Katagarda ka

Zafaniya
Kuɓa̱yuwa̱
Keneki Zafaniya u dana ta̱ uma kadanshi ka̱ Ka̱shile a ayin a ukocishi a tsumani ci cindere kafu a matsa Yesu (KY). U yotso ta̱ u yaꞋan ta̱ kene ku nampa a̱ya̱ kupa kafu mogono Josaya u lapula ukuna u kutoni a̱ ka̱ya̱ ka amangatawa̱nta̱li n kamanga n kete (621) kafu a matsa Yesu (KY).
Katagarda ka ki ta̱ uɗiki n kadanshi ka ukuna u kene ku na uma a kiwanai n uɗa. Kanna ka afada n kanna ka wuya ki ta̱ lo a̱ kuta̱wa̱ ka na Vuzavaguɗu u kutakacika Yahuda adama a na wi ta̱ a kucikpa a̱ma̱li. Vuzavaguɗu wi ta̱ feu a kutakacika iɗika i uma i na i buwai.
Ko a na wo okpoi a takacika ta̱ ɗe Urushelima, a kubana kelime i ta̱ o kubonoko likuci ya tsu na yi ishi cau. Uma i ta̱ a̱ kuda̱sa̱ngu punu, i ta̱ o ko okpo aza a usuɓi n ma̱riki. Vuzavaguɗu n ka̱ci ka̱ ni wi ta̱ a kupana uyoꞋo u yaꞋan ma̱za̱nga̱ adama a uma a̱ ni a na a buwai, a na u yaꞋansakai nwalu n le.
Ili i na yi punu udari
Kanna ka na Vuzavaguɗu u kutakacika aza a Yahuda ki ta̱ lo a̱ kuta̱wa̱ 1:1-18
Uɗeki adama a̱ kushika̱ ku unushi 2:1-3
Atakaci adama a iɗika i uma a na e yevei Ka̱shile ba 2:4-15
Atakaci a Urushelima n wishi u ni 3:1-13
Vishipa vu ma̱za̱nga̱ 3:14-20

Kanna ka afada a Vuzavaguɗu wa aza a Yahuda

1 Vuzavaguɗu u yaꞋin kadanshi n Zafaniya kolobo ka̱ Kushi, matsukaya ma Gedaliya, vuza na esheku a̱ ni Amariya, maku ma Hezekaya, a ayin a na Josaya kolobo ka Amon wi o tsugono tsu Yahuda. 2 Vuzavaguɗu u danai,

<<Mi ta̱ a ku una ili ra̱ka̱,

a aduniyan.>>

3 <<Mi ta̱ a ku una uma nu nnama dem,

Mi ta̱ a̱ ku una nnu n gaɗi,

n adan a mala,

mi ta̱ kpamu a̱ ku una aza a gbani-gbani n a̱ma̱li e le,

ka̱ta̱ m pura̱ngu vuma vu lima̱ aduniyan.>>

4 <<Mi ta̱ a̱ kuba̱rukpa̱ kukiye ku va̱ n yaꞋan tsurala n Yahuda,

n aza a na i a̱ ida̱shi a Urushelima dem.

A̱ ubuta̱ u nanlo ɗa mi a ku una aza a na a buwai a kucikpa ka̱ma̱li ka Balu,

n ula a anan ganu va̱ a̱ma̱li a nanlo.

5 Mi ta̱ a ku una aza a na a tsu kumba gaɗi vu kukpa̱,

a cikpa kanna n wotoi n azangata.

Mi ta̱ a ku una aza a na a̱ tsu kuɗa̱ngu a kucina n Vuzavaguɗu,

i kpamu a kucina n ka̱ma̱li ka Moleka.

