1 Nd 7-pela mounmotm 7-pela krhopam ruhet dism yakitohmoroh womr nanpno niahato mkfo memora, “Wania. Waniekahnn wahtitwant nd tekmpno yorhwa ijoh tonayet metroh mmemt. Waniekahnn wahtitwa nd mett finji finji naruhoyant. 2 Bbinysofroh kingm yima yuhum tohakmoahat to be nd mettpno yimoum.[a] Yo ndar bbinysofthu yima bugam yima yuhum tohakneft to be nd mettpno yimoum. Nd mettpno yimoamn rothu pam ye hmbremomn rothu mumeft fak hikmom.”

3 Bro Nkifrarhu Yafothat tuhafuna-nimota hanymota yima toh duha tkittn. Nd yima toh duha tkittn wom mett htimoyant yura kkupa kanjo fnhuyet yarh yemrorn yura mrhumot. Nd yarh yemrorhu that wonk wonk yufam wandfamomr. Nd yufam Bro Nkifrar kfo thir yo kfo rindho kanjohot yufam wandfamom. Nd yarh yemror 7-pela mfhami 10-pela komm tohwomr. 4 Nd mett kwinm hmbrita hmbresha kanjo fnhuyet hmbresham hmbremot. Nd hmbresham wonk wonk gort, yo mfro fnhuyet biskfot yo dborioh tahiye wondh marnyet wondht hembonginamomm nd rot hmbremo hmbresham. Yo gore hingrnayet kaftn tirt fakitohmot. Nd rot yakitohmo kaft wonk wonk yafotha duha yafotha duha hnomha nefm yo fasoh fasoh ijoh tonayet nefm furkihmomt. 5 Nd metthu nyimbiktn wom mrokfot inji htamomt, “Bro taun Babilont be tu ijoh tonayet metroh mmemet, yo ndar bbinysoft yorhwa hnomha nefroh mmemet.” 6 Yo htimoyant nd Jisasr hiket met yindarim wasmo mett tfit rroh kkut yakhato yamotn spak yimam kanjo mrokfom hus bok yimotm. Nd mett namo neft na htihato tuha mrokfo duhata rhumoya.

7 Tfit mounmotr tohhato kfo ttiwon memora, “To ni tamohmpno mrokfo kfo duha yorhwa? Afo wawanyswa nann kfo wutha nuhasruhann nd metthu ruheft yo nd rot hatonita 7-pela mfhami 10-pela inyaru krinysiket yarh yemrorhu ruheft. 8 Wawanyn. Nd ni bi htitawo yarh yemror afo tohmour. Tfit ariha nd yarh yemror nhai wom tohkahr. To tfit nd yarh yemror nd kfe rawofet bro muhr htany-hato fnahnerahr. Be nd yiharne tot wuroh htite be wundiat hti hambrafrahr. To nd yarh yemror tfit wompam mfnah tany shombat, to nd yimaroh yufam toh nkifraniyuk yimaroh yufam yorhwa rfa borngt rhu duha yita yimam tfit nd yarh yemror wompam tfit hti thombat tfit bok dukefm yakrahm. Nd yimam Bro Nkifrar mounti bbinysoft tafi hingrna hta duha nd yimaroh yufam nhai rhurmom nd rfa borngtn. Rroh dukefm duka mirahm, to ndar bi nohniyet yarh yemror tone fitoh yuhatn yak dborha-naror? Bok dukefm inji yakrahm.

9 Duka tunguna marnyetr ndar kfiwa mrokfom yima yuhum yakrahrm. Nd yarh yemror hatohmo 7-pela mfham ndm 7-pela kmi yorgm nhombrewum. Yo mett nd kmi yorgmpno yura korhwot.[b] 10 Yo nd 7-pela mfharpam ndm to nhaf 7-pela kingmn toh nhombrewum. Nd 7-pela kingm wom 5-pelakfot bi king yufat tohmomt, yo 6-yukr bi tohwort, wuroh 7-yukr tafi. Nd wuroh 7-yukr king yufat yakhato toh thombat be nd hingrneft nhai bok yiham tohruhatrt. 11 To nd yarh yemror bingot tohhato tfit ariha toh duha yitar, ndr to tor nd 7-pela kingroh wom kingr. Nd king yufat yaketroh thomnafat rorn 8-yuk kingr tohrahr. Ror king yufat yaknihatone be wundiat hti hambrafrahr.

12 Yo tfit ndwom 10-pela komm rorhu mfhat hatohwom, ndm to nhaf 10-pela kingm toh nhombrewum. Ndm afo tafi king yufat yakhato tohr-mom. Kto rom to king yufat yakhato tohrahm. King yufathu tohyuk kfo yakio mrokfot hiruhatmm nd yarh yemrorpno be wan auakforpat king hingrnefthu yufat yakitoh tefirahmt. 13 Nd kingm rpa yima yuhurpar rhuruhamn nd rroh bbukefmi yufam nd yarh yemrorpar trohhirahm. 14 Be nd kingmi yarh yemror rpat nathu hmbrihato Sifsif Yonrpno nnarahm. Nna hanyruhamn Sifsif Yonri yimam ror bi nakuyakhato rorhu yufat htahato rorpno tohwam, rom rpat sinyaruhamn yiho hathurahmm nd kingmi yarh yemror. Sifsif Yonr, rorrpar nungothetroh tu Nungotheter, yo rorrpar kingroh tu Kinger.”

15 Yo tfit wompam mounmotr kfo memora, “Nd ijoh tonayet mettpno yorhwa bro bro tekm to wonk wonk kmiyem yo wonk wonk thet kmiyem yo wonk wonk mrokfot kfet kmiyem. 16 Yo nd ni htimo 10-pela komm, nd kommi yo yarh yemror rpat nathu hmbriruhamn nd ijoh tonayet mett hti dbnotrahmt. Gobenm kanjo htirahmt. Nhai hifa nyingar htaruhatmt. Rothu wuskam yak rhoptakhato faso faso yak beb hakurahmt. Rot hatohyuk hmbresham yak taborhoh tuhruhamt brio sfnoht tohraht. Nd mett ye nyimbofiohakruhamt yuhut yimat kandhi tountuhrahmt. 17 Bro Nkifrar yima yuhum hiruhatrm nd 10-pela kingm, nd kfiwa nefm narahmm. Nd nefm rom naruham to bingot bi Bro Nkifrar kfo htatamo nefm narahm. Nd kingm rpa yima yuhur tohhato nd rom yakitohyuk king yufat yarh yemrorpar hiruhatm rorn nd king hingrneft yakitoh hanyruhartn bi nd Bro Nkifrar kfo htatayuk mrokfot bi mfrfnahnet, ee btn Sifsif Yonr yiho hathurahrr. 18 Nd mett ni htimot to ndar bbinysofthu kmi kmiroh kingm toh yukatohwa bro taunet.”

<- Revelesen 16Revelesen 18 ->