3 Abram ahern-warl inngerr kwenirremel atnertel ilperr-ayntek. 4 Akngey angkek ikwer-warl, “Atha ngenh alhelem, nga Atyetyart anetyek, ingkerrenh ngkwenh-rnem ngkweng-they akngerrirreyenh, apmer arrpanenh-areny-rnemek. 5 Rernem ngenh itneweyenh Abram-weny, Abraham-ant-anem. Alakenh-anyem nga Atyetyart aneyenh apmer arrpanenh-areny-rnemek. 6 Atha ngenh akngerr innga antheyenh, ngkwenh ingkerrenh. Rernem apmer arrpanenh-areny aneyenh Atyetyart ilkwernem-then. 7-8 Atha ngenh arntarnt-arem, atha ngenh alhelek-angkwarr. Atha arrenhantherr apmer Canaan-anem antheyenh, arrantherr apmerek-artwey-wenyarl aneyel, atha arrenhantherr apmer Canaan anthem arrekantherr.” 9 Akngey angkek Abraham-warl, “Nga atyeng-angkwarr anayntetyek ngkwenh-rnem-then. 10-11 Arrantherr awey arrekantherrenh artwa mpwaretyek, yanh alhelenty aneyenh, atharl arrenhantherr ilek-angkwarr. 12 Arlta 8 ikwerel-antey arrantherr awey renh-rnem artwa mpwaretyek, alethang-rnem-then ingkerrenh, rernemarl warl ngkwenhel aneyel-rnem-then. 13 Apmer ngkwenh-itwek atnyenek-rnem-then ntwa ingkerrenh artwa mpwaretyek, warrkenh ngkwenh-rnem-then ingkerrenh. 14 Rernem alakenh-anyem mpwarey-angenh, rernem atyeng irrpelthirrenty, atha renh-rnem ilek-kety. Angka atyenhek awelhey-angenh anenty, atha renh-rnem atwem.”
15 Akngeyel Abraham renh ilek, “Ntwa anew ngkwenh Sarai itnewey-angenh, ntwa renh Sarah-ant-anem itnewem. 16 Atha renh arntarnt-areyel, atha ngkweng aler anthem ikwer-angkwarr. Akngerr ikwer-they akngerrirreyenh arrpemarl, apmer arrpanenh-areny Atyetyart-rnem-then.”
17 Abraham ra ilperr ayntek arrpemarl. Ra irrpelthirremel atherrek, “Nthakenhan artwa aherrety 100-kenh ampa atnyenetyek? Sarah-el nthakenh ampa atnyeney-angenh aherrety 90-el?” 18 Abraham-el Akngey renh ayernek, “Ishmael-el-arleng atyenharl?”
19 Akngeyel renh ilek, “Arrangkw wenh! Anew ngkwenhel Sarah-el awey atnyenem, ntwa renh itneweyenh Isaac. Atha renh ingkerrenh alhelem. Atha ngenh awek ngarl perayirrenh Ishmael ikwer. Atha renh arntarnt-areyenh, akngerr ikwer-they irreyenh, apmer arrpanenh-areny-rnem. 20 Ra Atyetyart irreyenh 12 prince ikwer-rnem. Atha renh Atyetyart ilkwa anetyek arrerneyenh, apmer arrpanenhek. 21 Atha arraty mpwareyenh, atha alhelek-angkwarr Isaac ikwer-angkwarr, renharl Sarah-el atnyeneyenh, irrkaty-angkwarr aherrety ingwerel.” 22 Ikwer-penh Akngey alpek-anem.
23 Abraham-el Ishmael, alerikw ikwerenh, warrkenh ikwerenh-rnem-then, apmer ikwerenh-itwek atnyenekarl-rnem-then. Ra renh-rnem artwilek, Akngeyelarl ilek-angkwarr. 24 Abraham aherrety 99 anenh, artwa ampwanem. 25 Ishmael aherrety 13 anenh, amerrk-antey, rernemarl renh-rnem ingkerrenh-anem artwilek. 26 Abraham-atherr Ishmael-atherr arlta anyent ikwerel-antey artwirrek. 27 Abraham-kenh artwernem arlta ikwerel-antey artwirrek arrpemarl.
<- Genesis 16Genesis 18 ->