ASUDAK PAS POL NENEKAS UMU ECHECH KOLOSI ULI

Banenyi balan umu enyudak balan Pol neneken nyanamu echech Kolosi uli

1:1-4 Pol nenek tenkyumu God umu echech Kolosi ali nenek beten umu God nunekech chiyotu dodogowich

1:5–2:19 Krais atunu dodogowinali nape nalik umu wolobaichi enechi enech echudak chanu elpech. Namudak ali nameitu anan atunu nape nalik umu chanatimaguk God ananich elpech

2:20–4:6 Apak manu Krais magak ali wata chopuk mananu maitaki ali nameitu munek yopinyi atin pasin

4:7-18 Pol naklipech nyatuh uli balan ali nenek gudemu echech Kolosi

1:5–2:19 Krais atunu dodogowinali nape nalik umu wolobaichi enechi enech echudak chanu elpech. Namudak ali nameitu anan atunu nape nalik umu chanatimaguk God ananich elpech

2:20–4:6 Apak manu Krais magak ali wata chopuk mananu maitaki ali nameitu munek yopinyi atin pasin

4:7-18 Pol naklipech nyatuh uli balan ali nenek gudemu echech Kolosi

1-2 O ipak pagipech Krais uli douk pape wabul Kolosi ali pasuh God ananin balan dadag pagipechen uli. Yek Pol, Krais Jisas ananiwe aposel douk God yet natalihemu inek ananin moul umu inak iklipech ananin balan uli yenekumepagu asudak pas ipak. Yek yenekasumagu ipak God ananipu atipu elpech douk dodogowipu atipamu pasuh Jisas Krais ananin balan pagipechen uli. Ali apakinu owaninu Timoti chopuk douk nane wape agundak. Ali ohwak wakli apakinu Aninu God nugakomepu meyoh ali ipakiluh apaluh hlulu kalbu.

3 Wihlu wehlu ohwak wonek beten umu ipak umu, ohwak isave wonek tenkyumu apakinu Diginali Jisas Krais ananinu Aninu God umu ipak. 4 Umu moneken, ohwak awomnek balan umu agundak ipak pasuh Krais Jisas ananin balan pagipechen ali ipak ulkwip panosuh chanatimaguk God ananich elpech umu. 5 Likuk enyudak adulin atinyi balan nyanaki nyatoglomepu ali ipak apemneken. Ali ipak pakli aduligu atugamu kwali ipak eke pupe kalbu eheh nyumneh gani iluh heven umu. Ali ipak douk pape pobeyagunmu agundak eke kwali punak pupe kalbamu. Douk namudak ali ipak pakli Krais Jisas ananin balan douk adulin ali pagipechen ali ipak ulkwip panosuh God nanu kipaichi elpech chopuk. 6 God ananin yopinyi balan douk nyalahe gnanatimaguk apudak atap. Ali enyen nyatoglu dodogowin atin ali nyenek yopinyi pasin umu wolobaichi elpech echechiluh apaluh. Ali enyen nyanubu nyenek yopinyi nyechalakuk likuk nyalik nyape nyeneken umu. Enyen nyeneken namudak ati kobi douk ahabuk susubeih nyumnah enyen nyeneken umu ipak umu. Ahabuk nyumnah ipak pemnek God ananin yopinyi balan ali panubu padukemech umu adul umu God nagakomapu meyoh umu. 7 Epafras douk anenek skulumepu naklipepu enyudak balan ali ipak apadukemen. Anan douk nanubu yopuyopunali ali nanu ohwak monechlepu mape monek Krais ananin moul. Ali ohwak douk ulkwip panohwanu. Ali anan isave neneken kalbu Krais ananin moul. Ali douk ohwak wakli wunaku wakuli anan nalau ohwakik outuk ali nanaku nagakomepu. 8 Ali chopuk, anan naklipohwamu agundak God ananin Michin nyepahul nyenekepu ali ipak ulkwip panosuh chanatimaguk God ananich elpech umu.

