Basef Ifimba Buꞌwafi Jon Nandaꞌafi

Basef bandafi Joni

1:1-18 Jisas Krais agol waꞌagol Basef nataga epen

1:19-51 Jon nagapisiꞌas embeli nawalipa basefa Jisas nagafiꞌi. Eaꞌ Jisas naliꞌ nogofala alipumi ananimi biamibiam.

2:1-12:50 Jisas nawalipasa basef Godi nandaꞌ hiahaom banagami 7-pelaim siꞌi Ahamana God nandaꞌami

13:1-19:42 Jisas nafeꞌ Jerusalem nawalipasa basef buꞌwafi owaꞌ sandaꞌ kotimana sandolona lawag usiꞌigai tiꞌwanaegai ma nagagaꞌ

20:1-31 Jisas nosafel wapani nandawalapa alipisi ananisi

21:1-25 Jisas nafeꞌ Galili nandawalapa alipumi ananimi 7-pelaim

1 Fowaꞌ gani dambadamba anif Basef epen nape. Eaꞌ Basef epen anamba nape naloma God. Eaꞌ epen anamba agilinama Basef anen atona God.*Jo 17:5; 1 Jo 1:1-2; Re 19:13 2 Fowaꞌ dambadamba epen anamba agilinama Basef naloma God nape. *1 Ko 8:6; Kl 1:16-17; Hi 1:2 3 Anen nandaꞌ hiahaom hiami. Owaꞌ anin mae atitin netaga anoꞌw ufiaꞌwa, owaꞌatin. Hiahaom magatagai hiami anen atona nandaꞌam mataga. *Jo 5:26 4 Ambal namili lagapaunai lape epen anamba eaꞌ ambal alol logogalaꞌma esis epesi. *Jo 3:19 5 Mogogalaꞌi amamba mogogalaꞌma akuti. Eaꞌ akot ina taofana anen, owaꞌ atin endilisi. Anen nogogalaꞌma esis amam nematawa hiasii, anen eaꞌ nafiꞌi itap apaꞌe ma deiꞌ nogota ataꞌe.*Mt 3:1; Lu 1:13-17,76

6 Anona aman daiana nataga, agilinama Jon, God nasapaꞌana nagafiꞌii. 7 Anen nafiꞌi ma nogowalapa basef. Deiꞌ nawalapa basefa nogogalaꞌi anamba ma epes hiasi sogameꞌ basef ananifi sogahapifana. *Jo 1:20 8 Jon nawalapa basef ifimba naꞌi anen ina nagwapin inimba nigigalaꞌi, owaꞌ. Anen naliꞌ nafiꞌima nogawalapa basef alihifa nagwapin anamba endilisinai nogogalaꞌi.*Jo 8:12; 1 Jo 2:8

9 Nagwapin anamba nogogalaꞌ endilisii, anen nogogalaꞌma esis amam nematawa hiasii, eaꞌ nafiꞌi itap apaꞌe ma deiꞌ nogota ataꞌe. *Jo 1:3, 17:25 10 Fowaꞌ gani anen nandaꞌ itap apaꞌe pataga, deiꞌ nafiꞌi nape itap apaꞌe. Apaꞌ esis amam nematawa sagape itap apaꞌii ina sogawana, owaꞌ. 11 Anen nafiꞌi nataga kofagama itap luꞌupa esis Juda, owaꞌ esis miniꞌap ananisi ina sogawana saꞌi ahoꞌ sofaꞌana sahapifana, owaꞌatin. *Ga 3:26 12 Apaꞌ esis mamahisa sogawana siꞌi ahoꞌ sogahapifanai, nosoꞌasa anin ametala sogataga awasi Godi. *Jo 3:3-6; Je 1:18; 1 Pi 1:23 13 Esis ina sataga awasi Godi ma waf buꞌwafi mamasas sogolasi, owaꞌatin. Esis ina sataga awasi Godi siꞌi ukup mamasas paꞌi ma sogolas, owaꞌatin. God atona nandaꞌas sataga awasi ananisi.*Ais 60:1-2; Ga 4:4; Fl 2:7; Hi 2:14; Lu 9:32; Jo 2:11

14 Basef fataga epen eaꞌ nape laꞌafena afaꞌ, eaꞌ wati glori mogogalaꞌi banagami ananimi. Glori amamba mogogalaꞌi banagami nogamanai atom, ahamana nasapaꞌana nagafiꞌii. Anen natopalopapa dowaf nowaꞌ banagapa ma nigihimbaꞌmapa waf endilisifi fape siꞌifa anen.*Jo 1:27,30; Mt 3:11

15 Jon nawalapa basefa anen naꞌamba naꞌi, “Anen aman anamba fowaꞌ aꞌipipana agaꞌi. Aman nigiꞌma aeꞌ nogafiꞌii, anen nape nagaliꞌma aeꞌi. Anen fowaꞌinai nagapan naꞌambai, nape naliꞌma aeꞌ.”*Kl 2:10

16 Apaꞌ hiapai mofaꞌ hiahawes fasisi sagape siꞌisa anini. Waf afamba natopalopapa dowaf nogowaꞌ banagapa nandaꞌas sandape naꞌamba atin nimaguf hiafi. *Eks 34:28; Ro 6:14, 10:4 17 God nasoꞌana muꞌuli ananini Mosesa nagawalipapa. Apaꞌ Jisas Krais natopalopapa dowafa waf endilisifi. *Eks 33:20; Jo 6:46; 1 Ti 6:16; 1 Jo 4:12; Mt 11:27 18 Owaꞌ anona aman atotona niliꞌ niti God kwasakwasalaia, owaꞌatin endilisi. Nogamana anamba Godi atotona nape felefeleꞌ endilisi naloma anen ahamana eaꞌ nawalapa basef kofagefa ma apaꞌ nihimbaꞌmapa God.

