2 SAMAILA 23

Kadanshi ka Dawuda ku ukocishi

1 Na ɗa kadanshi ka Dawuda ku ukocishi.

Kadanshi ka Dawuda maku ma Jesi,

Kadanshi ka vuza na MalaꞋimili ma cikpai,

vuza na Ka̱shile ka Yakubu ka zagbai mogono

vuma vi Isaraila kayaꞋin ki ishipa i singai.

2 <<Ayinviki a Vuzavaguɗu a yaꞋan ta̱ kadanshi a̱ una̱ u va̱,

Kadanshi ka̱ ni ki ta̱ e kelentsu ka̱ va̱.

3 Ka̱shile ka aza a Isaraila ka yaꞋan ta̱ kadanshi,

Ubuta̱ u kusheɗeku wa aza a Isaraila u dana mu ta̱,

Vuza wi baci a kulyaꞋa tsugono tsu usuɓi a uma a̱ ni,

ɗa kpamu wi a kulyaꞋa tsu ɗa n wovon u Ka̱shile,

4 wi ta̱ tsu kutashi ku usana,

n tsu kanna ku usana ka na ka̱ uta̱i babu keleshu ka na ka palai kaꞋa,

n tsu kutashi a makyan ma na u kotsoi kuyoꞋo mini, ku na ku tsu zuwa mi ta̱ ma̱ uta̱ a iɗika.

5 <<Ta Ka̱shile ka kuzuwaka ntsukaya n va̱ una̱singai nannai,

adama a na u yaꞋanka mu ta̱ uzuwakpani u kowanai,

kpamu wi ta̱ u foɓushi u tono u ɗa,

i ɗaɗa i na n cigai, ɗaɗa ulyaꞋi u va̱,

n yeve ta̱ mayun Ka̱shile ki ta̱ a kuzuwa ili ya yo okpo nannai.

6 Ama uma a gbani-gbani ra̱ka̱ i ta̱ tsa awana a na a variki,

i kuɗika n ekiye ba.

7 Ama vuza na baci u ku saꞋwa le

u yaꞋan ulinga m viyum ko ukutsu u masara,

i ta̱ o kusongu le gbende.>>

A fuɗi o kuvon a Dawuda

(1 Ar 11:10-19)

8 Na ɗa ula osoji a Dawuda a na a laꞋi n kufuɗa kuvon. Vuza vu ugiti a̱yi ɗa Joshebu-bashebetu vuza vu Takemon, e yeve yi ta̱ kpamu n kula Adini-izini. A̱yi ɗa vuza vu kelime vo osoji a tatsu a. U saꞋwa ta̱ kuɗika masara ma̱ ni wu unai uma amangatawunkunla̱i (800) a makyan me te.

9 Vuza ire a̱ ka̱tsuma̱ ka osoji a tatsu a, a̱yi ɗa Eliyaza maku ma Dodayi a kumaci ku Ahohi. Eliyaza wi ta̱ koɓolo n Dawuda a makyan ma na o goyoi aza a Filisitiya wana ɗai o ɓolongu a̱ ubuta̱ u kuvon. A makyan ma na aza a Isaraila a sumai. 10 Ɗa a̱yi u shamgbai u shilika̱i na aza a Filisitiya a ali kukiye ku ni ku oꞋoi, ali kotokobi ka paɗai e kukiye ku ni. Vuzavaguɗu u nekei ni ulyaꞋi u gbayin a kanna ka nanlo ka. Osoji a na ishi a sumai ɗa a kpatalai o bonoi a̱ ubuta̱ u kuvon wa, adama a na a̱ pura̱ ucanuku wa aza a na a unai.

11 Vuza tatsu vu le a̱yi ɗa Shama maku ma Agi vuza vu Harara. Kanna ke te ana aza a Filisitiya o ɓolongi adama a na a yaꞋan kuvon ɗevu n kashina ka awaya, ɗa osoji a Isaraila a sumai. 12 Ama ɗa Shama u shamgbai e mere ma kashina ma wu isai kaꞋa, ɗa wu unai aza a Filisitiya. Ɗa Vuzavaguɗu u nekei ni ulyaꞋi u gbayin.

