1 Jew rernem ngwangkant akarrirreyel, rernem Anperarl Alhek “Passover” tyenkerr arlkwetyek. Jesus-el iterl-arek-anem, arlta ikwerenh arrer-anem, ra Akngey-warl alpetyek ahern nhenh-they. Jesus amperrngirrek ikwerenh-rnemek, renharl apentenh-rnemek ahern nhenh-areny-rnem. Ra ikwer-rnem ilkelhenh intem-antey ilwetyek-atwety.

2 Ingkeny aylpenhekel, Jesus kwertengerl ikwerenh-rnem-akert anyentirrek, amern arlkwetyek. Judas Iscariot kwertengerl anyent ra anenh arrpemarl ikwer-rnem-itwek, ra Simon-kenh alerikw. Arrenty ra Judas arrwekel-antey ilek, Judas ra Jesus renh ahayiwetyek ahelengkw-rnem-warl.

3 Jesus ra iterl-arelhek, Akngeyelarl renh rlterrkilek, ra ingkerrenhek atyetyart anetyek. Ra akalty arrpemarl, ra Akngey-they apetyek, ra Akngey-warl alpem arrpemarl. 4 Rernem amern arlkwenharl-antey, Jesus arnkwa arlpenty lhelek, ahern-warl arrernemel. Aneny ra arertnelhek rag-el. 5 Kwaty-anem ra inpek rtnwewarl. Anyentarl-anyentarl Jesus-el kwertengerl ikwerenh-rnem ingkety irrarlkeynek rag-el artwerretyilemel. 6 Jesus ra apetyek Peter-warl. Peter-el ayernek-anem, “Ingkartay! Ingka ayenh-then ntwa irrarlkey-angenh.”

7 Jesus-el renh tyernek, “Lyertan arrantherr iterl-arey-angenh, atharl arrenhantherrenh ingkety irrarlkeyneyel. Ingwer-ingerant arrantherr iterl-areyenhan.”

8 Peter ikwer arrngert angkek, “Ingka atyenh irrarlkey-angenh, menty!”

Jesus ikwer-warl angkek, “Nga arlkarirrenty, atyenh-wenyarl nga!”

9 Peter ikwer-warl angkek, “Ingkartay! Ingka atyenh kwatyel irrarlka, akwatherr-then akapwert-then ingkerrenh-antey!”

10 Jesus angkek ikwer-warl, “Ingwer-rnem ingkerrenh irrarlkenty, rernemap alyelk ingkerrenh-anemarl, aternng-weny. Ahernel alhenty, rernem ingketyant aternng. Arrantherr alyelk, anyentant arrangkwarl alyelk-wenyarl.” 11 Jesus ra arrwekel-antey iterl-arenh, anyentelarl renh ahayiweyenh ahelengkw-rnem-warl. Alakenh-anyem ra angkek anyent ikwer. Anyent apmwa anenh ikwer-rnem-itwel.

12 Jesus ra renh-rnem ingka irrarlkek-penh, ra arnkwa arlpentyel-anem aylpek angkep arrpemarl. Ra arrernelhek arrpemarl, rap renh-rnem ayernek, “Ilekek atha arrenhantherr ingkety irrarlkek? 13-14 Arrantherr ayenh ‘Ingkart’ itneweyel, ‘Akalty-anthenh-anthenh-then.’ Alakenh-anyeman arraty-angkwarrarl. Innga ayeng Ingkart arrekantherrenh akalty-anthenh-anthenh-then. Arrantherr warrkenh atyenh-rnem. Atha arrenhantherr ingka lheweynek. Arrantherr irrkaty-angkwarr anetyek, ayeng aneyel-angkwarr-antey. Arrantherr-anemarl ingkern ingka lhewerr-ayntetyek. 15-16 Ayeng arrekantherr lwewarrernelhek, arrantherr arraty-angkwarr apentetyek. Arrantherr atyenh-angkwarr anayntetyek. Atha arrenhantherr arraty-angkwarr ileyel, warrkenh ingwerenty nthakenh atyetyart ikwerenh-angkwarr ilkwa aney-angenh. Artwamp-angkwarr akely-antey aneyel. Artwa ra ingwer thwenem angkakert. Angkakert ra atyetyart ikwerenh akely-anteyarl aneyel. Warrkenh nthakenh ilkwa arrpem ilelhey-angenh. 17 Arrantherr mwerr-angkwarr alakenh apententy, Akngeyel arrenhantherr arntarnt-areyenh inkwerelhemel.

18-19 Arrantherr alyelk aneyel mwerr-angkwarr. Anyentant alyelk-weny aneyel apmwa. Ingwer-inger artwa anyent ra atyengety intwemelirrenty arrantherr areyenh. Akngey-kenh angka aynteyel alakenh: ‘Artwa ikwer-angkwarr atha amern-then aker-then arlkwem, ra atyengety intwemelirrem-anem apmwangkwarr.’ Alakenh-anyem ayeng artwa ikwer-penh angkeyel arrwekel, arrantherr atyeng awelhetyek. Arrantherr renh areyenh atyengety intwemelirrenty, arrantherr angka atyenh iterl-areyenh, inngarl ayengan, Akngey-kenh alerikwan. 20 Atha arrenhantherr arraty innga ileyel. Atha arrenhantherr angka atyenh-akert thweneyel, arrantherr apmer arrpanenh-warl ilerl-apayntetyek. Ingwerenty arrekantherr awelhenty inkwerelhemel, ra atyeng-then-antey awelhem inkwerelhemel. Ra akngey atyenhek awelhem arrpemarl, rarl ayenh thwenek.”