Owaꞌ anen naꞌi, “Aeꞌ owaꞌ.”

Eaꞌ maꞌi, “Deiꞌ inaꞌ aman anamba profet apaꞌ mape mogohafanai?”

Owaꞌ nagwamama basef naꞌi, “Owaꞌ.”

22 Eaꞌ maꞌipana maꞌi, “Deiꞌ inaꞌ ami? Ama afaꞌ utanima ofeꞌ ugaꞌipa dembami masapaꞌafa wagafiꞌii. Inaꞌ naꞌi inaꞌ atina naꞌi basef maif, inaꞌ ami?”*Ais 40:3

23 Eaꞌ Jon nagwa basef siꞌi fowaꞌ profet Aisaia nagaꞌi naꞌi, “Aeꞌ anagol malogol dowaf goga gaꞌi anep itap fataupigima gagaꞌias naꞌamba gaꞌi, ‘Pendomba ufiaꞌw Dembinaii!’*Mt 21:25; Jo 1:33

24-25 Eaꞌ amom Farisi dembami Judai masapaꞌam mafiꞌi mogahaliꞌ anini mahaliꞌana maꞌi, “Inaꞌ Krais God nandandepena nasapaꞌena nagafiꞌii aꞌa, inaꞌ Elaija aꞌa, inaꞌ anona profet dembinai? Iꞌi inaꞌ owaꞌ Kraisa, a owaꞌ Ilaijaia, anona profeta, deiꞌ inaꞌ napisiꞌasa main?”

Jon nagwamam naꞌipam naꞌi, 26 “Aeꞌ agapisiꞌas embel atembeli, apaꞌ anona aman anamba nape laꞌafena ipaꞌ, ipaꞌ ina pegawana. *Jo 1:15; Ap 13:25 27 Aman anamba nagiꞌma aeꞌ nagafiꞌii. Aeꞌ ina amboꞌowe aꞌowaꞌ egatagwaha mandalefa su ananimi, owaꞌatin. Anen dembinai aꞌowaꞌ, nikilaꞌ aeꞌ.”*Mt 3:6; Jo 10:40

28 Basef ifimba fataga anambel wambel Betani walemb Jordan fisanamb, Jon nagapisiꞌ esis amam nematawama.*Ais 53:6-7; Jo 1:40; 1 Pi 1:18-19

29 Wafilu owaꞌ, Jon nati Jisas nafiꞌmai anen naꞌipas naꞌamba naꞌi, “Ipaꞌ piti aman anamba anen siꞌi mafin sipsip noganai Godi, anamba esis sandaꞌ ofa anai. Anen siꞌi sipsip nogakwaha waf awafi esis amam nematawa hiasi sagape itapi sandaꞌafi. *Jo 1:15 30 Anen maꞌuna apamba eaꞌ nafiꞌi. Anamba fowaꞌ aeꞌ aꞌipipa agaꞌi, ‘Anona aman nigiꞌma aeꞌ nogafiꞌii, anen nagaliꞌma aeꞌi. Anen aꞌ naliꞌ nape apaꞌ aeꞌ selai agiꞌ ataga.’ 31 Aeꞌ ina aꞌ egawa anen epen mamahonama, ataꞌ owaꞌatin. Aeꞌ afiꞌi apisiꞌipa embela egawalapa aman anamba dembinai ma apaꞌ amam nematawa Israel.”*Mt 3:16

32 Eaꞌ Jon nawalapa basef alihif naꞌi, “Aeꞌ eaꞌ ati Ambal buꞌunai Godi nakwaha heven nisilaꞌi siꞌi amil alamba apaꞌ magaꞌi maꞌunai nisilaꞌi eaꞌ nafeꞌ nape nomona anen. *Lu 3:2-3 33 Aeꞌ ina egawa anen, owaꞌ. Apaꞌ God nasapaꞌe afiꞌi ma igapisiꞌas embel eaꞌ naꞌipi naꞌi, ‘Inaꞌ niti Ambal buꞌunai Aeꞌanai nisilaꞌo ma nogapaunai aman anamba, eaꞌ maꞌuna eaꞌ aman anamba. Anen atiasi nogasoꞌas Ambal Aeꞌanai buꞌunai nogape opalef asasilifi nomoni.’*Mt 3:17, 17:5; Mt 27:54

34 Aeꞌ eaꞌ atolona endilisi awalapa basef alihifa anen aꞌif aꞌi, Anamba anen Nogamana Godi endilisi.”

35 Aꞌi owaꞌ wafilu Jon a nafeꞌ nalutu wapani naꞌamba eaꞌ alipumi ananimi biam malomana mape. *Jo 1:29 36 Eaꞌ nati Jisas nafoꞌo, naꞌipa alipumi ananimi nihimbaꞌmama Jisas naꞌi, “Piti, anen siꞌi sipsip noganai Godi.”

