1-3 Sarai, Abram, ratherr anewart ampeweny anenh. Arelh warrkenh anyent ikwerenh, itnan Hagar. Sarai angkek Abram-warl, Akngeyel ayenh menty ilek ampekety. “Warrkenh atyenh ntwa ikngwa, ntwa ampa atnyenetyek.” Alakenhaym Abram ra arelh warrkenh-anem ikngwek. Abram apmer Canaan-itwek aherrety 10 anenh. Abram awelhek, anew ikwerenhelarl renh ilek. Sarai ra warrkenh Egypt-areny ikwerenh Abram renh anthek. 4 Abram-anem Hagar-itwek ayntek, ampanem ikwerenh anenh. Ikwer-they Hagar tnakelhenh, ikwer Sarai irrpelthirremel. 5 Sarai angkek Abram-warl, “Ntwa atyeng apmwel-areth mpwarek. Atha ngenh warrkenh yanh anthek anew ngkweng ra atyengety arlkarirrekarl. INGKARTel iterl-areyel ntwarl atyeng apmwel-areth mpwarek.” 6 Abram angkek, “Warrkenh yanhan ngkwenharl. Ntwarrp kel atnyenetyek. Ayengan arlarl.” Sarai-el Hagar renh ayntarrp-ilek. Irrwernek. Hagar anterrek-anem ikwerety.

7-8 Akngey-kenh angel-el Hagar renh arey-alhek apmer arlpaw-itwek kwaty ngenty-itwek, apmer Shur-ampeny-itwek. Angel-el renh ayernek, “Hagar Sarai-kenh warrkenh, nthenh-they nga alpeyel, nthenh-warlay?” Hagar angkek, “Ayeng Sarai ikwerety aterel alpeyel.” 9 Angel-el renh ilek, “Sarai-warl alpa, ikwer awelhetyek. 10 Atha ngenh ngkwenh-rnem akngerr innga antheyenh, ingwerel-rnem nthakenh count-emiley-angenh.”

11 “Ntwa awey akely atnyeneyenh, ntwa renh itnewa Ishmael. 12 Ra artwa ateralth aneyenh, tangkey saddle-ek akwerrp-apeny. Ra artwa aneyenh, tangkey ateralth-warl arrernem-apeny. Ra awelhey-angenh ingkerrenhek aneyenh, ingkerrenh ikwer awelhey-angenh arrpemarl. Ra nthakenh ikwer-rnem-itwek aney-angenh, nthakenh ingwerenty-itwek ra aney-angenh.”

13 Hagar-el INGKART renh ilek, “Nga atyeng aremirrek.” Ra iterrek, “Atha INGKART arek-penh, ayeng iteth-antey aneyel, ilwey-angenh.” 14 Alakenh rernem kwaty ngenty renh itneweyel Beer Laha Roi, kwaty ngenty ampepel apmer Kadesh-they apmer Bered-angkwarr aynteyel. 15-16 Abram-el atherr Hagar-el-atherr awey akely atnyenek, awey ikwerenh itna itnewemel Ishmael. Abram ra aherrety 86 ampwa innga anenh, renharl ratherr atnyenek-penh.

<- Genesis 15Genesis 17 ->