Sumi Yi Puguiag Mo 15

Elegeg wa gohug of wanai el elegeg wa gohug kinig wambug agfo

1 Afa ming enmunam enaig ka nangug enaba enmunafeg eba enam el sineminefinig. Afa ka nangogba elegeg wa gohug ofwanai el elegeg wa gohug kinig wambug agfo. Sohna kinigbi Godna olug kakagig enaba sumi nai nemug feg.

2 Afa mingba enaig ka nangug ofenaiba bu nalig glas lofug suwina waheg go. Afa el bu bug yi agfohieaba gita lofug God wambwaiyigbi eso wambug agfo. Ena elbi eba ati sis mi, sis heafna sungwag mi, afa enag namba unehlag wagfuiag mi ati enam filafig. 3 Afa ehengel gita wambugum afa so Moses Godna gafugag elna mwanifi i afa Sipsip Luwaligna mwanifi i aitiagig. Afa so enaig fatifig og;

God Ainiyag ne mungwali kifutigni feg afa neana lahlag gafugag enmunafeg afa ka nangugim ka sineminefig. Afa ne mungwali elni misog el fenig afa neana nihe eba inim feg afa hugna lahlafeg.

4 Afa Ainiyag ne mungohe afsug feg afa so mungwali el nem embefinim so ma neana unehlagim fingi fi. Afa mungwali el bite nai so ma neana nihem nangunim ambugog nem lotufini.

5 Afa ka nangogba Godna nalig lala heven wa pigig go ena lala meg gamba God enanai yi ga. 6 Afa enag elegeg wa gohug ofwanai el Godna nalig lala wahigim elegeg wa gohug kinig wambug ambugog. Sonag el ehengelni lofugba hugna busbusiagegim afa gol we heafgelni bahalig yi katige fiagig. 7 Afa sambaga sambaga sis bistanig agfohieaba afa so mungo enanai gol disni fagim elegeg wa gohug of wanai elim faig. Ena dis yiba God higeg gohug olug kakagig memtowa pugugo. 8 Afa God i afa heafna kifutig i enanai yi Godna nalig lala suwieg lofug puguiagi. Mas aman mungo ika ena lala seahui eba mahim elegeg wa gohug kinig ma awaieba.

<- Sumi Yi Puguiag Mo 14 Sumi Yi Puguiag Mo 16 ->