Jon ?A tei ni e uusue uusu-uusu ienini? Uusu-uusu ienini kire saie uri a Jon Hurula'aa ni e uusue aena aana hungelana mo wala na mo ha'ananaunge kire sada mola pe'ie Tataroha Diana a Jon. ?E uusue uusu-uusu ienini hunie kira tei? Maholo a Jon Hurula'aa e repo oto, nge e uusue uusu-uusu ienini hunie a Kaeas, ngaeta malahune diana. A Kaeas e ii'o kara'inie soihaada'inge aana ngaeta hanue nge ko aehota lae takalo aena aana ngaeta mwane too-tooha'i ko ta'ela'i lo'u i matolada hunie ke paine haahie soihaada'inge ngeena. ?Nga taa e rau-reu maholo e uusue uusu-uusu ienini? A Jon Hurula'aa e uusunge'inie ka'u ngaeta mo mwane pe'ie mei wala hunie nga soihaada'inge, ta'e na'ohai mwane aana soihaada'inge satana a Daeotrepis e ka'a sare rongo ike hunire wa ke toli'aasie nga iini ke pe'ire. ?E uusue uusu-uusu ienini huni taa? A Jon Hurula'aa e uusu-uusu hunie a Kaeas huni hatonga'i hunie uri kire ke pe'ie mo ha'a-uusuli ko eelide pe'i taroha'inilana walaimolinge, na mwaanie kire rongo hunie mo tolahai ola takalo a Daeotrepis. Oto Ruana na Oolune Nga Uusu-uusu a Jon kire dau i sulie e ro aapa aana ta'a-ta'a mei ne'isaenga ngeena. Ruana nga Jon e ha'a-uusulikie mwaanie uri kie uure pe'ie mo ha'a-uusuli eero-eero, na Oolune nga Jon e ha'a-uusulikie huni uure pe'ie mo tohungei ha'a-uusuli aana walaimolinge. Aena urine, nge leu i sapeka hunie kie ke haitalea saenanaunge aana walaimolinge hunie uri kie ke lio saie mo ha'a-uusuli hai aaopa'i, hunie kie ke lio saie mo ha'a-uusuli diana hunie kie ke pe'ire, na hunie kie lio saie mo ha'a-uusuli eero-eero hunie kie ke aatopuri mola aada. ?Nga taa ni mo pweu ni wala i laona uusu-uusu ienini? walaimolinge, manata-diananga, ha'a-uusulinge to'ohuu, pe'inge ?Nga taa ni ngaeta mo eehu'i tatala i laona uusu-uusu ienini? ?Nga taa ni mo eehu'i ne'isaenga i laona uusu-uusu ienini? Mei wala ni saediananga hunie a Kaeas (1:1-4) Kie ke ii'o aana manata-diananga, na kie ke pe'ie mo ha'a-uusuli to'ohuu. (1:5-11) Mei wala ni saediananga ooreta (1:12-15)
1Mei Wala Ni Saediananga Hunie A Kaeas 1 Saediananga mwaanieu Rato ni mwane aana soihaada'inge, huni'o Kaeas. Nou tohungei manata diana huni'o, malahuku diana ineu, 2 na aarenga'inge ineu talamu, uri hunie ahutana walu ola ke mwada'usi'o na o ke ii'o-ii'o awaa mola, oto mala nou saie uri ii'onga i'oe pe'ie a God e a'aila'a. 3 Nou tohungei ilenimwa'e aana maholo ngaeta mo mwaasine e hule mai na kire ha'arongoau aana mauringe i'oe e tohungei a'aila'a na uri o ko lulu i sulie ue walaimolinge to'ohuu. 4 Nga mei ola aaopa hunie ne ke ilenimwa'e liutaa haahie ha'ike lo'u, ta'e mwaanie no ko rongoa mo kaleku ko lulu i sulie walaimolinge. Kie Ke Pe'ie Mo Ha'a-uusuli To'ohuu 5-6 Nou saie, malahuku, uri o ka'a sai mou-mou ike mwaanie tohungei esunge diana nana God, aana kira hiiwalaimoli nge kire ko liu weu i seemu, kire ko ha'a-ha'arongoa oto soihaada'inge mai leu aana manata-diananga i'oe hunire. Suli maholo kire ko unue uri o ko tohungei lio i suli diana aada, na o sai pe'ire lo'u aana nga mo ola huni ha'amwada'ue mo laenga ikire. Ma'alana o ka'a manata'inie ike ngaeta mo iini kire hule aamu ngeena, ta'e o tohungei pe'i diana aada aana tolahai ola diana nge e malisine mo koni-konihe a God. 7 E diana aana o ko pe'ire urine aena aana maholo kire aehota pe'ie mei esunge ienini huni taroha'inie a Jisas Kraes, kire oala'inie uri kire sa'a toolea ike nga mei niinge mwaanie mo iini kire ka'a hiiwalaimoli ike aana a Jisas. 