9 Ohwak douk womnek umu enyudak yopinyi moul douk God neneken numun ipakiluh apaluh uli ali dakio hanubu ahabuk nyumnah ohwak wape wonek betenumepu. Ali nameitu chopuk watak wape wonek betenumepu ati. Ohwak wonek beten wasolik God umu nunekepu punubu pudukemu enyebuk pasin douk anan oub baitakumen uli. Ali nunekepu punubu pudukemu nyunatimaguk yopinyi tinytin uli save douk God ananin Michin nyakepeyen uli. 10 Ohwak wonek betenumepu namudak umu wakli ipak pugipech enenyi enen yopinyi pasin douk Diginali oub baitakumen uli. Umu anan nutulipu ali nunehilaumepu. Ali ipak punek namudak ali eke punek nyunatimaguk ananin yopinyi moul. Ali chopuk, eke punubu pudukemu God pichalakuk likuk palik padukemanamu. Ali enyudak save umu pudukemu God umu eke nyutoglu nebenyi. 11-12 Ali ohwak wonek betenumepu namudak chopuk umu wakli God nukepu ananin nyanubu yopiyopinyi nebenyi strong. Anan nukepeyen umu nunekepu putoglu dodogowipu umu piyotu dadag ababuk nyultab enenyi enen hevi nyutoglo-mepamu. Ali umu ipakiluh apaluh kobi yoweluh ali hlulu kalbu. Ali ipak eke punek tenkyumu apakinu Aninu umu nenekepu patoglu yopipu ali panokwnumu pulau enechi enech ipakich yopichi echudak douk God nechubuk-umepaluli. Ipak eke pulawech punu chunatimaguk ananich elpech agnabuk douk chape yopugunmu chenek yopinyi atin pasin uli chapemu. 13 God douk anakwachihapu matukemaguk enyudak nebenyi strong douk nyape yomotokweh-igunmu echech Satan ananich elpech chapemu. Ali nalawapu mape kalbu manak mawich umu ananinu nuganinu douk anan ulkum manubu manohwanaluli ananip awilop. 14 Ali nameitu apak mape monek pas Krais ali anan nakwachihapu mape fri umu agundak anan wo nunohwen umu apakin yowenyi ali nokwleyenyuk umu.

15 Krais douk nanubu naduk anudak God douk apak wo mutulunu atili e. Anan douk nape Diginali ali nanubu bawagas umu chanatimaguk enechi enech echudak chanu elpech douk chape iluh atap uli. 16 Umu moneken, God naklipanu nenek chanatimaguk enechi enech echudak chape iluh atap uli chanu elpech chatoglu chape. Anan nenek chanatimaguk echudak douk apak matulich uli chanu echebuk douk wo mutulich apakis nabes uli e. Echech chanu chanatimaguk dodogowichi enselahas douk chenek bosumu iluh atap uli. Ali God naklipu Krais nenek chanatimaguk enechi enech echudak chape iluh atap uli chanu chanatimaguk elpech. Anan nenekech umu chupe ananich atich ali chutuk ananin atin yeul nyukih. 17 Seiwak bawagas umu, anan atunu nalik nape. Ali chanatimaguk enechi enech echudak chanu elpech douk chape iluh atap uli chagikuk chatoglu chape. Ali anan douk nanubu anan atunu dodogowinali ali nasuh chanatimaguk echudak chape echechiyu outib silisili kobi douk nameitu chapemu. Ali elpech chopuk, nameitu anan nahwech nape. 18 Anan douk God ananich elpech echechinu balageinu. Ali echech chape kobi ananich loguh aias umu. Ali anan atunu douk bawagas umu nugakomu ananich elpech chutoglu nupoleich ali chupe kalbamu. Anan douk nanubu susubeinu diginalimu agundak chagak uli elpech wata chaitaki iwagas umu. God douk nanahuli naitaki iwagamu anan atunu nutoglu diginali nunek bosumu chunatimaguk enechi enech echudak chunu elpech chopuk. 19 Umu moneken, likuk God oub baitak umu nakli nukanu nyunatimaguk ananin pasin nyunu tinytin uli save nyunu ananin strong ananinu Nuganinu atunu. Douk namudak ali God anakanu chanatimaguk echudak anan atunu. 20 Ali God douk oub baitak umu nakli Krais nunek chunatimaguk enechi enech echudak douk chape iluh atap uli chunu chunatimaguk elpech chutoglu yopich ali nunalawech chutanamu chupe ananich. God douk nenek namudak umu Krais ananig butog douk chanu nagak neil lowag kruse ali gwotukwle uli. Anan nenek namudak ali nalau chanatimaguk echudak chape iluh atap uli chatanamu chape ananich atich.

