1 Ɗaɗa Vuzavaguɗu u danai Musa, 2 <<Takacika aza a Midiya adama a ili i na a yaꞋankai aza a Isaraila. Ayin a na baci vu kotsoi kuyaꞋan nannai, vi ta̱ a̱ kukuwa̱.>> 3 Ɗa Musa u yaꞋin kadanshi n uma a u danai, <<Foɓusoi uma a̱ ɗa̱ o yoku adama o kuvon, adama a na a̱ shilika̱ n aza a Midiya, a ɗika wupa u Vuzavaguɗu a kubana we le. 4 I suku uma ka̱kpa̱n ke te (1,000), vuza te-te a umaci dem wa aza a Isaraila adama a na a bana kuvon.>> 5 Ɗaɗa uma a̱kpa̱n kupa n e re (12,000) o foɓusoi adama o kuvon, umaci dem a Isaraila uma ka̱kpa̱n ke te (1,000). 6 Musa u suki le a kubana a̱ ubuta̱ u kuvon, umaci dem n uma ka̱kpa̱n ke te, a banai n Finihasu kolobo ka Eliyaza, ganu, u banai kpamu n ucanuku wu ubuta̱ u ciɗa n avana adama a ili i na e kuɗekeke kuvon. 7 A̱ shilika̱i n aza a Midiya tsu na Vuzavaguɗu u danai Musa, ɗa a unai ali dem ra̱ka̱. 8 A̱ ka̱tsuma̱ ka aza a na a unai va, Evi wi ta̱ punu, n Rekemu, n Zura, n Huru, n Reba, ele ɗa ngono n tawun ma aza a Midiya. A unai kpamu Balam maku ma Biyo n kotokobi. 9 Aza a Isaraila a̱ pura̱i gbani a̱ma̱ci m muku ma aza a Midiya, koɓolo n ushiga wa anaka, nu nlala, ali n ucanuku dem. 10 O songi likuci n a̱tsura̱ ra̱ka̱ i na aza a Midiya i ida̱shi. 11 A̱ pura̱i uma nu nnama gbani ali n ucanuku dem ra̱ka̱, 12 ɗa a̱ tuka̱i ili i nanlo ra̱ka̱ u Musa koɓolo n Eliyaza, ganu, koɓolo n ubuta̱ u uma a Isaraila a na a buwai dem, ele na ishi a vaki a̱ ka̱pula̱ka̱ ka Muwabu ɗevu n Kuyene ku Urudu a mi indanai n Jeriko. 13 Ɗa Musa n Eliyaza, ganu koɓolo n aza kelime o koɓolo ka uma, a banai a cinai osoji a Isaraila a pulai vu ubuta̱ u ka̱tsura̱ wa. 14 Ɗa Musa u yaꞋin wupa n aza a gbagbaꞋin o osoji, ovonshi a na i o kutono n uma a̱kpa̱n-a̱kpa̱n, n ele na i o kutono n uma amangatawun e te e te, ele na a̱ uta̱i a̱ ubuta̱ u kuvon wa.

15 Ɗa Musa we ecei le, <<Yiɗa̱i i zuwai ɗa i ka̱sukpa̱i a̱ma̱ci ra̱ka̱ n wuma?>> 16 Ciɓai, ele ɗa aza a na o tonoi kusheshe ku Balam, ɗa a zuwai aza a Isaraila kuka̱sukpa̱ uye u Vuzavaguɗu a kusan ku Piyo, ele ɗa a zuwai ma̱dukpa̱ ma̱ cipa̱i u uma a Vuzavaguɗu. 17 Gogo na unai muku mo olobo ra̱ka̱, m muku ma̱ a̱ma̱ci aza a na a saꞋwai kuyeve mavali. 18 Ama i buka ka̱ci ka̱ ɗa̱ muku ma̱ a̱ma̱ci n na a saꞋwai kuyeve mavali ba, n wuma.