8 Oto ikie, mo iini kie ko hiiwalaimoli aana a Jisas, leu i sapeka oto hunie kie ke pe'ie mo mwane urine, uri hunie kie ke mani esu tararuru pe'ire, hunie mwala hunge ke manata'inie walaimolinge.9 Nou uusu-uusu ke'u hunie soihaada'inge i sulie leune, ta'e a Daeotrepis, iini nge ko sare ne'i na'ohai mwane aana soihaada'inge, e ka'a sare rongo ike hunie nga taa nou unue. 10 Oto mala uri no ko lae wau, ne ke si haata'inie taane aamiu ahutana walu ola aaela nge ko esui'i, na mo eeronga ta'ewau nge ko talei unu'i mola i suli'emeelu. Na aena aana mo aaelanga ngeena kire ka'a paine ue i sulie saena, nge ko sare asuie lo'u nga mo aaelanga paine. Oto e ka'a sare tola konie ike mo mwaasine, na hule aana ko uure honosie mo iini ko sare tola konie mo mwaasine ngeena, na ko ne'ire i sinaha mwaanie soihaada'inge.
11 Oto o ke su'uri heimaanie mo tolahai iinoni aaela urine, malahuku, ta'e o ke lae mola i sulie tolahai iinoni diana. Aana iini nge ko lae i sulie tolahai iinoni diana, nge ingeie iinoni a God otona. Ta'e iini nge ko lae i sulie tolahai iinoni aaela, nge e ka'a manata'inie ike a God.
12 Oto o ke pe'ie a Demitrias maholo kei hule wau i seemiu, aana ahutana mwala ko meni unue uri ingeie mwane diana, na walu ola ko esui'i e oodota'i na ko haata'inie uri e to'ohuu oto. Ineu na nou unue no'one urine, na i'oe, o saie mola no ko ere to'ohuu.
Mei Wala Ni Saediananga Ooreta 13 Mo ola hunge nou sare unu'i taane huni'o, ta'e nou ka'a sare uusu'i ike, 14 aana nou noruto'o mola uri kara'inie oto ne kei leesi'o, na maholona kure ke si meni ere-ere lo'u.15 Hanuelamanga ke ii'o pe'i'o. Mo malahukarue mai i leu kire ko niie saediananga ikire huni'o, na saeku uri o ke niie no'one ilenimwa'enga na saediananga ineu hunie ahutana mo malahukaelu nge kire ii'o wau pe'i'omu.
9 Nou uusu-uusu ke'u hunie soihaada'inge i sulie leune, ta'e a Daeotrepis, iini nge ko sare ne'i na'ohai mwane aana soihaada'inge, e ka'a sare rongo ike hunie nga taa nou unue. 10 Oto mala uri no ko lae wau, ne ke si haata'inie taane aamiu ahutana walu ola aaela nge ko esui'i, na mo eeronga ta'ewau nge ko talei unu'i mola i suli'emeelu. Na aena aana mo aaelanga ngeena kire ka'a paine ue i sulie saena, nge ko sare asuie lo'u nga mo aaelanga paine. Oto e ka'a sare tola konie ike mo mwaasine, na hule aana ko uure honosie mo iini ko sare tola konie mo mwaasine ngeena, na ko ne'ire i sinaha mwaanie soihaada'inge.
11 Oto o ke su'uri heimaanie mo tolahai iinoni aaela urine, malahuku, ta'e o ke lae mola i sulie tolahai iinoni diana. Aana iini nge ko lae i sulie tolahai iinoni diana, nge ingeie iinoni a God otona. Ta'e iini nge ko lae i sulie tolahai iinoni aaela, nge e ka'a manata'inie ike a God.
12 Oto o ke pe'ie a Demitrias maholo kei hule wau i seemiu, aana ahutana mwala ko meni unue uri ingeie mwane diana, na walu ola ko esui'i e oodota'i na ko haata'inie uri e to'ohuu oto. Ineu na nou unue no'one urine, na i'oe, o saie mola no ko ere to'ohuu.
15 Hanuelamanga ke ii'o pe'i'o. Mo malahukarue mai i leu kire ko niie saediananga ikire huni'o, na saeku uri o ke niie no'one ilenimwa'enga na saediananga ineu hunie ahutana mo malahukaelu nge kire ii'o wau pe'i'omu.