38
Avasa a vuza va atakaci
Vishipa vu Dawuda. Adama a ku ciɓasa.
1 Vuzavaguɗu, ka̱ta̱ vu ɓarangu mu a̱ ka̱tsuma̱ ka wupa u nu ba,
ka̱ta̱ vu takacika mu n asuvu a usuɗukpi a̱ nu ba,
2 Vu yaꞋanka mu ta̱ usa̱n n ayaꞋa a̱ nu,
ɗa feu vu lapai mu ali a iɗika.
3 Adama a wupa u nu,
ikyamba i va̱ yi ta̱ a̱ mɓa̱la̱.
ikyamba i va̱ ra̱ka̱ i ka̱ na̱ ta̱ mɓa̱la̱,
adama a unushi u va̱.
4 Unushi u va̱ u laꞋa ta̱ utsura u va̱,
an nu ucanuku wa̱ a̱miki, u na u laꞋi utsura u va̱.
5 Adama a tsulau tsu va̱ n yaꞋin unushi,
untsu a̱ va̱ a shamai ali a̱ ku uta̱ ushami,
6 Mɓa̱la̱ n va̱ n yaꞋan ta̱ a̱bunda̱i,
ali m poloi mu, kanna ka̱ɓula̱ mpa a̱ ma̱shi.
7 Ma̱vuna̱ ma̱ ka̱na̱ mu ta̱ wuya-wuya,
mi ta̱ ka̱ mɓa̱la̱ ka̱u.
8 Mo oꞋwoi ka̱u,
ali mo okpoi luɓa̱,
ka̱ɗu ka̱ va̱ ka̱ na̱mgba̱i ka̱u,
ɗa n ka̱na̱i yura̱ adama a usuɗukpi.
9 Vuzavaguɗu, vu yeve ta̱ ili i na mi a kuciga.
vi ta̱ kpamu a kupana yura̱ i va̱ ra̱ka̱.
10 Ka̱ɗu ka̱ va̱ ki ta̱ a̱ ku muɗa̱sa̱,
utsura u va̱ u kotsoi,
ɗa a̱shi a̱ va̱ a̱ ka̱na̱i kene yimbi-yimbi.
11 A̱ja̱Ꞌa̱ a̱ va̱ n aza a na ci a̱ ida̱shi ɗeɗevu,
o doku a yawa ɗevu nu mpa ba,
adama a̱ untsu a̱ va̱,
ali muku n va̱ dem n sumai mu.
12 Aza a na a cigai ku una mu,
azuki mu maza.
aza a na kpamu a cigai o doro mu,
e kusheshe a yaꞋanka mu koli,
kanna ka̱ɓula̱ o kufoɓuso ka gbani-gbani adama a̱ va̱.
13 Mi ta̱ tsu kagulani n tsu pana ba,
mi ta̱ tsu kebebe n tsu fuɗa n dansa ba.
14 Mo okpoi tsu kagulani n tsu pana ba,
adama a na n tsu ushuku n kadanshi ba.
15 Vuzavaguɗu, n zuwa ta̱ ka̱ɗu wa̱ a̱ nu,
Vuzavaguɗu Ka̱shile ka̱ va̱, avu ɗa va̱ ku ushuku mu.
16 <<Ka̱ta̱ vu ka̱sukpa̱ irala i va̱,
a yaꞋan ma̱za̱nga̱ adama atakaci a̱ va̱ ba,
ka̱ta̱ vu ka̱sukpa̱ le a lapa ma̱ka̱nga̱,
adama a uyikpi u va̱ ba.>>
17 Mi ta̱ ɗevu n kuyikpa̱,
mi ta̱ a̱ ka̱tsuma̱ ka atakaci ayin dem.
18 N shika̱ ta̱ u nushi u va̱.
unushi u va̱ u zuwa mu ta̱ atakaci.
19 Aza a tsurala nu mpa ko unushi i ta̱ n utsura,
aza a na a iwain mu ko unushi i ta̱ lo n a̱bunda̱i.
20 Aza a na a tsu tsupa kasingai n ka gbani-gbani,
i ta̱ a tsurala nu mpa,
adama a na n ciga ta̱ kuyaꞋan kasingai.
21 Vuzavaguɗu, ka̱ta̱ vu ka̱sukpa̱ mu ba,
Ka̱shile ka̱ va̱, ka̱ta̱ vu yaꞋan daꞋin nu mpa ba.
22 YaꞋan gogoꞋo vu ɓa̱nka̱ mu,