19 <<Gogo na ra̱ka̱ vu ɗa̱ vuza na wu unai vuza ko u saꞋwai vuza na a unai, mayun ɗa u shamgba a pulai vu ka̱tsura̱ ka uma ali ayin e cindere. A kanna ka tatsu n ke cindere, u takpaka ka̱ci ka̱ ni nshinda̱ koɓolo n agbashi a̱ ni dem. 20 I takpaka aminya a̱ ɗa̱ nshinda̱ koɓolo n ili i na a caꞋi n ukpan, n cileme tsu malala ko i na e sheꞋwei m maɗanga.>>

21 Ɗaɗa Eliyaza, ganu u danai osoji a na a banai kuvon ka, <<Na ɗa wila̱ u na Vuzavaguɗu u nekei Musa. 22 Ili i na baci de dem a yaꞋin n azanariya, n azurufa, n iyum i shili, n viyum, n a̱ta̱mba̱, n dalma, 23 ili i na i kukpa̱ɗa̱ kukula̱ a asuvu a akina dem, i takpaka i ɗa nshinda̱ n akina ciya̱ yo okpo ciɗa. N nannai feu i doku i takpaka i ɗa nshinda̱ m mini. Ama i na i tsu kula̱ a akina, i takpaka i ɗa nshinda̱ m mini koci. 24 A kanna ke cindere i za̱Ꞌa̱ akashi a̱ ɗa̱, yi ta̱ o kokpo ciɗa. Ka̱ta̱ yeve i bono punu a̱ ka̱tsura̱ ka.>>

25 Ɗa Vuzavaguɗu u yaꞋin kadanshi m Musa u danai, 26 <<Avu n Eliyaza, ganu, koɓolo n aza e kelime a kumaci a, i kece uma a na a̱ ka̱na̱i tsa agbashi tsa, ali nu nnama dem. 27 I pece ucanuku wa ugboku u re, i neke osoji a na a banai kuvon ka, ali n uma a na a buwai feu. 28 I na i kuneke kosoji ka na ka yaꞋin kuvon dem, i takpa punu ugboku u yoku wo okpo utafu u Vuzavaguɗu. I ɗika ili i te a̱ ka̱tsuma̱ ki ili amangatawantawun (500) dem adama a utafu u nanlo, ko uma, anaka, njaki, nkyon, ko nraɗika. 29 I ɗika ugboku u te wu utafu u nanlo wo osoji wa, ka̱ta̱ e neke Eliyaza, ganu, ɗaɗa ugboku u na e nekei Vuzavaguɗu tsu kuneꞋe ku kuɗa̱ngusa̱. 30 Punu a kagimi ka na ki ka aza a Isaraila, i ɗika kagbashi ke te a̱ ka̱tsuma̱ ka agbashi amangerenkupa dem, ko anaka, njaki, nkyon, nraɗika ko nu nnama n na m buwai dem. I neke le u anan Levi, ele vu na i a kinda ulinga u Ka̱pa̱m ka̱ Ka̱shile.>> 31 Ɗaɗa Musa koɓolo n Eliyaza, ganu a yaꞋin tsu na Vuzavaguɗu u danai le.

32 Ka̱bunda̱i ku ucanuku ka na osoji a a̱ pura̱i a̱ ubuta̱ u kuvon: ɗaɗa nkyon a̱kpa̱n amangatawa̱nta̱li n amangatatsunkupa n a tawun (675,000), 33 n anaka a̱kpa̱n amangatatsunkupa n e re (72,000), 34 koɓolo ni njaki a̱kpa̱n amangatatsu n ke te (61,000), 35 m muku ma̱ a̱ma̱ci n na n saꞋwai kuyeve mavali ba, a̱kpa̱n kamangankupa n e re (32,000).