21 Likuk ipak chopuk pape lougun umu God ali pape ananipu birua. Umu moneken, ipakip ulkwip pakli wakanu ali ipak penek yowenyi. 22 Wakuli nameitu Krais nalau elpenyihw yegenyihw ali chanu nagak. Ali God nanalawepu patanamu pape ananipamu agundak Krais nagak umu. Umu anan nunalawepu punak umu anan napemu ali pupe duldulipali elpech. Ali anan kobi nutik enen balan nyupenyipu, wak. 23 Wakuli wihlu wehlu ipak imas pupemu pusuh enyudak ananin yopinyi balan dadag ali punubu piyotu dodogowipu atipu. Ipak kobi pukwutuk enech echudak chunekepu putukemaguk enyudak yopinyi balan douk seiwak ipak pemneken pahwen dadag pagipechen uli, wak. Ali kobi putukemaguk agundak umu pakli aduligu atugamu eke God nunek lukautumepu kalbamu, wak. Ipak douk apemneken enyudak balan douk yek Pol yape yenek God ananin moul yaklipechen uli. Ali chopuk, enyudak balan douk chaklipechen chanak ali chanatimaguk elpech chape apudak atap uli douk achemneken.

24 Ali nameitu yek yenehilaumu agundak yemnek nyih yekihw yegenyihw umu yagakomu ipak umu. Ehudak nyih nameitu yape yemnekeh yekihw yegenyihw uli douk yakli iyatak ehudak nyih douk Krais naklimu yek imnekeh uli. Yek yenek namudak umu inek ananin moul umu igakomu ipak punu God ananich elpech. Ipak panatimaguk douk pape kobi Krais ananich loguh aias ulimu. 25 Yek God ananatalihemu inek enyudak moul umu igakamu ipak God ananipu elpech umu iklipepu bawogenyumu nyunatimaguk ananin yopinyi balan. 26 Seiwak aliga nameitu, enyudak balan nyonobechuk nyapemu chanatimaguk seiwakichi apakich popech yamech. Wakuli nameitu God neneken nyatoglu yopugunmu ali ananipu elpech padukemen. 27 God ananim ulkum douk molomu nakli nunek namudak. Anan nakli nugilapu apak ananipu elpech enyudak balan douk likuk nyonobechuk nyape uli. Enyudak balan enyen douk nyanubu duldulin yopiyopinyi ali yeul nyakihen. God douk nakli enyen nyutoglu yopugunmomu nyugakomu bunatimaguk lainab elpech. Balan douk enyudak. Krais nape numun ipakiluh apaluh. Ali bawogen umu enyudak balan nyakli namudak. Aduligu atugu, God eke nunekepu punubu putoglu duldulipali yopiyopipali kobi douk anan yet nanubu duldulinu yopuyopu-nalimu. 28 Douk namudak ali apak maklipech Krais ananin yopinyi balan chanatimaguk elpech. Apak malau wolobainyi save ali monek skulumech umu enyudak balan umu chudukemen ali chulau enenyi enen yopinyi tinytin uli save. Apak maklipech kalbu umu chukenyuk agabus yowenyi echech chape cheneken uli. Ali umu makli mulau chunatimaguk elpech atin ati douk chenek pas Krais uli chunamu God ali chupe dodogowich umu anan ali chunubu chutoglu ananich atich elpech kobi anan naklimu. 29 Douk namudak ali nameitu yek yape yenek moul umu igakomu elpech chutoglu kobi douk Krais umu, yek yeneken dodogowiwe atuwe. Yek douk anan neke ananin strong neneke dodogowiwe ali dakio yenek enyudak moul dodogowiwe atuwe.

KOLOSI 2 ->