37 Eaꞌ alipumi ananimi mameꞌ naꞌipas naꞌamba, maila Jisas. 38 Jisas nandambema owaꞌ nati amom mailana naꞌipam naꞌi, “Ipaꞌ paꞌi pifiꞌi pelaoma main?”

Owaꞌ maꞌipana maꞌi, “Rabai, inaꞌ nagapoma ipat ati?” Agol agalemba “Rabai” apaꞌ mombomagol miꞌi, “Dembinai Tisa.”

39 Eaꞌ anen naꞌipam naꞌi, “Ipaꞌ fiꞌi ma ataꞌ petologon.”

Eaꞌ mafeꞌ ipat anen nagapautai. Nemaf afamba atef wambomota awin nandambema napani gani waꞌol 4 klok, eaꞌ malomana mapani. *Mt 4:18-20 40 Amom mameꞌ basef ifimba Jisasi Jon nagaꞌiefi mailana. Amom agufuma Andrui Saimon Pita, amom atom sahomana owamana. *1 Sml 2:10; Sam 2:2; Jo 4:25 41 Andru aꞌ ataꞌ usiꞌina notanima naliꞌ nafeꞌ nowandoꞌma Saimon, ama niꞌipana nigaꞌi, “Afaꞌ wati Dembinai Mesaia eaꞌ.”

Apaꞌ deiꞌ mambema agol agalemba Mesaia maꞌi Krais, God nandandepana nasapaꞌana nagafiꞌii.*Mt 16:18; Mk 3:16

42 Eaꞌ Andru naoꞌwa Saimon nafiꞌmai Jisas natolona naꞌi, “Inaꞌ Saimon nogama Joni. Anaf agol ineꞌigili aꞌ nendefala Sifas.”

Agol kofagogola agalemba “Pita” gaꞌi otam.*Mt 8:22; Mk 2:14

43 Wafilu wapani Jisas naꞌi nefeꞌ itap apamba luꞌupa Galili. Eaꞌ nowandoꞌma Filip natolona naꞌipana naꞌi, “Inaꞌ fiꞌi nigiꞌma basef aeꞌafi nila aeꞌ.”

44 Filip nafiꞌi wambel ambalemba atembel Pitai Andru magafiꞌima, Betsaida. *Diu 18:18; Ais 7:14, 9:6; Jer 23:5; Esi 34:23 45 Eaꞌ Filip nafeꞌ nolaoma Nataniel naꞌipana naꞌi, “Aman anamba fowaꞌ Moses nandaꞌ basefa muꞌuli God nagaꞌianai, eaꞌ amom profet wapani mandaꞌ basef magaꞌianai, aman anamba maꞌuna afaꞌ eaꞌ watolona. Anen aman Nasaretinai, Josep nogamana.”*Jo 7:41,52

46 Eaꞌ nahaliꞌ Filip naꞌi, “Deiꞌ anis hiahawes fasisi sataga safiꞌi Nasaret?”

Filip naꞌipana naꞌi, “Inaꞌ fiꞌi netelona.”

47 Eaꞌ Jisas nati Nataniel nafiꞌmai anen naꞌipana naꞌi, “Niti aman anamba Israelinai endilisi, aman buꞌunai. Anen owaꞌ nigaꞌi anif basef basoꞌasefia.”*Sam 32:2

48 Eaꞌ Nataniel naꞌipana naꞌi, “Deiꞌ inaꞌ negawe naꞌimama?”

Eaꞌ Jisas nagwamana naꞌipana naꞌi, “Dokoꞌ Filip ina deiꞌ nofalena, ataꞌ owaꞌatin, aeꞌ aliꞌ atilina nagape lawag fik kofagegama. Nogota atamba atilina.”*Mt 14:33, 16:16; Mt 27:42; Mk 3:11

49 Nataniel nagwamana naꞌi, “Tisa Dembinai, inaꞌ Nogamana Godi endilisi. Inaꞌ dembinai King apaꞌ Israeli.”

50 Eaꞌ Jisas nagwa basef naꞌi, “Aeꞌ dokoꞌ eaꞌ aliꞌ atilina egawena nagape lawag kofagegama. Isimba atis deiꞌ inaꞌ nahapifi. Endilisi anaf inaꞌ aꞌ niti anom hiahaom banagami mikilaꞌ deiꞌ atilina nagape laogon.”*Jen 28:12

51 Eaꞌ Jisas naꞌipana wapani naꞌi, “Aeꞌ aꞌipipa endilisi atis, anaf ipaꞌ piti heven nundausiꞌ nogal eaꞌ amom ensel Godi lota silaꞌmima aeꞌ ataga epen egefaꞌ alop epesi.”

Jon 2 ->