36 Ugboku wu ucanuku u na e pecekei osoji a na a banai kuvon ka u ɗaɗa, nkyon a̱kpa̱n amangatawantatsu n kamangankupa n e cindere, n amangatawantawun (337, 500), 37 upecu u Vuzavaguɗu tamkpamu u ɗaɗa nkyon nu nraɗika amangatawa̱nta̱li n amangatatsunkupa n aza tawun (675,000). 38 Anaka kpamu a̱kpa̱n kamangankupa n ta̱li (36,000), ta punu a̱ utuka̱i anaka amangatatsunkupa n e re adama a Vuzavaguɗu. 39 Njaki a̱kpa̱n kamangankupa n amangatawantawun (30, 500), ta punu a̱ utuka̱i njaki amangatatsu m me te adama a Vuzavaguɗu, 40 muku ma̱ a̱ma̱ci a̱kpa̱n kupa n a̱ ta̱li (16,000), ta punu a ɗikai kamangankupa n aza e re ɗa e nekei Vuzavaguɗu. 41 Ɗa Musa u nekei Eliyaza, ganu utafu wu upecu u Vuzavaguɗu wa, tsu na Vuzavaguɗu u tonukoi Musa u yaꞋan.

42 Na ɗa ugboku u na e nekei aza a Isaraila, u na Musa u pecei kau n aza a na a kuyaꞋan kuvon, 43 nkyon a̱kpa̱n amangatawantatsu n kamangankupa n e cindere n amangatawantawun (337, 500), 44 anaka a̱kpa̱n kamangankupa n a̱ ta̱li (36,000), 45 njaki a̱kpa̱n kamangankupa n amangatawantawun (30, 500), 46 nkere kpamu n na saꞋwai kuyeve mavali ba a̱kpa̱n kupa n a̱ ta̱li (16,000). 47 A̱ ka̱tsuma̱ ka kagimi ku ugboku u uma Isaraila, Musa u ɗikai vuza te a̱ ka̱tsuma̱ ka amangerenkupa dem, ka uma koɓolo nu nnama, ɗa u nekei wa aza e Levi, ele vu na a kinda ka̱pa̱m ka̱ Ka̱shile, tsu na Vuzavaguɗu u danai.

48 Ɗa aza a̱ gba̱ra̱-gba̱ra̱ aza a na a̱ kula̱na̱ osoji a, a banai u Musa, 49 ɗa a danai ni, <<Agbashi a̱ nu e kece ta̱ osoji a na i e ekiye e le babu vuza te a̱ ka̱tsuma̱ ke le vu na vu puwa̱nka̱i. 50 Tsu tuka̱ ta̱ kpamu n kuneꞋe u vuzavaguɗu a̱ ka̱tsuma̱ ki ili i na yaba dem vu tsu u ciya̱i, ucanuku wi ili ya azanariya, nu nkawani me ekiye, ni nshingi me ekiye, n ili ya atsuvu, n ili i kuɗeku, adama a na tsu takpaka ka̱ci ka̱ tsu unushi a̱ ubuta̱ u vuzavaguɗu.>> 51 Ɗa Musa n Eliyaza, ganu a isai kuneꞋe ka azanariya, koɓolo n ili i na a yimai va dem e ekiye e le. 52 Azanariya ra̱ka̱ a na aza a̱ gba̱ra̱-gba̱ra̱ e nekei kuneꞋe u vuzavaguɗu, a̱miki a̱ ni a yawa ta̱ shekelu a̱kpa̱n kupa n a̱ta̱li, n amangatawencindere n amangerenkupa, (16, 750). 53 Kosoji dem ka̱ pura̱ ta̱ ucanuku u gbani u ni. 54 Ɗa Musa n Eliyaza, ganu a isai azanariya a a̱ ubuta̱ wa aza a gbagbaꞋin o osoji a̱kpa̱n-a̱kpa̱n, n aza amangatawun a tawun a, ɗa a̱ tuka̱i a̱ Ma̱va̱li mo Oɓolo, ci ili i kuciɓasa ya aza a Isaraila a̱ ubuta̱ u vuzavaguɗu.

<- Mekecu 30Mekecu 32 ->