APOCALIPSIS 5

Att̃o Juanpaʼ entan Cristo ñeñt̃ atmaʼntataret̃ Carrnero, eʼñe ñapt̃a toran Yompor poʼlibro

1 Allempoñapaʼ alla necuererr ñeñt̃ anets all poʼconaño. Potot̃ poʼcohuenrot̃paʼ all nent all orrenan libro apcoʼnot̃tataret̃, eʼñe emotoʼmar aquellcaʼhuaret̃ oʼponot̃ ñam̃a enot̃. Echenan canc̈herr ñeñt̃ allo ayomrraret̃ att̃o eʼñe echarr ap̃aret̃. 2 Ñam̃a all nent puesheñarr mellañot̃eñ ñeñt̃ atarr ahuamencat̃. Ñañapaʼ rrana huomenc, ñeñt̃paʼ atet̃ oten:

—Eseshaʼhuacaʼ eʼñe cohuenareʼ cot̃apeʼchetsña Yomporecop ñeñt̃chaʼ toreʼ añ Yompor poʼlibro allo echarr ap̃aret̃tena.

3 T̃arraña amaʼt puesheñarrapaʼ ama eñalle ñeñt̃chaʼ toreʼ Yompor poʼlibro. Amaʼt puesheñarra ñeñt̃ entoʼtsen ñam̃a amaʼt ñeñt̃ patsoʼtsen ñam̃a amaʼt ñeñt̃ oʼponoʼtsen patso, ama eñalle ñeñt̃chaʼ muenatet ñeñt̃chaʼ toreʼ Yompor poʼlibro att̃och eñorachet. 4 Napaʼ ñeñt̃ña atarr neyarreʼ att̃o amaʼt puesheñarrapaʼ ama neñche ñeñt̃ eʼñe cohuenareʼ es cot̃apeʼchets Yomporecop ñeñt̃chaʼ muenatet oʼch toran Yompor poʼlibro ñeñt̃chaʼ eñorateʼ. 5 Allempoña ñeñt̃ epoch c̈harrasheña ñeñt̃ puechetsa paʼtats ñeñt̃ sherbeneʼ Yompor, puesheñarrñapaʼ oten:

—Amach peyahuatsto, t̃arroʼmar eñall puesheñarr ñeñt̃ eʼñe pocteʼ ñeñt̃chaʼ toreʼ Yompor poʼlibro ñeñt̃ canc̈herr allo echarr ap̃aret̃tena, t̃arroʼmar ñapaʼ ñeñt̃ metanaʼtueʼ allohuen paʼnamen topateñtsoc̈hno, ñeñt̃ñapaʼ añepaʼt Cristo ñeñt̃ara atmaʼntataret̃ Maʼñor. Ñeñt̃paʼ judámerenaʼtar ñeñt̃ara David poʼm̃reneñ.

6 Necuererr, allñapaʼ nent Cristo ñeñt̃ tomaʼntenaya Carrnero. All t̃en eʼñe rroc̈ho alloʼtsaʼyen Parets poʼconañ ñam̃a añ paʼtatsoʼmar ñeñt̃ berrmaʼt̃tetsa ñam̃a eʼñe alloʼtsaʼyen ñeñt̃ sherbeneʼ Yompor. Eʼñe rroc̈ho all t̃en Cristo ñeñt̃ atmaʼntataret̃ Carrnero. Orrtena atet̃ ñerraʼmrrat̃eʼ carrnero ñeñt̃ amtsaret̃tetsa ochñartsocop. Ñeñt̃ carrneropaʼ canc̈herr poʼucor, echenan ñam̃a canc̈herr paʼclleʼ. Ñeñt̃ canc̈herr paʼclleʼpaʼ ñeñt̃paʼ añ Yompor Puecamquëñ ñeñt̃ara canc̈herr ñeñt̃chaʼ sherb̃aʼyesets eʼñe poʼpoñeʼttsocma ora erracmañen añe patsro allchaʼ amñaret̃etyerret. 7 Allempoña añ Carrneropaʼ oʼ huapa oʼ c̈hap alloʼtsen Yompor ñeñt̃ anets all poʼconaño. Ñañapaʼ chetsosan Yompor poʼlibro ñeñt̃ orren poʼcohuenrot̃. 8 Oʼ chetan libropaʼ allempoña añ ñeñt̃ paʼtatsoʼmar berrmaʼt̃ ñam̃a ñeñt̃ epoch c̈harrasheña ñeñt̃ puechetsa paʼtats ñeñt̃ sherbeneʼ Yompor, allohuenetñapaʼ concorpaʼrrteñet Cristo ñeñt̃ atmaʼntataret̃ Carrnero. Puesheñaʼttsetpaʼ orrenet arpa ñam̃a pajoʼ ñeñt̃ orotaten all anaret̃ ñeñt̃ atarr eñmosat̃tetsa Yomporecop. Ñehua, añ ñeñt̃ eñmosat̃tetsa añ tomaʼntena ñeñt̃ att̃o maʼyochena ñeñt̃ pueyochreshaʼ pen Parets. 9 Añña ñeñt̃ concorpaʼrrtetsapaʼ ñetñapaʼ morrechenet ñeñt̃ etserra morreñets ñeñt̃paʼ atet̃ ac̈hoteñet Cristo ñeñt̃ atmaʼntataret̃ Carrnero:

