1 Abram-el altyerr arek, INGKARTelarl renh ilek, “Nga aterirreyang anetyek, atha ngenh arntarnt-areyel, ilek-ilek akngerr atha ngenh anthetyek.” 2 Abram angkek, “INGKARTay, ntwa ayenh ilek-ilek akngerr anthek. 3 Ntwa ayenh ampan anthey-angenharl. Ayeng ilwentyel, warrkenh atyenhel ilek-ilek ingkerrenh inem.”

4 INGKARTel ilek, “Ntwa alerengkw ngkwenh atnyeneyenh. Warrkenh ngkwenhel nthakenh ingkerrenh iney-angenh. Alerengkw ngkwenhel ingkerrenh atnyeneyenh, nga ilwenty-kety.” 5 Akngeyel renh atnwenhek aketh-warl. Ra renh ilek, “Alker-warl itnywena! Antyarr-rnem ntwa areyel? Ntwa count-em-anem renh-rnem ila! Ngkwenh-rnem antyarr ilenh-rnem-apeny akngerrirreyenh.”

6 Abram Akngeyek inkwerelhemel awelhek. Akngeyel renh artwa arraty innga arek, rarl Akngeyek awelhenh.

7 Akngeyel ilek, “Ayeng Akngey ra, atharl ngenh apmer Ur-they, Chaldea-rnem-kenh apmer-they atnwenhey-alhek, apmer nhenh ngenh anthetyek, ngkwenh-rnem-akert.”

8 Abram angkek, “Akngeyay, nthakenh atha iterl-areman apmer yanh atha atnyenetyek?”

9 Akngey ra ilek, “Pwelek amarl akely atyeng-warl akngetyay! Nanikwet anyent yep-yep irrwey anyent rwelyarr anyent, pwelker anyent.”

10 Abram Akngey ikwer awelhek. Aker-rnem akngek, Akngey renh anthetyek, tyenkerr-anem. Abram-el aker renh-rnem rlweth-rlweth akek, amentew-ament arrernek ahern-warl, pwelker-then rwelyarr-then rlweth-akey-angenh-antey. 11 Irrety-rnem-then inkwel-rnem-then akarrirrek aker-warl. Thip ingwerek-ingwer-then. Rernem aker-warl apetyek. Abram-el renh-rnem irrentek.

12 Ingkeny aylpenhetyek irrek. Kel ankwanem irrek. Abram artewentyel aterirrek-anem. Ingwel artek. 13-14 INGKARTel ilek, “Ngkwenh-rnem ingwer-rnemek warrk antherl-aneynenh, arlkarewerl-aneyenh. Ngkwenh-rnem nhak-itwek ingwer-rnemel warrk antherl-aneyn, rernem aleth innga warrkirr-ayntetyek aherrety 400-ek-atwety. Apmer ingwer-areny-rnemel renh-rnem ilpertileyenh. Ngkwenh-rnem apmer ingwerel arlengeny-apeny aneyenh. Atha apmer ingwer-areny-rnem ingkerrenh arntety antheyenh. Atharl apmer renh atwem-kety, rernem apmer-they alpeyenh ampwal akngerr-akert. 15 Nga ampwirremel ilweyenh, ngkwenh-rnemel ngenh ikwer-itwel-antey akwernayn, nga artwa ampwanem mwerr aneyenh. 16 Rernem aherrety 400-penh apey-alpeyenh, Amor-areny-rnemel apmer nhenh atnyeney-kety.”

17 Ikwer-penhan ingkeny aylpenhek, ingwemernt-anem irrenhek. Rwalep-then rwa lherrm-then, ampep-itwek aker ampep-angkwarr aremirrenhey-alhek. 18-20 Arlta ikwerel-antey Akngeyel Abram renh alhelek, “Atha ngkwenh-rnem ingkerrenh apmer nhenh antheyenh. Egypt lher-they Euphrates lher ilkwa ikwerek-atwety, ingkerrenh-kenh apmerek-artwey. Atha ngkwenh-rnem apmer ingkerrenh-antey ilenh antheyenh.” ...

<- Genesis 14Genesis 16 ->