve. 15 Nemuꞌ nene
Oꞌmosoꞌmi moꞌmosiꞌveꞌmi velela mini
gamene gamene goꞌ liha litiꞌmuso iziha kekeize lo neineꞌ numuꞌveuꞌ nene
eze gonoꞌve di-di nizavo
moꞌmosiꞌveloꞌ minive aza engikisi makaꞌ mino alete molo-ngedaaꞌ oloseive.
16 Neꞌmine ogavo ingine nosoꞌ niteꞌ nehe haza noso nehe
nevoꞌmine initeꞌ nene gohi ma viseꞌ ami gaꞌnasi hilamilisave.
Idoꞌ hoꞌ neꞌmosi nene okoꞌnidoꞌ oloꞌ lo ma do goloso o-ngedamoloseive
17 Nene naniteliꞌmo ve:
Sipisipi angale Oꞌmosoꞌmi moꞌmosiꞌveuꞌ minive neꞌmo nene gizebo o-ngedo mino
minevoꞌ minevoꞌ ogo minaaꞌ neineꞌ noso hinipinita nene ngeleꞌmizo vaaꞌ oloseive.
Neꞌmino neivosa Oꞌmosoꞌmo nene veꞌine novozo lemaliꞌ lemaliꞌ lo-ngedo mineleseive.
<- LEVELESENI 6LEVELESENI 8 ->