MATEO 4

Samaruhua jiyaniijia saniniujiushacari Jesu

(Mr 1.12-13; Lc 4.1-13)

1 Na nuhuaji, Pueyaso Sohuanuuri Jesu jiyataquiaari cariiquia jiyajiniara, Sesaaca saniniujiushocoriquiano cuniqui.

2 Majaari quenaaja Jesu miaquenu quiquiaari. Cuarenta juuca, cuarenta niucua na shoconujuquiaari na miaqueyaquishacari. Na nuhuaji miaajequiaariiri. 3 Sesaacaari jiyacari nocua niquiaari na saniniujiuniuria. Jesu sequeseeri:

—Quiaa jaara seetanujuanaa Pueyaso Niyanu quiri, nio sai quia jataniri panra. Quiocua na sarohua.

4 Jesuuri saaja na riucuaree:

—Maja. Pueyaso Rupaajiniacuajaari naa naajiotasano quiyatej:

“Pueyanoori maja na naatanu saa miaquesanoocuaja. Seetanujuanaa saminio quiya cutaraari na tojishacari puetunu Pueyaso Rupaajanaa”.

5 Na nuhuaji, Sesaacaari Jesu jiyataquiaari Jerusalén tiacajinia. Na nujuatequiaari jiyocuacaanuuri, Pueyaso Secojojua tia cacojiria. 6 Na sequereeri:

—Quiaa jaara seetanujuanaa Pueyaso Niyanu quiri, niiquiji quia jaataare jiyocua. Pueyaso Rupaajiniacuajaari naa naajiotasano quiya:

“Pueyasoori na seya sequenutaniya na cojuanura quiajaniya. Nojoriiri quia quianutaniya, maja quenaaja saajiaacua quia jiriataaquiniuucuaji”.

7 Jesuuri na riucuaree:

—¡Maja! Pueyaso Rupaajinia, naa naajiotasanoori quiyajuhuaj:

“Maja quia saniniujiuniu quia Jiyaniijia Pueyaso”.

8 Na nuhuaji, Sesaacaari Jesu tacaniquiaari socua jiyanohua jiyaconaja tuhuananuucua. Cuniquiji na niquitirii puetunu jiya jiyaniijiacajanaari. Jiyanohua cumaacaraca quijiaca. Jiyanohua queraatia casamiriaca quijiacajuhuaj. Jiyanohua maninia niquishano. 9 Jesu sequereeri:

—Janiyacua quia jiyatere jiyaniijiajanaara nojori nitini, quiaa jaara cua cariquimiaji mojoquetare quia shuquiritianura janiya, quia jiyaniijia cua quiniuria.

10 Jesuuri na sequeree:

—¡Niiquiji quia quiaare Satanásnaa! Naa naajiotasano quiyacuajaari Pueyaso Rupaajinia:

“Saaja quia Jiyaniijia Pueyaso quia shuquiritiare cutara. Saaja nojuaja quia tojiri”.

11 Na nuhuaji, Sesaacaari na tarinitiaquiaari. Jiyacaritij, Pueyaso seyari Jesuucua niquiaari na mianuutenura.

Jesu coteesacari poonijionu Galilea jiyajinia

(Mr 1.14-15; Lc 4.14-15)

12 Jesu niishishacari Tiuquinijiona Juan nujuatesaarucuaa nujuatejojuajinia, nojuajaari Galilea jiyajinia quiaquiaariuhua. 13 Jesuuri Nazaret tiacajiniji pacuquiaari Capernaum tiacajinia na quiniuria, caminia shuriucua. Cuno jiya quiquiaari Zabulón niquiohuacuajinio supueno pueya jiya, Neftalí niquiohuacuajinio supueno pueya jiyanio. Zabulón, Neftalínio, nojoriiri supuetana Jacobo niquiohua quiquiaari. 14 Jesu quishacari cuno jiyajinia, naa tohuateequiaariiri taa tariucuacaanu Pueyaso sequesano caminiujiunia Isaías pohuataquiaari cuno jiyajinijicuajani. Nojuajaari naa pohuataquiaari Pueyaso niishitiosano nojuaja taa na nuhuaji na sequesano tohuateenutaniyani:

15 “Zabulón pueya jiya, Neftalí pueya jiyanio, cunoori caminia shuriuquiumia neteja nucuama quiya, mariyata Jordán moo tamajiria. Cunoori mariyata Galilea jiya, tee taucuaca quiyacuajani. 16 Cuno jiyajinia quiniaari ninishiqui quijiaca quiquiaari. Quiarijia saniniuujia, nojoriiri jiuujia Cuhuatana niquiriucuaa. Nojoriiri cusonu pueretujuaca quiquiaari tarijia. Quiarijia cutara nojoriiri cuhuatasaaree nojori puereyaquiniuucuaji”.

17 Jiyacaritij, Jesuuri Pueyaso rupaa pohuatanu coteequiaari. Naa sequequiaariiri:

—Nioojia nia tacatore sesa nia miiniujiniji. Pueyasoori nia paniya na pueya nia quiniuria.

Jesu saquiriojosacari sapitiaaja ritianaa

(Mr 1.16-20; Lc 5.1-11)

18 Jesuuri Galilea caminia shuriuquioco rucuanejoriquiaa. Jiyacaritij, Pedro niquiriiri, tarajanu Andrésnio. Pedro sesa quiquiaarijiuhuaj Simón. Nojoriiri sapitiaaja ritianaa quiquiaari shiyaruta. Nojoriiri jiyacari shiyaru jaquerootariquiaa. 19 Jesuuri nojori sequeree:

—¡Miji! Cua tarajare. Cua pueyara nia quiri. Janiyacua nia jiyatere pueya quioojuara saniniunijia, juhua sapitiaaja quioonaa.

20 Nojoriiri na shiyaru tiujiaquiaari ritia. Jesuta quiojiyareeri.

21 Jesuuri shiitianiyojua socua rucuanequiaari na tacoji. Socua caapiqui pueya riuriataseeri. Nojoriiri quiquiaari Santiago, tarajanu Juannio. Cuno pojori queeri quiquiaari Zebedeo. Nojoriiri na queta quiriquiaa botejinia. Na shiyaru cushipirijionuuriquiaari. Jesuuri Santiago sequeree Juannio, na pueyara nojori quiniuriajuhuaj. 22 Nojoriiri ritia bote tiujiaquiaari na queta, Jesuta na quiojonura.

Jesu niishitiojosacari queraatia pueya

(Lc 6.17-19)

23 Jesuuri puetunu Galilea jiyajiniajanaa rucuanejoquiaari na saquiriojosano pueyata. Pueyaso secojojua tiacajiniaqueya niishitiojoriquiaari. Pueyaso rupaa pohuatariquiaari taa Pueyaso jiitianu paniya maninia na pueyani. Puetunu tamaatia cusonuunu jiitiacojuajanaa naatanijioquiaariiri. Puetunu nootunejaca pueyajanaa shaataquiaarijiaariuhuaj. 24 Naa maninia na miishanoori poojotasaaquiaari puetunu Siria jiyajiniajanaa. Naaratej, pueyari Jesuucua patootaquiaari puetunu cusosuhuajanaa, puetunu tamaatia cusonu jiitiajacajanaanio, cumatacuruhuana cusosuhuajuhuaj, nootunejacanio. Nocua jiyatasaaquiaarijiuhuaj samaruhuaraca quijiaca, canashiyaquiji cusojonuujuacanio. Jesuuri nojori naatanijioquiaari puetunujuanaa. 25 Jiyanohua queraatia pueyari Jesu nuhuajiquiaari Galilea jiyajiniji, Decápolis tiacajinijinio. Na nuhuajiquiaarijiuhua Jerusalén tiacajinijinio, Judea jiyajinijiniojuhuaj, mariyata Jordán moo taquijiria jiyajinijinionio.

<- MATEO 3 MATEO 5 ->