P̃apaʼ eʼñe cohuenareʼ es pep̃aʼyen ñeñt̃oʼmar eʼñe pocteʼ p̃ach cheteʼ Yompor poʼlibro, eʼñe pocteʼ p̃ach toreʼ allo echarr ap̃aret̃tena t̃arroʼmar p̃apaʼ p̃a amtsaret̃tatsa, perrasoña p̃apaʼ allo petsaʼtuonaya yoʼchñar allochñapaʼ att̃och eʼñe puechemer perrey Yompor amaʼt allohueney ñeñt̃ey paʼnamen acheñey, amaʼt erraʼtsena mereñtsorey allot̃ yehuena, amaʼt ñam̃a erraʼtsena ñoñtsor allo yeñosyen eʼñe poʼpoñeʼttsocma, amaʼt ñam̃a paʼnamenanaʼtarey allohuen errohuanen ñeñt̃ eʼñe yaʼnetser yep̃aʼyen.

10 Ñeñt̃ey allohueneypaʼ p̃a yemnateneʼ oʼch yaʼm̃chaʼtaret̃tapretap̃a att̃ochña yesherb̃apretenep̃ Yompor ñeñt̃ atarr Parets. Att̃oña yecorneshaten Partsocop. Ñam̃a att̃och yaʼm̃chaʼtaret̃terra añe patsro.

11 Allempoña alla necuererr oʼ neʼmuererr mellañot̃eñneshaʼ atet̃ eñosyenet. Shontet nanac cheʼmuechenet all rroc̈htam̃peñet aʼyohuen errap̃aren. Ñam̃a ñeñt̃ berrmaʼt̃tetsa all ñam̃a ñeñt̃ sherbeneʼ Yompor ñeñt̃ allohuenet maʼpotantoʼmaretpaʼ ñeñt̃ eʼñe rroc̈htam̃peneʼ Yompor ñeñt̃ anets all poʼconaño. 12 Ñeñt̃ mellañot̃eñneshaʼ ñetñapaʼ eʼmorrtenet huomenc all ac̈hoteñet Cristo ñeñt̃ atmaʼntataret̃ Carrnero. Ñeñt̃paʼ atet̃ otenet:

Cristo ñeñt̃ tomaʼntenaya Carrnero ñeñt̃ amtsaret̃tatsa, ñapaʼ eʼñe cohuenareʼ es p̃aʼyen ñeñt̃oʼmarña ñapaʼ eʼñe pocteʼ ahuamencat̃tena, agapanepaʼ shonteʼ esocmañen ñam̃a eʼñe pocteʼ eñotañtepaʼch, ñam̃a eʼñe pocteʼ partsotepaʼch, ñam̃a eʼñe pocteʼ am̃chaʼnaʼtpahuotepaʼch. Ñam̃a eʼñe pocteʼ ya yecohuentateñot̃ yaʼyeʼchoc̈htatoñepaʼch.

13 Allempoña neʼmuerrerr atet̃ amaʼt allohuen ñeñt̃ Yompor pueyec̈hcatar ayeʼchoc̈htateññañet Yompor amaʼt ñeñt̃ entoʼtsaʼyen ñam̃a amaʼt allohuen ñeñt̃ patsoʼtsaʼyen, ñam̃a allohuen ñeñt̃ oʼponoʼtsen patso ñam̃a oño. Amaʼt eʼñe allohuen pueyec̈hcatar ñeñt̃ alloʼtsaʼyen allohuenet ayeʼchoc̈htateññañet Yompor, atet̃ otenet:

Yaʼyeʼchoc̈htatoñepaʼch Yompor ñeñt̃ anets poʼconaño ñam̃a Puechemer Cristo ñeñt̃ atmaʼntataret̃ Carrnero. Am̃chaʼnaʼtpahuepaʼch yenteñ, yecohuentatoñepaʼch t̃arroʼmar ñetpaʼ atarr ahuamencat̃et t̃ayot̃eñ amaʼt errponañohuen.

14 Ñam̃a ñeñt̃ berrmaʼt̃tetsa paʼtatsoʼmar all ñetñapaʼ otenet:

—Ñeñt̃paʼ att̃etepaʼch.

Ñam̃a añña ñeñt̃ sherbeneʼ Yompor ñeñt̃ epoch c̈harrasheña ñeñt̃ puechetsa paʼtats oʼ concorpaʼrrtet all maʼyocheñet Yompor ñeñt̃ ama arromñat̃eshayaye.

<- APOCALIPSIS 4 APOCALIPSIS 6 ->