1 Israel-kenh-rnem rernem apmer Elim iwerl-alhek, arlpaw-warl alperlewenh, itnan Sin. Arlpaw Elim-they Sinai-they ampepel-angkwarr-antey. Egypt-they rernem alperlewenh-antey, alkent anyentel. 2-3 Arlpaw-itwek amern-weny, arrangkw. Israel-kenh-rnem tyel-angkek-anem Moses-ek-atherr Aaron-ek-atherr ikwer-atherrety. “Ilekek mpwel apmer apmwarl nhenh-warl atnwenhey-alpek! Amern-weny arrangkwarl-anem! Anwantherr ingkerrenh ilweyenh wenh, amern-wenyel! Egypt-itwel amern akngerrarl anwantherr arlkwenh awankan aker-then. Egypt-itwel INGKARTel anwenhantherr ipmek atwenty, mwerrarl! Lyertan anwantherr apmer nhenhelarl ilweyenh amern-weny!”

4 INGKART angkek Moses-warl, “Atha thwenem amern alker-areny arrekantherr, kwaty rntwem-apeny. Arrantherr amern akngerr arlkwem. Arlta arrpanenhel atha thwenem, arrantherr amern arlkwerl-ayntetyek-anem. Amern akely arlta anyentekant inetyek arrekantherr. Arlta arrpanenhel atha arrenhantherr arrkernerl-ayntem, nthakenh arrantherr irrem wenh, atyeng-angkwarr anetyek apek. 5 Arlta 6-el Friday arrpanenhelant arrantherr amern akngerr inetyek arlta ingwerel-rnem-apeny-weny. Friday-elant amern akngerr inetyek, ampernetyek. Friday-el Saturday-el arrantherr arlkwetyek, arlta impenel.”

6 Moses-atherr Aaron-atherr ilelhek Israel-kenh-rnemek, “Aylern arrenhantherr Egypt-they atnwenhey-angenh, arrangkw. Ingwel rlengk arrantherr iterl-aretyek, INGKARTelant arrenhantherr Egypt-they atnwenhey-alpek. 7-8 Ingwelarreng arrantherr areyenh, INGKARTelarl arrtyerneyenh ingkenyel-apeny, rlterrk ilkwakert. Ra arrekantherr-warl apetyeyenh. Arrantherr aylernek ahelerrek, alakenh-anyem arrantherr INGKART irrwerl-arenyekarl ahelerrek! Ra arrenhantherr awek. Ra aylernenh ilanthek wenh, arrenhantherrenh apmer nhenh-warl atnwenhey-alpetyek. Aylern ikwer awelhenh, aylern warrkirreyel ikwerarl.” Moses angkek ikwer-rnem, “Atyeng awelhenherr-arey! Arlta arrpanenhel atwerrp-atwerrp, INGKARTel aker arrekantherr anthem arlkwerl-ayntetyek. Ingwepenh arrpanenhel ra amern antherl-ayntem arrekantherr, arrantherr arlkwerl-ayntetyek. Arrantherr arlkwayntem wenh aker-then amern-then-anem wenh, angayakw irrey-angenharl.”

9 Ikwer-penhan Moses angkek Aaron-ek, “Ila renh-rnem, ‘Arrantherrarl aylernenh arlkarewek wenh. INGKARTel arrenhantherr awek. Alakenh-kety arrantherr akarrirretyek INGKART-warl-anem.’ ” 10 Kel Aaron-el renh-rnem akarrelek ingkerrenh-antey. Aaron rarl ikwer-rnem angkenh-antey, rernem kwenpay arlpaw ikwer-angkwarr arleng arenh. Kwenpay ilkwa amparrkenhey-alpenh ikwer-rnem-warl-athek. INGKARTan kwenpayelarl anenh, rlterrk ilkwakert.

11-12 INGKART Moses-warl angkek kwenpay-they, “Atha awek Israel-kenh-rnemelarl mpwelenh arlkarewek. Alakenh-anyem ila renh-rnem, ‘Alakenh INGKART angkek arrekantherr, “Atwerrp-atwerrp atha arrenhantherr akerel wanteyenh. Ingwepenh atha arrenhantherr amern akngerrel wanteyenh. Nthakenh arrantherr angayakw irrey-angenh, amern akngerr-anem wenh. Ikwer-penhan arrantherr iterl-arem, ayengan INGKARTarl, Akngey arrekantherrenh.” ’ ”

13 Arlta irrkaty ikwerel-antey atwerrp-atwerrp, Israel-kenhel-rnem thip atwelkarr akngerr arek, ikwer-rnem-warl alkerel apetyek. Alker-they rernem akngerr arrernelhenh ahern-warl, ahern ingkerrenh arrkngelek. Ingwepenh ingkeny tyerrelhenhey-alhentyel ahern-itwek rernem arek, kwaty aypmerr ahern-itwek. 14 Ingkeny irrwerlerrekel, ahern artwerretyerrek. Rernemap amernan aperelty-apeny ahern-itwek arek. 15 Rernem apatemel ayernerrek, “Ilek nhenhan wenh?”

Moses-el renh-rnem tyernek, “Amern nhenhan. INGKART ra thwenek, arrantherr arlkwetyek. 16 Alakenh-anyem INGKARTel ayenh ilek, ‘Tyampit-warl amern ineyn-ayntetyek arlta arrpanenhel aleth-antey. Artwek arelhek ampek anyentam-anyent-warl.’ ” 17-18 Israel-kenh-rnem tyampit-warl inerl-apenh. Ingwerel-rnem akngerr inek, ingwerel-rneman akelyarl inek. Ingwerel-rnem akelyarl inek, rernem mwerr arlkwetyek. Ingkerrenhel amern akngerr-antey inek.

