KATAGARDA KA JUWELU Kuɓa̱yuwa̱ Ukuna u Katagarda ka nampa A̱ ciya̱ ili yi a̱bunda̱i a ukuna u keneki Juwelu ba. kpamu a̱ ciya̱ e yeve a makyan ma na u yongoi n wuma ba. Ama i ta̱ o cicoꞋo a ɗana ta̱ katagarda ka̱ ni ka a makyan ma̱ a̱ya̱ amangatawantawun (500) a kubana a̱ya̱ amangatawa̱na̱shi, (400) kafu a matsa Yesu (bc) a ayin a na iɗika i Fashiya yi o tsugono tsa aduniyan. Juwelu u yaꞋan ta̱ kene ka ukuna u ma̱dukpa̱ m akyun n kanbulu a uɓon u Falisadinu. A̱ ka̱tsuma̱ ki ili nampa we ene ta̱ urotu u kanna ka̱ kuta̱wa̱ ka Vuzavaguɗu, ayin a na Vuzavaguɗu u kutakacika aza a na a iwain kusheshe ka aza a usuɓi. Keneki ka ka dana ta̱ kusheshe ku Ka̱shile n kudana uma a̱ shika̱ unushi u le, n uzuwakpani u kulapulu n una̱singai adama uma a̱ ni. Ili i kindana i ɗaɗa uzuwukpani u na Ka̱shile ka yaꞋin u danai, wi ta̱ a̱ ku suku n ayinviki a ciɗa a̱ ubuta̱ u uma a̱ ni dem, ali n a̱ma̱ci olobo nu nkoshi dem derere. Ukuna u na wi punu u keci Ma̱dukpa̱ m akyun 1:1; 2:17 Uzuwukpani u kulapulusuka 2:18-27 Kanna ka Vuzavaguɗu 2:28; 3:21.
1 Vuzavaguɗu u yaꞋin kadanshi n Juwelu kolobo ka Petuwelyu.
Ma̱dukpa̱ ma akyun a iɗika 2 Panai kakuna ka nampa, a̱ɗa̱ nkoshi m gba̱ra̱-gba̱ra̱, zuwai atsuvu a̱ ɗa̱, a̱ɗa̱ na yi punu ida̱shi a iɗika ya. a saꞋwa ta̱ kuyaꞋan ili i tsu nampa a ayin a̱ ɗa̱? Ko a ayin a ikaya i ɗa̱? 3 Tonukoi muku n ɗa̱ kaꞋa, ka̱ta̱ muku n ɗa̱ feu o tonuko muku n le, ka̱ta̱ muku ntsukaya n ɗa̱ o tonuko ntsukaya n na n kuta̱wa̱. 4 Ili i na ka̱kuma̱ ka̱ nta̱ɗa̱ma̱ci ka takumai ɗa i buwai, akyun a gbagbaꞋin o kotso a takumai, Ili i na akyun a gbagbaꞋin a takumai ɗa i buwai, ka̱kuma̱ ka̱ nta̱ɗa̱ma̱ci n kenkeꞋen ko kotso ka takumai. 5 Jimgbai, a̱ɗa̱ na ma̱ra̱ ma makai, i shika̱, lapai una̱, a̱ɗa̱ na yi osoꞋi a̱ ma̱ra̱, lapai una̱ adama a unambi u ma̱kya̱n ma savu, adama a na e pece ɗa̱ ta̱ n maꞋan. 6 Adama a na uma a̱ kpa̱ta̱ra̱ ta̱ iɗika i va̱, uma a utsura a ɗa, ka̱bunda̱i ke le ki kukece ba, anga e le i ta̱ n alyu tsu anga a kawu, 7 A̱ la̱nga̱sa̱ ta̱ ashina a itacishi a̱ va̱, ɗa a takumai nɗanga mu mbiri. E sheꞋwei a̱vu e le ra̱ka̱, a̱ ka̱sukpa̱i acaka e le wa̱ri. 8 Shika̱i tsu mekere, ma na mi a̱ ma̱shi adama a ukpa̱ u kamana ka̱ ni. 9 Anan ganu a̱ na̱mgba̱i a̱tsuma̱, adama a na babu kuneꞋe ki ishina n ki ili i kusoꞋo, a kpaꞋa ku Vuzavaguɗu. 10 Ashina ra̱ka̱ okpo ta̱ a̱pula̱ka̱, iɗika feu i ɗekpe ɗe, Ishina i na̱mgba̱ ɗe, ma̱kya̱n feu me ɗekpe ɗe, babu kpamu maꞋin ma zaitu. 11 Na̱mgba̱i a̱tsuma̱ a̱ɗa̱ acimbi, lapai una̱, a̱ɗa̱ acimbi ashina a itacishi, na̱mgba̱i a̱tsuma̱ adama a itabi m bali, adama a na a̱ la̱nga̱sa̱ ta̱ ili i kashina. 12 Ashina a itacishi a̱ ɗa̱ e ɗekpe ta̱ ra̱ka̱, nɗanga mu mbiri n ɗa̱ n ɗekpe ta̱, nɗanga n Ruman, nu nshuwa nu nɗanga n na m buwai ra̱ka̱ n ɗekpe ta̱. Mayun ma̱za̱nga̱ ma vuma vu lima̱ mo kotso ta̱. Kushika̱ ku unushi n avasa 13 A̱ɗa̱ anan ganu a na yi a kuyaꞋan alyuka, a katalikalyuka ka Vuzavaguɗu, ukai akashi a kpalu, i shika̱, i uwa A̱Ꞌisa̱ a gbayin yi asa n akashi a kpalu a̱ ɗa̱, adama a na babu ishina ko ma̱kya̱n, ma na a kuyaꞋanka alyuka A̱Ꞌisa̱ a gbayin a̱ Ka̱shile ka̱ ɗa̱. 14 Salai kuyaꞋan kakuli, yaꞋin koɓolo ka gbangam. ɓolongi nkoshi m gba̱ra̱-gba̱ra̱ n uma a iɗika ya ra̱ka̱, A̱Ꞌisa̱ a gbayin a Vuzavaguɗu Ka̱shile ka̱ ɗa̱, i banka n ma̱shi ma̱ ɗa̱ u Vuzavaguɗu. 15 Ili ya atakaci ɗa a kanna ka nanlo. Adama a na kanna ka Vuzavaguɗu ka yawa ta̱ ɗevu, atakaci a ɗa a MalaꞋimili a̱ kuta̱wa̱. 16 A̱ a̱shi a̱ tsu ɗa a̱ la̱nga̱sa̱i tsu ilikulyaꞋa, babu ma̱za̱nga̱ n kupana ku uyoꞋo, a kpaꞋa ku Ka̱shile ka̱ tsu. 17 IcuꞋu i kuwa̱i adama a uɗekpu wi iɗika, mpon n na̱mgba̱i, ɗa n fa̱da̱i. adama a na babu ishina, 18 La̱na̱ tsu na anaka i a̱ yura̱. Ushiga wa anaka u yangalai, adama a na a̱ ciya̱ ijanu ba, ushiga wu nlala feu atakaci. 19 Vuzavaguɗu, wa̱ a̱ nu u ɗa mi a̱ ma̱shi, adama a na akina a lyaꞋa ta̱ ubuta̱ u kalina. melentsu ma akina mo songu ta̱ nɗanga n kakamba ra̱ka̱. 20 Nnama n kakamba feu mi ta̱ a̱ ma̱shi wa̱ a̱ nu,
1 Vuzavaguɗu u yaꞋin kadanshi n Juwelu kolobo ka Petuwelyu.