1 Afa ka membig koka nem anwanafen ne lahlag augufeg me awai awai me. Afa kagelni olug kinig fig eso kagel enaig onigig fig afa ka o Sailas i ohuna nai yi Atens wa ahwagfiba. 2 Afa Timotim mo ka ahningihiag nem nangwagigim. Afa ehe bigelni nilite eso Godna gafugag el feg eso Kraisna lahlag mo sihiakag. Ka ehem ningihig so ma nengelim kifuti wambigenam afa nengelni olug onigigim kwagani, 3 eso enanam kinig nem pugunig afa nengel mas olug onigig wahiag mo. Afa ne ati anwanafig God enaig esog ne kana el figbi so ma ahanaig ahanaig kinig kehili. 4 Afa autunam mahim kagel nem wanfafnaba ka enaig sihififni kinig bigelim pugunigim afa ne anwanafig enag so ka sihina sati pugug. 5 Eso ka olug kinig fegim afa ka mas mahim fef eba ka Timotim ningihiaiba eso ehe bo nengelni olug onigigim fahignuge ahanaig augunifig. Ka onigig masa Satan nem gihnaiba afa kagelni mungwali gafugag nengel nai yi isug awaief.

6 Afa Timoti nengel yi nai ka nangum piske bog afa ehe lahlag mo kam bu sihinag og, ehengelni membenig nihe afa olug onigig eba lahlag. Afa ehe enaig esog ne kagelim onigigonug afa ogna kagelim piske nagwag gwenaig kagel membig nengelim gaba nangwag. 7 Eso kana nilite, ahanaig ahanaig kinig kagel nai yi go eso kagel nengelni olug onigig mo higigim enag kam kifutig faig. 8 Afa ka anwanafig ne ati Ainiyag nai yi kifutig gohug eso yawo kagel lahlag augufig. 9 Afa ka nem onigigonigim eso ka Godum lahlag onig. Afa bigelni Godna nof wa nengel kam nalig sifakal faigo eso enag sifakalim kagel Godum nalig lahlag onig. 10 Sinaini osuna ka Godum hugna fasahnafuf eso nengelim piske nangwaginim afa mang onigig so nem olug onigig wa awaienig ka so nengelim ambugog kwagani.

11 Afa ka membig bigelni Humuan God ehe afa bigelni Ainiyag Sisas so ma eheningi enaig ahsafe, kagelni mina pigi wahiaiba eso ka nengelim nangwagigim ambugo. 12 Sa ma Ainiyag nem enaig esenai neana elim membeg nihe so ma nalig fenam kuhu ikai eso nimbefum membagi afa mingnag elim membegoni eso ka nem gwenaig esegonug. 13 Afa enag minaba God neana olug onigig kifutinaf afa mahim Ainiyag Sisas heafna elim wanobofiba eso bigelni Humuan Godna nofwa eso ne afsug kabag fe.

<- 1 Tesalonaika 21 Tesalonaika 4 ->