19 Ikwer-penhan Moses angkek ikwer-rnem, “Lyert-antey ingkerrenh-antey arlkwenherr-arey wenh, ywerrelhiletyek, ingwepenhek atnyeney-angenh.” 20 Ingwer-rneman Moses-ek awelhey-angenh. Rernem amern ingkerrenh-antey arlkwey-angenh, amern irrtyertel-akwernek ingwepenhek. Amernan tyerr-angketyarr irrek, intengerrek. Moses ikwer-rnem ahelerrek.

21 Ingwepenh arrpanenhel rernem amern akwetyey-ayntenh, amern arlta anyentekant arwa. Ingkeny tyerrelhenhey-alhenh-apeny, rwenp-anem irremel amern ra irrkngwerrenh-anem, arrangkwirremel-anem.

22 Arlta 6-el Friday-el rernem tyampit atherr-warl ineyam-ayntenh. Artwamp atyetyart-rnem Moses-warl apetyek, angketyek ikwer-warl, “Rernem tyampit atherr-warl amern inek.”

23 Moses angkek, “Kel mwerr. Alakenh-anyem INGKARTel ilek, ‘Ingwelarreng Saturday-el arlta impenel arrantherr ayenh tnakemel inkwerelhetyek. Arrantherr warrkirrey-angenh anetyek arrangkw, arrantherr anetyek ltyerremel. Lyertan amern ingwer ampernenherr-arey rwel apek, rtamp mpwaretyek. Amern ingwer tyampit-warl kwatyel arrtyenherr-arey apek. Ingwepenhek amern ingwer atnyenenherr-areyarl.’ ”

24 Rernem alakenh amern ampernek ingwepenhek, Moses-elarl ilek-angkwarr-antey. Amern intengerrey-angenh arrangkw, tyerr-weny-anem arrangkw-anem mwerr-anem. 25 Moses-el ikwer-rnem ilek, “Lyertan arlta impen INGKART-kenh. Anenherr-arey warrkirrey-angenh. Arrantherr amernek nthwey-alhenty, arrantherr arem arrangkwarl. Amern apmwerrkeny renhant arlkwenherr-arey wenh, arrantherrarl apmwerrkel inekant. 26 Alakenh-anyem INGKART-kenh angka aynteyelan. Arrantherr Sunday-they Friday-ek-atwetyant amernek nthwetyek, arlta 6-ek-atwety-antey. Saturday-el mentyarl, nthakenh arrantherr amernek ahern-itwek nthwey-angenharl. Arlta ikwerel Saturday impen INGKART-kenh, ltyerrey-angker.” Alakenh Moses-el ilek.

27 Arraty innga. Arlta Saturday ikwerel ingwer-rneman ingwepenh amernek nthwetyekarl alhek. Arrangkw-antey rernem nthwenh ywarn-antey. 28 INGKARTel ilek Moses renh, “Ay! Nthakenh arrantherr irreyelan? Atharl arrenhantherr ilek-angkwarr! Atyeng awelhey-angenharl arrantherr, apal nthwenh! 29 Atyeng awelhenherr-arey! Atha arrenhantherr ilek, Saturday-el warrkirrey-angenh anetyek, arteny anetyek! Friday-el atha arrenhantherr amern akngerr anthayntem arlta atherrek-atwety arwa. Saturday-el arrantherr anyentel-antey anayntetyek, alhey-angenh.” 30 Ikwer-penhan rernem Saturday arrpanenhel ltyerremel anenh, warrkirrey-angenh-anem, arrangkw-anem anenh.

31 Israel-kenhel-rnem amern renh itnewek mana. Mana aynteyel “Ilek nhenhan?”. Mana amern arlter aperelty-apeny. Mana arrkerneyel ngkwarl antemarn-apeny.

32 Moses angkek-anem, “INGKARTel ilek, atha amern mana arrernetyek tyampit ilkwewarl, intem-antey atnyenetyek, ampernemel renh arayntetyek aleth-antey. Amern renh arenty, rernem iylpangkerl-ayntetyek, INGKARTelarl arrwekeleny-rnem atnwenhey-alpek Egypt-they, ra amern irrkaty renh anthenh apmer arlpaw-itwek. Ampernem rernem alakenh angkenty, ‘Ay! Amern irrkaty!’ ”

33 Moses-el Aaron ilek, “Tyampit ilkwa ina, amern mana renh ikwer-warl arrerna. Renh arrerna box impen INGKART-kenh-warl, ingkern-penhel-rneman amern renh aleth-antey iterl-arayntetyek.” 34 Kel Aaron-el tyampit inek, amern mana arrernek ikwer-warl. Ra tyampit box impen-warl arrernek INGKART-kenh-angkwarr. Israel-kenhel-rnem box aleth-antey atnyenenh amern mana-akert. 35-36 Israel-kenh-rnemel amern mana arlkwenh, aherrety 40-ek-atwety. Apmer arlpaw-itwek rernem ampererrenh ingketyel aleth-antey. Ikwer-penhan rernem apmer Canaan-warl arrer-anem irrek, INGKARTel renh-rnem amern mana anthey-angenh-anem, arrangkw-anem.

<- Exodus 15Exodus 17 ->