21 Jesus ra ilelhek-penh ra alpwelyirrek. Ra kwertengerl-rnem ilek, “Innga atha arraty arrenhantherrenh ileyel, kwertengerl anyentel ayenh ahayiweyenh ahelengkw-rnem-warl, rernem ayenh antwerrkemel atweyek.”

22 Kwertengerl rernem ywarn iterrek-anem. Rernem anngant-arey arerrek ywarn iterremel. 23 Kwertengerl anyent ingwer Jesus-itwek anenh. Jesus ra ikwer artewentyel ilkelhenh intem. 24 Peter-el iltyelant renh ilek, “Jesus ayerna, angwenhek ra angkeyelan.”

25 Ra Jesus renh ayernek, “Ingkartay! Angwenhel ngenh ahayiweyenh?”

26 Jesus-el tyernek, “Atha amern akely arlkwerrng-warl apelyilem, athap anyent renh anthem, artwa anyent renhey-antey irrkaty-antey rarl ayenh ahayiweyenh.” Jesus-el amern akely arlkwerrng apelyilek, renh Judas anthemel. Simon Iscariot-kenh alerikwarlap ran. 27-30 Judas-elan amern anamerl-antey inerl-alhek. Arrenty Satan ikwer-warl antelhek.

Jesus angkek, “Judas, anamerl alha, nga ilkelheyel-angkwarr, ntwa mpwaretyek.” Judas-el man atnyenenh yakwethenp. Kwertengerl-rnem iterrek, Jesus-el Judas ilanthek, rang tyenkerr atyenhilentyek-athen amern payemeletyek. Ingwer-rnem iterrek, Jesus-elarl Judas thwenentyek-athen, man man-weny-rnem antheynetyek-arrpantey.

31 Judas alhek-penh Jesus-arl kwertengerl-rnemek angkek, “Ingwerel-rnem ayenh iterl-areyenh Akngey-kenh Artwa Impen, ayengarl rlterrk ilkwakert aneyel, Akngeyelarl ayenh rlterrkilek. Rernem iterl-areyenh Akngey rlterrk ilkwakert aneyel arrpemarl. Rernem ikwer inkwerelheyenh. 32 Arraty innga! Ayeng Akngey-kenh Artwa Impen. Akngey ra lwewarrernelheyel ingkerrenh-angkwarr, Artwa Impen ayeng rlterrk ilkwakert aneyel. Lyert ayeng lwewarrernelhem.

33 Atyenh-rnem, alerl ayeng alyep arrekantherr-itwek anem. Ikwer-penh arrantherr atyeng ywarn nthweyenh, arrantherrap nthakenh ayenh arey-angenh. Arrantherr iterl-areyel apek, atha Jew atyetyart-rnem arrwekel-antey ilek-penh? Atha ilek alakenh, ‘Ayeng apmer ingwer-warl alpem. Arrantherr ywarn apmer ikwer-warl alpeyenh.’ Aleyan atha angka irrkaty arrekantherr ileyel. Ayeng apmer ingwer-warl alpem. Arrantherr ikwer-warl alpey-angenh arrangkw. 34 Alakenh mwerr. Kel atha arrekantherr angka Akngey-kenh ingwer-anem arrernem alakenh. Arrantherr ingwer-rnem arntarnt-arayntetyek, atharl arrenhantherr arntarnt-areyel-apeny. 35 Arrantherr mwerrant-arey anetyek. Alakenh-angkwarr ingwer-rnemel arrenhantherr iterl-arem, arrantherrarl kwertengerl atyenh-rnem aneyel.”

36 Simon Peter-el Jesus ayernek, “Ingkartay! Nthenh-warl ngan alheyenh?”

Jesus-el renh tyernek, “Ayeng apmer ingwer-warl alpem. Nga ikwer-warl alerl alpeyenh, ingwer-ingerant-anem alpeyenh arrpemarl.”

37 Peter-el Jesus ayernek, “Ingkartay! Ilek-kety ayeng ngkweng-warl alpeyenh? Ingwer-rnemel ngenh atwekerr, atha ngenh arntarnt-arem. Kel rernem ayenh ipmek atwetyek, alakenh-anyem mwerrarl. Ayeng aterirrey-angenh, katy ngkweng ilwetyek ayeng arlka menty anthelhetyek.”

38 Jesus-el Peter renh ilek, “Nga katy atyeng ilwey-angenh. Atha ngenh arraty ileyel, ingwer-inger tywek-tywek irrwey ingwepenh arlkey-ayntekerrem-awaty, nga irrpety-inger ilelhetyek, ntwa ayenh iterl-arey-angenh akwerrp-arrpantey.”

<- John 12John 14 ->