SAN MARCOS 16

Att̃o tanterra Jesús

(Mt. 28.1-10; Lc. 24.1-12; Jn. 20.1-10)

1 Oʼña huañ yet̃ allempo amesenet, María Magdalena ñam̃a Salomé ñam̃a poʼpsheñeñ María ñeñt̃ Jacobo pachor, ñetñapaʼ rañt̃aʼyesnenet eñmosat̃ ñeñt̃chaʼ anmaʼmuenet tsapat̃ Jesús puepampro alloch aʼyanaʼteretaʼ amaʼt rromot̃a. 2 Tsapat̃ allempo mot̃taʼmuena yet̃ñats temenc ñetñapaʼ eʼñe ahuat̃ecma ahuanmaʼmuenet Jesús puepampro. Oʼ t̃aya huapaʼmuena atsneʼpaʼ allempo ahuanmaʼmuenet. 3 Ñetñapaʼ otannaʼtyesnomuet:

—Taʼ, eseshaʼch aʼrrot̃eʼteʼña mapueʼ añecmuen ñeñt̃ allo yottam̃peñet att̃och yebeʼt̃os all puepampro eshecchaʼ yaʼyanaʼteraʼ eñmosat̃o.

4 Ñetña c̈hapatseta all, cohuostseta entoset mapueʼ oʼ aʼrrot̃eʼtaret̃tena aʼyenet̃, amaʼt ñeñt̃ mapueʼpaʼ añecmuen. 5 Ñetña allempo beʼt̃ososet puepampro allñapaʼ all entoset puesheñarr huepueshaʼ all anen poʼcohuenrot̃. Paʼshtamñapaʼ atarr huallamaʼt̃, c̈ha t̃orats p̃anet pueyoc̈hret. 6 Ñeñt̃ña mellañot̃eñerpaʼ atet̃ otapanet:

—Amach c̈ha seyorenatsto. Napaʼ neñotenes añcaʼye semnen oʼch sentaʼmueñ Jesús ñeñt̃ otenet nazaretoʼmarneshaʼ ñeñt̃ oʼ corsoʼtam̃perret. T̃arraña ña t̃eʼ oʼcaʼye tanterra, ama arroʼtsenaro. Secueñaʼcaʼye all neretañ, amacaʼye eñalle.

7 Allempoña mellañot̃eññapaʼ alla oterraneterr:

—T̃eʼpaʼ oʼch ahuerres oʼch sotuer Pedro ñam̃a poʼpotantañ pueyochreshaʼ, Jesús oten oʼch ota oʼch ahuerr Galileo. C̈hoschaʼña ahuanmatsa sam̃a allochñapaʼ allchaʼ senter ñeñt̃ atet̃ otaseʼt̃ ahuaña.

8 Allempoña coyaneshac̈hno atet̃ otaret̃tet all Jesús puepampro, ñetña c̈haʼnmac̈herretpaʼ matenacma ahuanerret poʼyorñot̃etpaʼ c̈ha yonshemaʼtyesnerret. Pom̃chañot̃et amaʼt eʼñe eseshapaʼ ama errot̃enayeʼ otenayeʼ entnerreto.

Allempo tanterra Jesúspaʼ añ ñanom orrterra María Magdalena

(Jn. 20.11-18)

9 Ñehua, ahuat̃ecma tanterra Jesús añe yet̃ro allempo mot̃taʼmuenerr yet̃ñats temenc. Allempo tanterrapaʼ añ ñanom orrterra María Magdalena. Ñeñt̃ña Maríapaʼ canc̈herrsheña oneñet̃ ñeñt̃ chorrayeʼt̃ Jesúsñapaʼ eʼñe quec̈hpatam̃p̃satuer. 10 Maríañapaʼ allent̃a ahuoʼ oʼch otenanaʼ ñeñt̃ epuet yemteʼt̃ Jesús all puellquëñot̃et atarr yahuanrrortenet. 11 Ñetña allempo eʼmareʼchet oʼ tanterra Jesús, Maríapaʼ oʼcaʼye enter, ñetñapaʼ arepaʼtchaʼ ameʼñyeto.

