Efesus 5

Mar nukeft tohkfot

1 Bro Nkifrar hifa hti dukewarko, rorhu yonko korhko. Ndnettn nikmoh rhu nmbuham be tur dukewa dukef yuhatn rhu hikkfot. 2 Kraisrhu bro yima yuhur nompno rhumour. Nd dukeftpno rorn nohmor nom dukahato. Rorhu noh nmbuhat yimot dborioh narotwa gbet yemror Bro Nkifrar tarioh narotwewa kanjo. Ndnettn nom tawo womm hifa yima yuhur htakfot. 3 Niko to bi Bro Nkifrarpno fknihato bi rorhu yoneko. Be inji rorhu yonko rhu mif mifkfot. Mirahko tfit met yindarim nayak kafroh htfaswa nefm tfit ahiknom. Yo mirahko yima yuhum wabbrekwa nefm ahiknom. Yo mirahko be maruha dukefrn arhunom. Nd maruha dukefm yorhwakomn nhai Bro Nkifrar dukakahkomr. 4 Mirahko womm akfo dbotna bodbotnanomm. Yo mirahko womm fasoh mrokfom akfonomm. Yo mirahko fasoh fasoh nakfo ddonom. Ndhtet nefm tohetnomn Bro Nkifrar fakmornom. Ndnetnomn nom be rhuhato Bro Nkifrar kfo bruttna yindhorkfot. 5 Na kfo mifwanko, yimam o metm rine auniyetm o yimaroh yima yuhum fasoh nefroh naneftn be tohetoh hasiwam o maruha dukefrpar yorhwam, ndhtet yimam nhai Bro Nkifra Kraisrof kfoyuk tamoh tamohm yakruhatm. Nd nd nefm lotutwomm nkifra tahim kanjo. Dukefm be nd dukefm korhm, nhai Bro Nkifrarhu dukefm rhukahm.

6 Niko waduka marnya hanyswako. Ndhtet ndhtet net yimam mfrnhehak-ruhatmko rim suhnirahko. Bro Nkifrar ndhtet ndhtet net nefm hikwa yimam namburworm. 7 Ndnettn mirahko rompno nabnothato rpat awiyauyau-nom, tu be nhai mif. 8 Niko to rom kanjo afo yiro kspitatn tohmouko. Tfit bi ariha bi Bro Nungothetrhu tuhan yindariyeko. Bi rorhu mar nukeft tohwoko. Ndnettn niko mar nukeft tohwa yimam kanjo tohkfot. 9 Mar nukeft dborioh dborioh nefm mhfnah-newutm. Nhai yau nmbuham, pthefm, rhu nmbuham, faso faso rine wunekfot. Nhai mikfota mkfotakfot. 10 Tamoh tamoh nefm nhombra bonhombrawon-kfot. Fitoh neft Bro Nkifrar hti wofnwor, be nd nefrpat yakitohkfot. 11 Mirahko ndhtet kspitathu nefm nayet yimampno nabnot habrinyom. Nhai. Ndhtet yimam htitkomm tfit kfo hta mekfot, “Bar yinowe, ndhtet neft ni niwat fasohet. Wayafhont.” Nikomn tfit inji kfo htakfot. 12 Rom niwa nefm tu fasoh yima nyingatik duha hnomha nef mifm newum. Na yimtnewa rom niwa nefm nikom kfo ptha nuhasneft. 13 To nd Bro Nkifrarhu nukeft, to nd nukeftn nd tamoh tamoh nefroh mnayukm tafon mar nukatn korhm. 14 Wom shrt bi marrhu nukeft fektt, to be nd shrt tfit mar nukeft hatohwott. Ndnettn wom mrokfot kfo kangt,

“Ni yima hwes rhut hwes rhut rhu hasiwa,

be tmifn wamfryurnikahnn wasinya warhun.

Yima yopt wathu trohkahtnt,

Kraisrhu nukeft yakrahtn.” Aisaia 26.19, 60.1

15 Ndnettn nikmoh rhu toh nmbuham duka marnyahato tohkfot. Mirahko dukef duha yimam kanjo arhu mmo bammonom. Tu yima duket yimam kanjo tohkfot. 16 Arihat yimam be tu fasoh nefm fknitamn fasoh nefrpam korhmm. Ndnettn yima duket yimam kanjo tohhato dukef duha yimam kfo hta bohta marnyaf hanykfot. 17 Mirahko be mmom kanjo tamoh tamoh nefm mtusohnihato amhik fura bofurakninomm. Bro Nungothetrhu dukefr mhti hikak hanyhato hikkfot. Ror finji finji kak htewurn be ror yak htiwa yuhatn hikkfot.

