Hibru 3

Sisas Mosesim gosenag

1 Afa kana nilite ne afsug kabag el fig eso God nengelim kanog hwatig heven gam ahuiagim. So na Sisasim onigi God ehem kano wahiag afa ehe prisni misog el feg eso ehe ohuna bite gam pe bog. Eso big ehem olug oniginim kikehli eso ehe bigim God nagum wankaf. 2 Afa God Sisasim gishu wahianaba eso ehe Godna sawiegim numwehe pahlukug ofenaiba Moses Godna elim kwaganam eso Godna sawiegim so numwehe pahlukuna. 3 Afa el so lahlag lala nimbagba eba ehe unehlagba nalig fag. Afa elni unehlag lalam gosenag. Eso Sisasna unehlag gaba Mosesim gosenag. 4 Afa mungwali lala eba el ehe enam gafugafeg eba God ehe mungwali gawig gafugafeg. 5 Afa Godna el eba Godna lala. Afa Moses eba enag lalanai lahlag gafugag el eso ehe enaig esog mangim so eba God sumi yi sihif. 6 Afa Krais eba lahlag gafugafeg afa ehe Godna Leg eso Godna lala misog el feg. Afa bigel Godna lala figbi eba so big kifutinim afa ena onigig kikehli ogfufum ehe bigim lahlafihiagef.

Bigel nofe nawo Godum masig fatini

7 Afa eba Sisas Mosesim gosenag eso ne Godna Sungwagni mo higig ehe enaig esog;

Afa ateamba ne Godna mo yawo ohigfibi, 8 nofekawo angug pupuhiagi ofenaiba nimbiafgelni simbianga osa ati enaig esini afa eba autunam ehengel tutonbusug el fini. Afa enanam ehengel bite bihig wa auguiafenaba Godum gihni. 9 Afa mahim 40 yia fenaba ehengel kana kifutigim nanguni eso enanai yi ehengel kana kifutigim gihni. 10 Afa mahim enaig esigbi na so ka ehengelim olug kakagenig. Afa ka esog ehengelni onigig mas kana membugim higeg pahlufehuf mo afa ehengel mas kana nihem anwanafig mo. 11 Afa na so ka olug kakagenigim afa ka kifutig mo sihi wahianig kog, ‘Ehengel mas ka nai yi hekuli!’ Sam 95:7-11

12 Afa kana nilite so na nimbefum mo numwehifibi masa ne nengelnai aman mungo amtakwalig onigig ehena olug yi goh, enag God higeg gohugum masig fatinafe. 13 Afa Godna mo enaig sihifeg og, “yawo” gohnanam eso big mungwali osuna mingnag nilitem Godna mo kwaganim. Masa amanim amtakwalig pugunam mwakwalenageba eso kiniafuhla feakafuf. 14 Afa ateamba bigelni olug onigig gwese kifutig gohugba eba so ma gwese gohun bigim wahai eso big Kraisna hihe nemug fef. 15 Afa Godna buk enaig esog;

Afa ateamba ne Godna mo yawo ohigfibi, nofekawo angug pupuhiagi ofenaiba nimbiafgelni simbianga so ati enaig esini afa eba autunam ehengel tutohiagig el fini. Sam 95:7-8

16 Afa amangel mahim Godna mo higinim masig fatini? Eba mungwali el gof wanai Moses wambinam Isipim wahianam wankana. 17 Afa amangelim mahim 40 yia waba God ehengelim olug kakagini? Eba Israel el amtakwalig nihe eseaginibi eso bite bihig wa pigina. 18 Afa amangelim mahim Godba kifutig moba sihi wahianig ehe enaig esog og, “Ehengel mas ka nai yi hekuli”? Eba el eso ehem masig hwatinig. 19 Eso big anwanafi ehengel Godum mas olug onigini mo eso bite God ehengelim faig mas enanai yi ahu saiyenam hekuli.

<- Hibru 2 Hibru 4 ->