Allempo Jesúspaʼ orrterrana ñam̃a epsheña pueyochreshaʼ

(Lc. 24.13-35)

12 Poʼpocheño Jesúspaʼ eʼñe poʼpoñot̃ orrterrana epsheña pueyochreshaʼ allempo chopeñeʼchnenet allampañoʼmar. 13 Ñetñapaʼ allent̃a puerrerret oʼch otueret poʼpotantañ, arepaʼtchaʼña ameʼñaret̃tapuerreto ñeñt̃ atet̃ enteret ñamet Jesús.

Att̃o Jesúspaʼ otnerran pueyochreshac̈hno ñetpaʼ atet̃chaʼ p̃aʼyerret

(Mt. 28.16-20; Lc. 24.36-49; Jn. 20.19-23)

14 Poʼpocheño Jesúspaʼ alla orrterranerr pueyochreshaʼ c̈harrasheña ñeñt̃ puechetsa pat̃err all rrallmeʼchenet. Ñañapaʼ atet̃ cot̃apeʼchatuenanetpaʼ atet̃ otuenanet:

—Sapaʼ esoʼmareʼtña ama sameʼñeñoña poʼpotantañ ñeñt̃ soteneʼ napaʼ oʼcaʼye netanterra t̃arroʼmar ñetpaʼ c̈hocaʼye enterrnet. T̃arraña sapaʼ amacaʼye es sec̈henoyo seyoc̈hro.

15 Allempoña Jesúspaʼ atet̃ oterraneterr:

—T̃eʼpaʼ oʼch auyeses ora errap̃aren allohuanen añ patser, seserrpareʼtach allohuen acheñeneshaʼ añ cohuen ñoñets alloch aʼqueshp̃ataret̃terret. 16 Allohuen amaʼt erraʼtsena ñeñt̃chaʼ ameʼñerraya añ cohuen ñoñets ñam̃a ñeñt̃ pameʼñeñot̃etpaʼ apataret̃terretchaʼ ñetñapaʼ aʼqueshp̃ataret̃terretchaʼ. T̃arraña ñeñt̃chaʼ ama ameʼñerrtso, ñetñapaʼ amñaret̃terrach coñcheñtso. 17 Ñeñt̃chaʼ nameʼñerraya ñocpuetpaʼ norrtaterranetchaʼ nepartsoña. Eʼñe na nesoʼchñoch quec̈hpatyesetchaʼ oneñet̃ec̈hno, ñam̃a eñosyesetchaʼ poʼpoñeʼttsocma ñoñtso. 18 Ñam̃a ñerraʼm eʼñe potot̃et chetetchaʼ shechep̃, t̃arraña amach errot̃ p̃aneto; ñam̃a amaʼtchaʼ añ orret ñeñt̃ amtsañtetsa t̃arraña amach errot̃ p̃aneto. Ñam̃a ñerraʼm esempoch aʼp̃llaʼyeñet atsnañet̃, atsnañet̃ñapaʼ acrrerrocheʼch.

Allempo aʼterr Jesús pueʼntaño

(Lc. 24.50-53)

19 Oʼña atet̃ otuanerranet Partseshaʼ Jesúspaʼ allent̃a aʼtapater Pompor pueʼntaño, allñapaʼ anorruen eʼñe Pompor poʼcohuenrot̃, all partsotapretuera. 20 Pueyochreshaʼñapaʼ ahuanomyeset, serrpareʼtyesnomuet errap̃aren. Partseshaʼ Jesúspaʼ c̈hocma t̃orrapretenanet, orrtatenanet poʼpartsoña att̃och acheñeneshaʼ eʼñech eñotenanet ñeñt̃ atet̃ serrpareʼtyenet, ñeñt̃paʼ eʼñe poʼñoc̈h Parets poʼñoñ. Ñeñt̃paʼ att̃etepaʼch Nompore. Allohua.

<- SAN MARCOS 15