1 Arlta 5-penhan, Ananias Caesarea tawen-warl apetyek Felix-warl. Ananias ra atyetyart ilkwa anenh. Ikwer-angkwarr atyetyart Jew irrpety apetyek arrpemarl. Tertullus ra court-areny. Rernem Tertullus-itwek angkerrenh ra Paul Felix-itwek anngetherr iletyek. 2 Felix-el-anem ahelengkw-rnem ilanthek, Paul renh court-warl akngetyetyek. Tertullus ranem Paul renh ayntarrp-ilek. Tertullus-el Felix renh tnakek, “Felix-ay, ngarl atyetyart arrwekel anwernekantherr anenh-angkwarr, ntwa anwenhantherr mwerr-angkwarr arntarnt-arek. Anwantherr mwerrant-arey anenh. 3 Anwantherr ngkweng awelheyel, arrwekel ntwa anwenhantherr arraty-angkwarr arntarnt-arenh. 4 Ayeng-anem arleng-alenty angkey-angenh. Angka akely arwa ayeng angkerl-ayney. Atha renh ayntarrp-ilem. 5 Paul ra artwa Jew-rnem apmer arrpanenh-itwek ilpertilerl-apenh. Ikwer-penhan rernem ahel ilterrenh. Rantey arrpemarl Nazarene-ek atyetyart aneyel. 6 Apmwerrkel ra tyaty ilkwewarl aylpenty-arrpantey akwerrp-rnem-akert. Anwantherr renh anterrkwek-anem. 8 Arrantherr renh amentel ayernenherr-arey. Ikwer-penhan arrantherr renh iterl-arem-anem, ra apmwel-areth akalty-antherl-anenty.” 9 Jew-rnem Tertullus-angkwarrarl apetyek-rnem rernem irrkaty-angkwarr-antey angkek.

10 Felix Paul-ek iltyerrek, ranem angketyek. Paul ra ilelhek, “Nga aherrety arrpanenhel mwerr-angkwarr arntarnt-arek, mwerr atha ngenh tyernem. 11 Ingwer-rnemel ngenh ileman, ayeng apmwerrkel arwa Jerusalem-warl apey-alpek, Akngeyek inkwerelheyek. 12 Nhenh-rnem akaltyarl tyaty ilkwa kwen-itwek ilterrey-angenh. Atha apmwel-areth akalty-anthey-angenh aketh-itwek, Jerusalem ikwer-itwek. 13 Rernem akalty, rernem ayenh apalel arwa ayntarrp-ileyel. 14 Ayeng ngkweng arraty ilelheyel, ayeng Akngeyek inkwerelheyel, renh tnakeyel. Jew-rnemel ayenh ayntarrp-ileyel, ayeng Akngeyek inkwerelhey-angenh-arrpantey. Athan angka Moses-kenh-angkwarr apentem, Akngey-kenh angkakert arrwekeleny-rnem-then. 15 Athan Akngey-kenh-angkwarr apenteyel arrpemarl, rernemarl apentenh-apeny. Akngeyel mwerr-rnem-then artwa apmwernem-then akemelhileyenh. 16 Alakenhaym ayeng arrkernelheyel Akngey-angkwarr arraty ayeng anetyek ahern-areny ingkerrenhek arraty-angkwarr ayeng anetyek arrpemarl. 17 Aherrety arrpanenhel ayeng apmer arrpanenh-itwek anek. Ikwer-penhan ayeng Jerusalem-warl apey-alpek. Atha man ikwer-rnem akngey-alhek, tyenkerr anthetyek tyaty ilkwitwek. 18 Artwa Jew irrpetyel ayenh tyaty ilkwitwek arek, atharl tyenkerr Akngey anthenh. Ayeng ament-areny atha akngerr irlkentyiley-angenh atwerretyek. 19 Artwa Jew Asia-areny irrpety tyaty ilkwitwek anenh arrpemarl. Rernem nhenh-warl apetyey-angenharl, ngkweng-angkwarr anngetherr ilelhetyek. 20 Tertullus-rnemel ayenh ayntarrp-ileyel atharl apmwangkwarr akalty-anthenty-arrpantey. Aray, rernem ayenh Sanhedrin Council-itwek anngetherr ayntarrp-ilek, ywarn-antey. 21 Rernem ayenh ayernek, atha ikwer-rnem ilek, ‘Arrantherr lyert ayenh ayntarrp-ileyel, atharl Akngey tnakeyel, ipmepenh ingkerrenh itethiley-angker.’ ”

22 Felix ra arrwekel-antey Ingkart Jesus-kenh angka awek. Ranem renh-rnem ilek, “Atyetyart Lysias alerl-antey apetyey-angenh-antey mpwelheyel. Ra aremirrenty, athanem Paul renh iley-ayntetyek-anem, nthakenharl ra irreyenh.” 23 Felix-el-anem atyetyart ahelengkw anyent ilanthek, Paul renh arntarnt-aretyek. “Ntwa renh arntarnt-ara! Renh tyeynel arertney-angenh anetyek. Ntwa ikwerenh-rnem-then menty aretyek, rernemarl ilkwatherr ikwer-warl apetyem, amernel renh wantetyek.”

24 Arlta irrpety-penh, Felix anew ikwerenh Drusilla-akert warl court-ek-arelh ikwer-warl alhek, Paul renh awetyek. Drusilla arelh Jew anenh. Ikwer-penhan Paul-el ikwer-atherr Jesus-kenh angka akalty-anthek, Jesus renh apentetyek. 25 “Akngey-angkwarr arraty-angkwarr apentenherr-atherr! Apmwekety mwerranty irretyek, apmwekety ipmelhetyek. Arlta ingkernel Akngey ra ingkerrenh akngakeyenh.”

Paul renh awek-penh Felix ra aterirrek. Ranem Paul renh ilek, “Kel, ipmey, ingwer-ingerant ayeng ngkweng yangkelhetyek.” 26 Ra yangkelhenh, aweth-antey ratherr angkerretyek, arratyilerretyek Felix mpwelhenh, Paul-el renh man anthetyek, Paul ra man anthemel tyayl-they tyerrelhetyek.

27 Aherrety atherr-penh, Rome-areny-rnemel Atyetyart artwa ingwer-anem rnkernek, itnan Porcius Festus. Jew-rnem ilkelhenh ra tyayl kwen anerl-ayntetyek, Felix-el Paul renh tyayl-they tyarlewey-angenh-antey.

<- Acts 23Acts 25 ->