18 Mirahko drinkfot masat masat aye mmokahnomn ammo bammonom. Inji narahko to be nikmoh rhu nmbuhat nhai hifa rhuruhatt. Bro Nkifrarhu Yafothatn yuht yimako thu nhombrahato be nd Yafothatn yak hta bohtakfot. 19 Yimampno rifinyhato lotuneft, Windoh Gonborngthu windoh mrokfompno windohnhokfot yo Bro Nkifrarhu windoh furam windohnho-kfot. Niko Bro Nkifrar kfo yindhorhato Windoh Gonborngthu windohm yo nd Bro Nkifrarhu windoh furam, nd nd windohm windohkfot. 20 Yiha yiha nmoh Nungothet Jisas Kraisrhu yufatpno Bro Yifemr tamoh tamoh nefm kfo yindhor buga bugakfot.

Porr pthamort ramet tuhanmi tuhanet yindariroh mrokfot

21 Niko Kraisrhu yinhit toh buge-wuko. Ndnettn niko tuko Kristenko nawany yakio nawany yakiokfot. Nawany marsisa duha. 22 Niko Kristen metko, Jisasrhu yinhit tohwa kanjo yindariroh yinhitn rhuhato rroh tngm hikkfot. 23 Nhai sfno inji kfokahanko. Kraisr sioshu mfhako tohwa kanjo yindarimn metroh mfhako tohwom. Sios Kraisrhu thatipet ndnettn nnrfa hbhamort. 24 Sioskfot tu Kraisrhu yinhitn korht. Ndnettn niko metko nd yuhat hikhato tukmoh yindariroh yinhitn rhu hanykfot.

25 Niko yindariko tukmoh metm marbitn htakfot. Sioskfotn Kraisr marbit htahato mfha htamo kanjo niko yindariko ndhtet dukefr yakhato nikmoh metm marbit htakfot. 26 Ror inji namohat Bro Nkifrarhu yufatpno yimaroh yak htaneftn inji namor. Rom rorhu mrokfot yakhato hikmo yuhatn yo baftais yakmo yuhatn Kraisr fak wus bowus marnyamormn yima yuhum wutham rhumomm. 27 Rorhu dukeft nhai wofnrmor sioskfot wuspenm o krtafenm rhukfot. Rorhu dukeft memor, “Be inji Bro Nkifrar yorhwa ruheft kanjo arhukahmn nhai wom tamoh nefenm rhukfot.” 28 Ndnettn niko yindariko tukmoh thatipm yak marnyiwa kanjo tukmoh metm yak marnyakfot. Yimar turhu mett yak marnyiwar, nd yimar turhu thatipt hti wofnhato yak marnyiwa kanjo inji kak marnyewurt mett. 29 Nhai wom yimar turhu thatipt tfit turn krjbowur inji nakahrt. Nhai. Rot yak marnya bomarnyiwartn yeshri kahukrt. Kraisr sioskfot yak marnyiwa kanjo inji newurt turhu thatipt. 30 Nom Kraisrhu thatipthu tir, wura, nyinga nd ndenom. 31 Bro Nkifrarhu gonborngt kfo kangt, “Ndnettn yindarir turhu yifammam htanyhato turhu yak tuhantpno frtkafhato rpat tohkfot rpa yimar kanjo. Nhai tfit husf tfit rhukfot.” 32 Nd kfo nhombra mrokfot tu bro mnetet. Nd kfo nhombra mrokfot kfiwut Kraisri rorhu sioskfot o ror hikwa met yindarim. 33 To mirahko nd mrokfot ka Kraisri ror hikwa yimarpampno kitwot nd mrokfot. Nhai. Nd mrokfot to rpat kitwot niko rpa rpa yimako yo rpa rpa metko. Ni yindarin, tunhu yak gb tuhant marbit htakfot. Tunhu thatipt yak marnyiwa kanjo mett inji yak marnyahato yakitohkfot. Yo ni metn tamoh nefm naruha, tunhu yindarir mhti yakrmiyak hanykfot.

<- Efesus 4 Efesus 6 ->