1 Jesus apwert-they atwarrerl-alhek, akngerr ingwer-rnemel renh apentek. 2 Artwa tywen-angketyarr apetyek Jesus-warl. Tywen ywerrey-angenh intem-anteyarl anenh. Ra kwenirrenh Jesus-itwek, ampwethel alernelhemel. Ra angkek, “Nga rlterrk inngan, mwerriley-angker. Ntwa ayenh mwerriletyek tywen-rnem atyeng-they ywerrelhila, ayeng tywen-weny alyelk-anem anetyek.”

3 Jesus ranem renh arnep-arnek, angkemel, “Ayeng ilkelheyel, ngenh atha mwerriletyek.” Tywen-rnem arwapeny ywerrerl-alhek, mwerrirreyelpek. 4 Jesus ra arrkngert angkek, “Akater-anem aney-alpa! Ingwer-rnem-warl ilelhey-angenh anetyek, atharl ngenh tywen-angketyarr-penh mwerrilek. Atyetyart tyaty ilkwa Jew-rnem-kenh-arenyek nga anyentekant ilelhey-alpa, ra ngenh mwerr-anem aretyek. Ntwa aker tyenkerr Atyetyart antha! Moses-kenh angka aynteyel, aker Atyetyartek anthetyek, ingkerrenhel ngenh aretyek, ngarl mwerrirrek-anem, ntwarl aker tyenkerr Atyetyart anthek.”

5 Jesus apmer Capernaum-warl-anem alpek. Artwa ahelengkw atyetyart irlkentyek-artwey Rome-areny ikwer-warl apetyek, ayernetyek. 6 “Ingkartay, warrkenh atyenh arlan aynteyel, akngelhey-angenhirrek, arlka ingkerr kwarnelheyel-kety.”

7 Jesus angkek, “Ayeng alhem ngkweng-angkwarr, renh mwerriletyek.”

8 Atyetyart irlkentyek-artwey ilelhek, “Ngan ilkwarl atyeng-angkwarr. Ayengan artwa apmwamwamarl. Ayeng nyerrirreyel ngkwengety, atha ngenh warl atyenh-warl atnwenheynekerr. Nga arntety ikwer angka, renh mwerriletyek. 9 Ayeng atyetyart arrpemarl ingwer-rnemek. Atha apek anyent ilanthem, rap awelhemarl. Atha anyent ingwerek arlkem, rap atyeng-warl apetyem. Atha warrkenh anyent ilanthenty, rap awelhemel warrkirremarl. Ngan atyetyart ilkwa innga, ingwer-rnem ngkweng awelhemarl.”

10 Artwa renh awek-penh Jesus ra apatek, rantarl renh-rnem ilek, “Artwa nhenhelant ayenh tnakeyel innga, ayengarl rlterrk ilkwakert, arleng-they mwerriley-angker. Ranap Jew-wenyarl, alethangarl. Nhareny-rneman arrangkwarl. 11 Akngerr akarrirreyenh apmer arrpanenh-they amern kwenty arlkwetyek arrwekeleny-rnem-itwek. Abraham-akerr, Isaac-akerr, Jacob-akerr, Rernem ingkerr anerl-aneyenh Akngey-itwel. Akngey-kenh-rneman ingkerrenh mwerr anayntem, inkwerelhemel amern kwenty arlkwerl-anemel. Jew-rnem alethang-rnem-then pweytirreyenh anerl-anemel arrpemarl. Akngeyelanap renh-rnem ingkerrenh arntarnt-arerl-aneyenh. 12 Jew-rnem Akngey-kenh arrwekel anenh-rnem arrangkwarl. Rernem ywarn iterremel arrangkeyenh, Akngeyarl ikwer-rnem-kety intwemelirreyenh-kety.”

13 Jesus-el atyetyart renh ilek, “Kel alpa, atha warrkenh ngkwenh mwerrilek, ntwarl ayenh tnakek.” Kel warrkenh ra mwerrirreyelpek.

14 Jesus-el awek, arelh ampwa Simon-kenh arntety rwenparl ayntenh. 15 Jesus alhek ikwer-warl, itep ikwerenh anterrkwek. Arelh ranem mwerrirrek. Ra akemirrek, amern-anem ra ampernek Jesus-ek.

16 Atwemengkel ingwer-rnemel atnwenhey-alhek arrenty-akert-rnem Jesus ikwer-warl. Ranem arrenty-rnem irrentek ikwer-rnem-they, Akngey-kenh angka rlterrk-akertel, arntety-rnem-then mwerrilek. 17 Alakenh angkakert Isaiah-el angka arrwekel ingkwernek, ra innganem irrek, “Ra arntety-rnem ingkerrenh mwerriley-angker.” Alakenh angka arraty innganem irrek.

