1 Akngey aremirrek Abraham ikwer apmer Mamre-itwek, arwerl arnenty ikwer-itwek. Arlta ampep ikwerel Abram kalikw ikwerenh arriwel anenh. 2 Ra arek artwa irrpety rtney-alhenty aketh-itwek.

3 Ra ikwer-rnem-warl anterrek, renh-rnem rlwatetyek. Ra ahern-warl-athek kwenirrek, angkemel, “Anper alhey-angenh, lywenty-itwek ltyerrenherr-arey! 4 Kwaty atha arrekantherr iney-akenh ingka ahern-penh lhewelhetyek, arrantherr lywel ltyerretyek. 5 Amern-then atha arrekantherr iney-akenh alethel arrantherr alpetyek.”

“Ya, kel mwerr,” rernem angkek.

6 Abraham wak-warl aylpenhek, Sarah-arl anenh-warl, renh ilek, “Amern arlety irrpety inay, amern rtamp ampernetyek.” 7 Ra aker mwerr innga rlwanek, anter-akngerr akely. Abraham-kenh warrkenhel pwelek irrwey akely atwerliwek aker artwa irrpety ikwer-rnemek. 8 Abraham-el aker-then milk-then anthek, artwa irrpety renh-rnem. Abraham lywel anenh, rernem amern arlkwenh-kety.

9 Rernem ayernek, “Anew ngkwenh Sarah-alew?” Abraham ra angkek, “Kalikw kwenel.” 10-11 Artwa alethang angkek, “Aherrety anyent-penh ayeng apey-alpeyenh Sarah ampa akely atnyeneyenh. Sarah-el-tangkwel ampa atnyeneyenh arrwekel-antey ayeng apey-alpey-alenty.” 12 Sarah-el angka awek-penh, irrpelthirremel. Sarah atherrek, “Nthakenh atha ampa atnyenem ampwelam-athen, aylanth atherr-antey ampwa, nthakenh ampa atnyenem.”

13 INGKARTel Abraham ilek, “Nthakenhek Sarah angkek atherremel-anem, atyeng irrpelthirreyel? Ayengan INGKARTarl, ampa innga atha anthey-angker! 14 Aherrety anyent-penh ayeng apey-alpeyenh aherrety ingwer ikwerel-antey. Sarah-el ampa atnyeneyenh arrwekel-antey ayeng apey-alpey-alenty.”

15 Sarah ra aterirrek, irrtywerremel ilelhek, “Ayeng atherrey-angenh arrangkw.” Artwa alethang ra ilek, “Inngarlap nga atherrek.”

16 Artwa alethang irrpety rernem apmer Sodom-warl alpek. Abraham ikwer-rnem-angkwarr antelherl-alhek, artengewemel iwerr iylparrernetyek ikwer-rnemek. 17 INGKART iterrenh, “Abraham atha iley-angenh apmer Sodom-arl atha atwem. 18 Ikwerenh-rnem akngerrirreyenh apmer arrpanenh-warl arlperrtyirreyenh. 19 Atha Abraham renh arntarnt-arek, ra ikwerenh-rnem akalty-antheyek atyeng-angkwarr, rernem arraty anetyek. Ikwer-penh atha renh-rnem arntarnt-arem, atharl renh-rnem ilek-angkwarr.”

20 INGKARTel Abraham renh ilek, “Atha awek tern atherrarl artwa apmwangkwarr aneyel. Atha angka ilkwa awek. 21 Ayeng alhem, atha renh-rnem aretyek, nthek-angkwarr rernem aneyel, innga apek, arrangkw apek.”

22 Artwa alethang ratherr anperl-alhek, apmer Sodom ikwer-warl-anem, Abraham INGKART-itwelarl anenh. 23 Abraham-el INGKART renh ayernek, “Artwa apmwernem ntwa atwenty, artwa mwerr-rnem ntwa atwem arrpemarl? Arlernem-alew? 24 Tern yanh alerl atnyenenty artwa mwerr-rnem 50-akert? 25 Ntwa mwanty arntarnt-aretyek. Ngan INGKART arraty innga, arlernem-then arntarnt-aretyek, tyatyemiley-angenh renh-rnem.”

26 INGKART angkek, “Atha apek artwa mwerr-rnem 50 arentyel, atha apmer Sodom renh ywerrelhilemel atwey-angenh.”

27 Abraham angkek, “Ayengan ahern-arenyarl. Nthakenharl artwa 45 mwerr-rnem arentyan? Ntwa tern ilkwa yanh ywerrelhilemel atwetyek?” 28 INGKART angkek, “Atha apek artwa mwerr-rnem 45 arentyel, atha apmer Sodom renh ywerrelhilemel atwey-angenh.”

29 “Artwa mwerr-rnem 40-alew?” Abraham-el renh ayernek. “Kel menty atwey-angenh.” INGKART angkek, “Atha tern ilkwa ywerrelhilemel atwey-angenh.”

30 Abraham angkek, “Nga atyeng ahelirrey-angenh, INGKARTay. Nthakenharl artwa 30 mwerr-rnem arentyan? Ntwa tern ilkwa ywerrelhilemel atwetyek?”

INGKART angkek, “Atha apek artwa mwerr-rnem 30 arentyel, atha apmer Sodom renh ywerrelhilemel atwey-angenh.”

31 Abraham angkek, “Ayengan arrangkw. Artwa 20 mwerr-rnem-alew?” INGKART angkek, “Atha apmer renh ywerrelhilemel atwey-angenh.”

32 Abraham angkek, “Nga atyeng ahelirrey-angenh INGKARTay, artwa mwerr-rnem 10-alew?”

“Kel, menty atwey-angenh,” INGKART angkek. “Atha tern ilkwa ywerrelhilemel atwey-angenh.”

33 Abraham angkekarl-penh INGKART alpek-anem. Kel Abraham apmer-warl alpek.

<- Genesis 17Genesis 19 ->