1 Akngey-kenh-angkwarr apenteyelel, mwerr apek aynteyel artwa mpwaretyek Jew-kenh-angkwarr? Akngey-kenh-angkwarr Jew-rnem mwerr-ayteng aneyel? 2 Ikwer-rnem-tangkwel Akngeyel angka ikwerenh arrernek, rernem apenterl-ayntetyek.
3 Jew ingwer-rnemel arraty-angkwarr apentey-angenh. Akngey-kenh-angkwarr anwantherr menty-anem ipmelhey-angenh, rernem ipmelhek-apeny. Akngeyel angka arrwekel arrernek, nthakenh iparey-angenh. 4 Arrangkw! Ingwerenty irrtywerrenty, Akngey-kenh angkekety intwemelirrey-angenh. Akngey-kenh angka arrwekeleny alakenh aynteyel: “Akngey-kenh angka arraty innga, nthakenh ingwerentyel court-warl arrerney-angenh.” 5-6 Jew-rnemel apmwangkwarr apententy, arraty Akngeyel renh-rnem atweyenh. Ingwerel-rnem renh-rnem areyenh, rernemarl Akngey-kenh-angkwarr apmwelhilek. Rernem iterl-arem-anem, Akngey arraty inngarl. Arraty ahern-areny-rnem atweyenh? Mwerr Akngeyel apek renh-rnem tyarlewetyek apmwangkwarr? Arrangkw innga. Arraty-angkwarr ra Jew-rnem anwenhantherr akngakeyenh, anwantherr ingkerrenh apmwelhilek-kety.
7 Jew ingwer-rnem angkek, ayeng Akngey-kenh-angkwarr apmwelhilenty, rernem Akngey renh iterl-arem-anem arraty inngarl. Akngeyel apek ayenh menty atwey-angenh. Mwerr alakenh? 8 Ingwer-rnemel ayenh ayntarrp-ilek, ayeng alakenh rwewilerrenty-arrpantey. Ayeng nthakenh Akngey-angkwarr arratyirrey-angenh-arrpantey. Akngeyel renh-rnem atweyenh.
Ahern-areny-rnemel arraty-angkwarr apentey-angenh
9 Jew-rnem anwantherr apek mwerr-ayteng ingwer-rnem-angkwarr, anwantherr angka Akngey-kenh-akerting? Arrangkw. Anwantherr apmwakert ingkerrenh aneyel, Jew-rnem-then Jew-weny-rnem-then. 10 Akngey-kenh angka arrwekeleny alakenh aynteyel: “Nthakenh anyent apek Akngey-angkwarr amentel arratyirrey-angenh. Rernem arratyirretyek-arrpantey arrkernelhenh ywarn. 11 Rernem Akngey renh iterl-arey-angenh. Arraty-angkwarr apentetyek arrkernelhey-angenh. 12 Rernem intwemelirrek Akngey-kety, ingkerrenh-antey. Rernem apmwangkwarr apenteyel, ingkerrenhel. 13 Rernem arrakertel apmwel-areth ileyel. Rernem irrtywerremel ileyel. 14 Rernem apmwilem, ilterl-anemel. 15 Rernem ingwer-rnem atwetyek arrkernelheyel. 16 Rernem irrwernelheyel, rwewilirreyel. 17 Rernem tnhwerant-arey irrentirreyel ingwer-rnem-itwek. 18 Rernem Akngeyek iterrey-angenh arrangkw, amentewarl.” Akngey-kenh angka arrwekeleny aynteyel. 19 Alakenh Akngeyel angka arrwekeleny arrernek, Jew-rnemek, rernem iterretyek ikwer. Arraty-arrpantey tnakelhemarl-kety, anwantherr ahern-areny-rnem iterl-aretyek, rernemarl apmwangkwarr ingkerrenh alhenh. 20 Anyent apek nthakenh Akngey-angkwarr arratyirrey-angenh, angka arrwekeleny-angkwarrant apententy. Akngey-kenh angka arrwekeleny-angkwarr, rernem iterl-arelhem rernem apmwakert-antey aneyel.
Akngeyel ileyel ingkerrenh ikwerenh-angkwarr arratyirretyek, rernem Jesus renh tnakenty
21 Aley alakenh anwantherr arratyirretyek Akngey-kenh-angkwarr. Alakenh angka arrwekeleny aynteyel. Alakenh Akngeyel arrernek ikwerenh-angkwarrant, Moses-kenh-weny-angkwarrant.
22 Rernem Jesus Christ tnakenty, rernem Akngey-angkwarr arraty anem, Jew-rnem-then Jew-weny-rnem-then ingkerrenh-antey.
23-24 Ingkerrenh nthakenh Akngey-kenh-angkwarr arraty aney-angenh ament, Akngey irrwerl-areny iterl-arey-angenh, rarl rlterrk innga aneyel. Akngeyel iwerr anwekantherr mpwarek Jesus Christ-angkwarr. Ra ingkerrenhek katy ilwek, ra renh-rnem anyentelhilek Akngey-warl, rernem Akngey-kenh-angkwarr arraty anayntetyek, alyelk.
25-26 Awank-akerr arrwekelenyel-rnem atnwenth-tangkwel atwenh, aker tyenkerr arrernetyek, rernem Akngey-angkwarr arratyirretyek. Alakenh Akngeyel Christ renh anthek, rernem ipmek atwetyek, ingkerrenhek katy ilwetyek, tyenkerr-apeny, ingkerrenhel. Akngey ra ingkerrenhek lwewarrernelhek, ra arraty innga aneyel. Rernem renh tnakenty, Akngeyel renh-rnem ayntarrp-iley-angenh, alyelk-apeny rernem anayntetyek. Apmwangkwarr alhenh-rnem ra ahern-areny menty tyarlewek, ywerrelhilemel atwey-angenh. Christ ra ingkerrenhek katy ilwek, rernem arraty ingkerrenh anayntetyek. Ranem ikwerenh-angkwarr arratyilek, rernem mwerr-angkwarr apenterl-ayntetyek. Rernem arraty-angkwarr anem, rernem Jesus renh apententy.
27-28 Alakenh-they ingkerrenhel nthakenh arraty-arrpantey tnakelhey-angenh, Jesus-ant tnakem. Angka arrwekeleny-angkwarr apententy nthakenh arratyirrey-angenh Akngey-kenh-angkwarr. Anwantherr akalty, anwantherr Jesus renh tnakenty anwantherr Akngey-kenh-angkwarr arraty aneyel. Angka arrwekeleny arrangkw. 29 Akngey ranem ingkerrenhek aneyel, Jew-rnemek-then, artwa Jew-weny-rnemek-then. 30 Rernem Jesus renh tnakenty, Akngeyel renh-rnem arraty antwem, Jew-rnem-then, Jew-weny-rnem-then. 31 Anwantherr Jesus renh tnakeyel, anwantherrap angka arrwekeleny-kety ipmelhey-angenh. Arrangkw, aleth-antey iterl-areyel Akngey-kenh-angkwarr apenterl-ayntetyek.
<- Romans 2Romans 4 ->