13 Kanna ko yoku a ayin a vukyaꞋa, ɗa osoji a tatsu a na laꞋi n kufuɗa kuvon a̱ ka̱tsuma̱ ko osoji kamangankupa a banai u Dawuda a kaɓatsu ka Adulam. Cina ɗe ka̱tsura̱ ko osoji ka aza a Filisitiya a̱ shikpa̱ a̱pa̱m le a̱ ka̱ra̱Ꞌa̱ ka Refimu. 14 A makyan ma nanlo Dawuda wi ta̱ ɗe a̱ ubuta̱ u na u tsu sheɗeku. Ka̱tsura̱ ko osoji o yoku ka aza a Filisitiya ɗe a Batalami. 15 Ɗa kakuli ka̱ ka̱na̱i Dawuda, u danai, <<Ishi baci n kuciya̱ vuza na u ku kenuku mu mini a kayinva ka na ki na ɗe a̱ utsutsu u likuci i Batalami.>> 16 Ɗa osoji a utsura uma a tatsu aza a na a fuɗai kuvon ka a uwai punu asuvu a̱ ka̱tsura̱ ko osoji a aza a Filisitiya. E keneki mini a kayinva ka na ki a̱ utsutsu u likuci wa. Ɗa a̱ tuka̱i Dawuda, ama ɗa u iwain kusoꞋo. Ɗa u kucikpa u va̱ma̱i maꞋa a iɗika tsa alyuka u Vuzavaguɗu. 17 Ɗa u danai, <<Vuzavaguɗu u jebeshe ke mu n soꞋo mini ma nanlo. Wi ta̱ o kokpo mu uteku tsu mpasa ma aza a na e nekei wuma u le adama a na e kenuku mini ma.>>Adama nannai, ɗa Dawuda u iwain kusoꞋo maꞋa.

Na lo ɗa ili i na osoji a tatsu a na a laꞋi n kufuɗa kuvon a yaꞋin.

18 Abishayi toku vu Jowabu maku ma Zeruya a̱yi ɗa vuza kelime vo osoji a tatsu a na a laꞋi n kufuɗa kuvon ka, u ɗikai masara ma̱ ni ɗa wu unai osoji amangatawantatsu (300). Ɗa u yaꞋin kula a̱ ka̱tsuma̱ ko osoji. 19 Ɗa u ciya̱i tsugbayin u laꞋi kamangankupa va. Ɗa wo okpoi vuza kelime vu le, ko n tsu nannai u yawa aza a tatsu a nan ɗe a ba.

20 Benaya maku ma Jehoyida, vuma ɗa vuza a na u fuɗai kuvon vuza vu Kabuzeyelu, u yaꞋan ta̱ ili mereve. Wu una ta̱ aza a utsura a Mowabu e re aza a na tsu yaꞋan kuvon tsu kawu. Kanna ke te a ayin a uta̱ni ka̱u, ɗa u banai wu unai kawu a kaɓatsu. 21 Ɗa kpamu wu unai vuza va aza a Masar vu gbangam. Vuza na wi uka̱ni m masara e kukiye ku ni. Ama a̱yi Benaya wi ta̱ uka̱ni n kalangu, ɗa wi isai masara ma na mi e kukiye ku vuza va aza a Masar va, ɗa wu unai ni m maꞋa. 22 Ili i nanlo i ɗa Benaya maku ma Jehoyida u yaꞋin ali ɗa u yaꞋin kula uteku tsu osoji a utsura a tatsu a nanlo a. 23 Ɗa u ciya̱i tsugbayin u laꞋi uma kamangankupa a nanlo a, ama u yawa osoji a tatsu a nanlo ba. Ɗa Dawuda u zuwai ni wo okpo vuza kelime vo osoji aza a kindi a̱ ni. 24 Ele na va i ta̱ punu a̱ ka̱tsuma̱ ko osoji kamangankupa a Dawuda aza a na a fuɗai kuvon.

Asahelu toku vu Jowabu,

Elihana maku ma Dodayi vuza vu Batalami.

25 Shama n Elika aza a Harodu,

26 Helezu vuza vu Paliti,

Ira maku ma Ikesha vuza vu Tekowa,

27 Abiyeza vuza vu Anatotu,

Mebuna vuza vu Husha,

28 Zalimonu vuza vu Ahohi,

Mahara vuza vu Netofa,

29 Helebu maku ma BaꞋana vuza vu Netofa,

Itayi maku ma Rabai vuza vu Gibeya vu uɓon u kumaci ku Bayami,

30 Benaya vuza vu Piraton

Hidayi vuza vu a̱ra̱Ꞌa̱ a na i ɗevu n Gashi,

31 Abi-albonu vuza vu Araba,

Azamavetu vuza vu Bahurim,

32 Eliyabu vuza vu ShaꞋalbonu,

muku n Jashen,

33 Janata maku ma Shama vuza vu Harara,

Ahiyam maku ma Shara vuza vu Harara,

34 Elifeletu maku ma Ahasaba vuza vu Makatu,

Eliyamu maku ma Ahitofelu vuza vu Gilo,

35 Heziro vuza vu Kamelu,

Para vuza vu Araba,

36 Igalu maku ma Natan vuza vu Zoba,

Bani vuza vu Gatu,

37 Zeleku vuza vu Amona,

Naharayi vuza vu Beyerotu,

vuza na u tsu ɗikaka Jowabu maku ma Zeruya ucanuku u kuvon,

38 Ira n Garebu uma Itiriti,

39 Uriya vuza vu Hitiya.

Na va ele ɗa osoji kamangankupa n e cindere a na a laꞋi n kufuɗa kuvon.

<- 2 SAMAILA 22 2 SAMAILA 24 ->