18 Jesus-el artwa akngerr arek. Ra angkek kwertengerl ikwerenh-rnemek, “Mpa, kwaty ilkwangkwarr anwantherr artarnpenhey intwarr-ampeny-warl.” 19 Artwa anyent atyetyart Moses-kenh rap angkek Jesus-ek, “Atha ngenh apentetyek, ingweram-angkwarr nga alhenty.”

20 Jesus-el renh tyernek, “Arengk artnwer rernem inteyelarl aynteyel. Thip-rnem atharlkwel aneyel, Artwa Impen Akngey-kenh ayeng apmer-weny arrangkwarl, ayeng arwarl apmer arrpanenh-warl alheyel.”

21 Kwertengerl anyent ikwer angkek, “Ingkartay! Akngey atyenh ilwetyek arrer-anem. Ayeng alpetyek, renh arntarnt-arey-alpetyek. Renh aytarenty-penh, ayeng apey-alpem arrpemarl, atha ngenh apenterl-ayntem arrpemarl.”

22 Jesus angkek ikwer, “Menty, ingwerel-rnem renh aytarey. Ayenhantarl apenterl-aynta, mwerr-ayteng.”

23 Nganerl-alhek rernem rtnwewarl-anem anperl-alhek. 24 Kwaty awer-akert apetyek rntwey-alhek rlterrk innga. Awer ilkwel renh-rnem akngelhew-akngenhilek. Kwatyan lherrparnpek-anem rtnwewarl, rtnwan aylperl-alhetyek-anek-anem. Jesus rtnwel ankwaynterl-apenh apal. 25 Kwertengerl ikwerenh-rnemel Jesus akwentelhilek. Rernemap renh ilek, “Ingkartay, kwatyel anwenhantherr ilwerl-athenekerr!”

26 Jesus-an angkek ikwer-rnem, “Ilek-ketyarl arrantherr aterirreyel, atyeng irrpelthirremel-apeny, atharl arrenhantherrenh arntarnt-areyelan?” Jesus artewentyel arlkek awerek, atnengkirretyek. Kwaty awer-akert atnengkirreyelpek, arwapeny. 27 Kwertengerl ikwerenhel-rnem Jesus renharl arek-penh, rernem ikwerety aterirrek, rarl kwaty awer-akert arternpilek rlterrkel. Rernemap ayernerrek, “Nthakenh awer-then kwaty-then ikwerant awelheyel.”

28 Jesus rtnwel artarnpenhek Galilee kwaty ilkwangkwarr kwertengerl ikwerenh-rnem-akert, apmer Gadara-warl. Artwa arrenty-akert atherrel Jesus renh arlengek arnarek, apetyenharl. Ratherr kanper-antey anekirrey-ayntek Jesus-warl apmer awenng-angketyarr-they. Arrewaly-kenh awenng-angketyarrel ratherr anenh, nthakenh ikwer-atherr-warl alhey-angenh, ahelengkwek-atherrety. 29 Artwa ratherr arlkek, “Jesus, ngan Alerikw Akngey-kenh. Ntwa arraty ilay. Ilekek ngan apetyek? Aylernanthenh ntwa atwetyek? Arlta ingkernelant Akngeyel anwernenhantherr atweyenh!”

30 Apwertel atnwenth pikepik akngerr rtnenherrenh. 31 Arrenty-rnemel Jesus renh ilek, “Irrentey-angenh anwernenhantherr, apmer arleng-warl! Anwernenhantherr atnwenth yanh-rnem-warl thwena!” 32 Jesus-el kel renh-rnem irrentek, “Alpenherr-arey wenh!” Rernem kel tyerrelhek artwa ikwer-atherr-they, alhemel atnwenth-rnem-warl. Atnwenth rernem kel anterrerrek arrenty-akertan. Rernem arnkarr-they aytnek, kwaty alay kwen-warl. Rernem ilwek kwatyel kwen.

33 Artwa atnwenth arntarnt-arey-angker-rnem tawen-warl anterrerrek. Rernem iley-alhek tawen-areny-rnem, atnwenth-rnem kel ilwek kwaty ilkwa kwen, Jesus-elarl arrenty-rnem irrentek artwa ikwer-atherr-they. 34 Tawen-areny-rnem ingkerrenh rernem-anem alhek, rernem-anem Jesus renh aretyek. Rernem Jesus ikwerety aterirrek, itnweng rlterrk-akert-kety. Rernem angkenh, “Nga apmer ilenh-they alpetyek, apmer ingwer-warl-anem.”