PHILEMON

1 O asëꞌe Philemon nosi aemoꞌaeme noꞌo bimuvoromo mu vaejanue aho na Iesu Keriso-are jöëni savoji gagore hijaje aho Paul naꞌo nosi öe Timothyꞌo noro niöꞌiro jasi örire jejamijö.

2 O Apphia nosi maꞌinoho o noꞌo gemu mae Satanꞌo muorovaje aho Archippus o Philemon jasi osare gagovarue ekaresia aribövioho ëhuꞌo jejëmijö.

3 Na nege God nosi Vavuohuꞌo Bada Iesu Kerisoꞌo huë baeromo ajëmijego maro raromoꞌirarijego.

4 Philemon Paul naehu God-are örire jö jövëꞌiroho naro jasi jöhuꞌo jövoromo nasi God hesi örire huë mae uavajeje. 5 Ëhesi bëhoho naro hejajeje aëro jasi jöho atoromo uvoruomego: Jero God-are aribövioho ahoꞌobëhe huë baejëvoromo Bada Iesuare örire mae uehorovanue höjo. Ëhi heromo ëhuni God mae uaromo 6 ëninamiromo uavajeje: God jero ajaminego Philemon noꞌo gemuore mae uehorovavajohuro ëhuro hesi simanoho jiororovoromo Kerisohu bojamuijaje huë maho bövioho biseꞌoho ga avohoꞌirajo. 7 Öho jaehu God-are aribövie ahoꞌobëhe huë baejëvanohuro ëhuro jabesi dë vövöbajoꞌoho sanuovëhëꞌe jave. Ëhuro na dë mae jevego nimoroho avohajeje.

8 Ja ëhi jiëꞌe huë baejëꞌe ae javëꞌego ëhuni ave jöho uaꞌiëꞌe. Na negoꞌibejo na Keriso-are ihore darugoꞌe jöho bojamiromo uaꞌibejo: Jasi muoho vaejëjo. 9 Röhu bogo ëhioho ëꞌejo. Aꞌi ja huë baejëꞌe ae javëꞌego ëhuni naehu nimaje jöho ma-sanuꞌe majahiꞌejo. Paul na Iesu Keriso-are jö majëhijaje ae jevoꞌi aviavejöꞌe na hesi jöëni savoji gagore hijaje aëro jevëꞌëro 10 ëhuni naehu huë baejaje harihu hesi jöëni naro jasi örire ave jöho uave. Naro savoji gagore hiromo ajamamu huro Keriso baejadeje. Ëhuro hu nasi harihe jianove. Na Onesimus-are jöho uave. 11 Onesimus-are iho hesi bëhoho ajamuijaje ahoje. Röhu hu urimo jaꞌo hiromo jasi muemu vaejahadevaroho evaroho jasi öriroho bogo avoꞌavoho ajaminövadeje. Röhu avevejöꞌoho Keriso baejëꞌëro jaꞌo naꞌo ajamuijaje aeje.

12 Iae na nugöꞌöꞌirögoro ëꞌe vuonoröꞌö öꞌoromo jasi muemu vaejahoꞌiröhego. Röhu hu öꞌiramu nasi dë vövöbajoꞌe ahoꞌo huꞌo jioꞌëꞌe. 13 Naro Onesimus maꞌenoꞌibejo ëhuro iae na mae jevoꞌibejo. Keriso-are jö ma hesi jöëni na savoji gagore hijego Onesimus-ro naꞌo gemu mae hiromo jaꞌo röromo ajemiꞌiröhego ëhuni maꞌenoꞌibejodoho röhu bogo maꞌenoꞌejo. 14 Ja bogo uevëꞌe naehu Onesimus ëma maꞌenëꞌoho na bijönege hu jasi muemu vaejahaje aego. Ëhesi bëhoho Onesimus-ro jaꞌo röromo ajemiꞌiröhego naremuëremu nimoromo hu maꞌenëꞌoho sisë jioꞌi aꞌi jaehu nimoromo Onesimus-hu na ajemijöro uavëꞌoho iae maeje. Röhu jasi jöho bogo baejëꞌëro jevëꞌëro ëhuni na bogo maꞌenoꞌi jani nugöꞌöꞌejo.

15 Onesimus jaꞌoho bogo hiꞌi diröꞌo göro majae ma-bisemu hijadeje. Ëhesi bëhoho nani hu vuonoröꞌö öꞌego jero ma-ioroꞌioremu baeꞌiranego. 16 Avevejöꞌoho hu bogo ma-jasi muemu vaejahaje aho jioꞌi aꞌi jasi huë baejanue ö maeje. Iae na hesi örire börömo bëhe uehorovajeje. Röhu jero na iosiremiromo börömo mae hu uehorovo avohoꞌanue ë hesi bëhoho hu jasi mu vaejahaje ae jioromo jaꞌo huꞌo Badare ae gemuoho jëvëꞌego.

17 Ëhuni jaehu uvëꞌoho: Paul Philemon naꞌo havaje ae hö uvëꞌoho ëhuro jaehu na rajehiromo baejevoꞌibejanëhi Onesimus öꞌego ëhi rajahiromo baene. 18 Huhu mamiꞌe mu sisë vaejavadoho o jasi mae sisëꞌe bojamiꞌiröhoho bogo bojamijadoho uevego naro huꞌo röromo jasi örire mana bojamiꞌiro. 19 Paul naro ave jöho nasi övëro jajivoromo uave: Iae naro manaho bojamiꞌejöjo. Röhu jaehu mana ajemiꞌirane jöho na bogo uaꞌejo. Ëhesi bëhoho naro ja ajamijamu jero Keriso baejëꞌëro ëhuꞌëro bogo sisëroho vaꞌi maro vaꞌo hesi jave. Röhu ë jöho bogo uaꞌejo. 20 Ioꞌo öho naehu nimaje jöho Badare jöëni ejehego mae jevoꞌi. Ejehoromo ëhuro Keriso-are ihoro nasi dë vövöbajoꞌoho sanuovehone.

21 Röhu na uehorovoromo uve: Naehu nimaje jöho ejehoꞌanuëromo ave surire jöho jajive. Iae na garomo uve: Naehu uavaje jöho jero eromo röhu göꞌo döre vae avohoꞌanuëjo. 22 Röhu naehu hiꞌirode röhohuꞌo avohehone. Ëhesi bëhoho na uehorovoromo uve: Jemëhu nasi jöëni ëninamijarujohuro ëhuro God-ro ajemiꞌiramu na savoji gagore jioromo höröromo jemesi örire öꞌejöjo.

23 Röhu Iesu Keriso-are jöëni naꞌo savoji gagore hijaje aho Epaphras-ro jasi örire jejamije. 24 O Mark Aristarchus Demas Luke ëhi naꞌo gemu mae Keriso-are mu vaejarue aribövioho jabuꞌo jasi örire jejamijö.

25 Bada Iesu Kerisoro jemesi aruꞌahohuꞌo jioromo huë baeromo ajëminövoꞌëꞌe. Ahia minoꞌe.