6 Mi ta̱ a ku una aza a na o bonoi n ka̱ca̱pa̱,

a̱ ka̱sukpa̱i kutono Vuzavaguɗu,

n aza a na a̱ kpa̱ɗa̱i kula̱nsa̱ ili u Vuzavaguɗu,

kpamu a̱ la̱nsa̱ kusheshe ku ni ba.>>

7 Paɗa bini e kelime ka Vuzavaguɗu Ka̱shile,

adama a na kanna ka Vuzavaguɗu ka yawa ta̱ ɗevu,

Vuzavaguɗu wi ta̱ kufoɓuso kanna ka afada,

kpamu u zagba ta̱ aza a na a kuyaꞋan a ɗa,

8 A kanna ka nanlo, mpa Vuzavaguɗu,

<<Mi ta̱ a kutakacika aza e kelime n aza o tsugono,

n aza a na i o kutono kuyongo ki iɗika yi uduma.

9 A kanna ka nanlo mi ta̱ a kutakacika,

aza a na a banai a̱ ubuta̱ u ka̱ɗiva̱ ka̱ a̱ma̱li,[a]

n ele na a shatangi iꞋuwa yi nva̱li ma̱ a̱ma̱li n le,

n ukuna u modoruko n kalyaꞋa.

10 Vuzavaguɗu u danai, <<A kanna ka nanlo,

i ta̱ a kupana ma̱shi na ɗe a̱ Utsutsu u Kadan,

a pana yoroli ɗe a kakambu ke ire,

n izumgbi yi ili o kuɓososo a gaɗi vu nsasan.

11 Shika̱i, a̱ɗa̱ na yi ida̱shi a uɓon u kuden ku Morota,

adama a na i ta̱ a ku una aza a tsulaga ra̱ka̱,

n edengi azanariya n azurufa ra̱ka̱ i ta̱ a ku una le.

12 A ayin a nanlo mi ta̱ a̱ kula̱nsa̱ Urushelima nu nkuni,

mi ta̱ a kutakacika aza a na a tsu zuwaka nu ukuna ba,

aza a na a tsu dana a̱ɗu e le,

<Vuzavaguɗu wi a kuyaꞋanka tsu kasingai ba,

ko u yaꞋanka tsu i gbani-gbani ba.>

13 I ta̱ a̱ kupura̱ uciyi u le,

ka̱ta̱ o ɓoso iꞋuwa i le,

ko a na wo okpoi a maꞋa ta̱ iꞋuwa,

ama a̱ kuda̱sa̱ngu punu ba,

i ta̱ a kucimba ashina a itacishi,

ama o kusoꞋo ma̱kya̱n ma ba.>>

Kanna ka gbayin ka Vuzavaguɗu

14 Kanna ka gbayin ka Vuzavaguɗu ka yawa ta̱ ɗevu,

ka yawa ta̱ ɗevu ɗa kpamu ki a̱ kuta̱wa̱ gogoꞋo.

Izumgbi i kanna ka Vuzavaguɗu yi ta̱ n okono,

a kanna ka nanlo keyevi ko kuvon ki ta̱ a̱ kushika̱ ka̱u.

15 Kanna ka nanlo ki ta̱ o ko okpo kanna ka wupa,

kanna ku una̱mgbuka̱tsuma̱ n atakaci,

kanna ka̱ munuka n kula̱nga̱su,

kanna ka̱ ka̱yimbi ka kpaɓam,

kanna ke eleshu n ka̱yimbi ka gbayin,

16 kanna ka̱ ku uvula̱ avana n isali i kuvon,

adama a̱ likuci yi ukanji n nshilya mu ugaɗi.

17 Mi ta̱ a̱ ku tuka̱ n atakaci a̱ ubuta̱ u uma,

ali a wala tsa̱ a̱yimba̱,

adama a na a nusaka ta̱ Vuzavaguɗu,

i ta̱ a̱ kutsuwa̱n mpasa tsu mini,

inyama yi ikyamba i le an tsuta̱.

18 A kanna ka wupa ka Vuzavaguɗu,

azanariya ko azurufa e le,

a kufuɗa ku isa le ba.

A̱ ka̱tsuma̱ ka̱ usuɗukpi u cisheꞋe u ni,

aduniyan dem i ta̱ a kuyaꞋan wu uni,

wi ta̱ a̱ kutuka̱ n uteku wa aduniyan gogoꞋo lo.

Zafaniya 2 ->