1 Renh-rnem iwerl-alhek, anwantherr rtnwewarl nganerl-alhek apmer Cos-warl artarnpenhemel. Ikwer-theyan arlta ingwerel apmer Rhodes-warl anper-alhek. Ikwer-theyan anwantherr Patara tawen-warl alhek. 2 Patara tawen ikwer-itwek rtnwa ingwer arey-alhek Phoenicia-warl alhetyek irrenharl. Anantherr rtnwa ikwer-warl nganek, apmer ikwer-warl-anem alhek.

3 Apmer Cyprus renh arey-alhek anwantherr alhek apmer Syria-warl. Anantherr tawen Tyre-itwek aney-alhek. Tawen ikwer-warl rtnwa apetyek, ampwal akngerr-akert. 4 Kwertengerl tawen-areny anwantherr arey-alhek. Akngey-kenh Itnwengel renh-rnem ilek, Paul renh iletyek, Jerusalem-warl alhey-angenh anetyek. Alakenh-anyem rernem Paul renh iley-ayntek. Anwantherr ikwer-rnem-itwek aney-alhek, arlta 7-ek-atwety. 5 Ikwer-penh anwantherr anperl-alhek arrpemarl. Kwertengerl rernem-anem anwekantherr-angkwarr rtnwewarl apetyek anew ikwer-rnem-kenh-then ampernem-then. Anwantherr ingkerrenh-antey ampwethel alernelhemel Akngey ayernek kwaty impalth ikwer-itwek. 6 Ikwer-penhan anwantherr renh-rnem iwerl-alhek rtnwel nganerl-alhem. Kel rernem angkep alpek apmer-warl.

7 Tyre tawen-they anwantherr kel anperl-alhek apmer Ptolemais ikwer-warl. Anwantherr arlta anyentel ikwer-rnem-itwek aney-alhek. 8 Arlta ingwerel anwantherr Caesarea tawen ikwer-warl-anem anperl-alhek. Artwa Philip artwa angka mwerr-angker akalty-anthey-angker tawen Caesarea-itwek anenh-warl. Tyaty-areny-rnemel renh rlwanek arrwekel artwa 6 ingwer-then, rernem amernel renh-rnem wantetyek. Anwantherr ikwer-itwek anenh. 9 Philip ikwerenh aleyak-rnem 4-pel anenh. Alerikw rernem Akngey-kenh angka akaltyel ilenh.

10 Anantherr kel Caesarea ikwer-itwek anek, arlta irrpety-inger. Akngey-kenh angkakert-rnem apmer Judea-they apetyek. Angkakert ikwerenh itnan Agabus. 11 Agabus ra Paul-kenh pilt lhelhek, ra akwarleny atherr arertnelhek, arlaw atherr arertnelhek. Ranem anwenhantherr ilek, “Akngey-kenh Itnwengel ilek, artwa Jerusalem-arenyel-rnem piltek-artwey renh arertnemel artwa ingwer-rnem anthetyek.” 12 Renh awekarl, anwantherr Paul-ek arrkngert angkek Jerusalem-warl alhey-angenh anetyek. Apmer-areny-rnem-then ikwer arrkngert angkek.

13 Paul-el anwenhantherr ilek, “Arrantherr artney-angenh anenherr-arey.” Ayeng ilwetyekan atyeng arrer arrpemarl.

14 Anwernantherr ywarn-antey Paul ikwer arrkernelhek, renh anterrkwetyek Jerusalem-warl alhekerr. Kel anwantherr renh tyarlewek, “Kel alha, Ingkartel ngenh ilek-angkwarr.”

15 Ikwer-penhan anwantherr arnkwernem anwekantherrenh ataperrelek Jerusalem-warl-anem alhey-alenty. 16 Kwertengerl irrpety anwekantherr-angkwarr alhek arrpemarl Jerusalem-warl, rernem Mnason-kenh warl-warl atnwenhek anwantherr ikwer-itwek anetyek. Mnason ra Cyprus-itwek arrwekel-antey Jesus renh tnakek.

17 Anwenhantherr arnaremel, ingkart Jerusalem-areny-rnem anwekantherr inkwerelhek. 18 Arlta ingwerelan Paul-akerr anwantherr James-anem aretyek alhek. Tyaty-areny-rnem arntarnt-arey-angker ingwer-rnem-then James-itwek anenharl. 19 Paul-el ilek ikwer-rnem Akngey-kenh angka mwerr-angker akalty-anthenh Akngeyel-anem Jew-weny-rnem Jesus-warl atnwenhetyek ikwerenh-angkwarr. 20 Angka awemel, James-kenh-rnemel Akngey tnakek. Rernem-anem Paul ilek, “Jerusalem-itwek Jew-rnemel Jesus renh tnakeyel-anem. Rernem Moses-kenh angkek awelheyel-antey. 21 Rernem awek ingwerel apmer arrpanenhel ilek, Jew-rnemelarl Moses-kenh angka ipmek. Rernem awey ikwer-rnem-kenh artwa mpwarey-angenh-antey. 22 Rernem awenty, nthakenh apmer nhenh-itwek irreyenhan? Nga apetyentyel ntwarl Moses-kenh angka ilpertilek-penh. Nthakenh-anem nga irreman? Rernem apek ngenh atweyenh. 23 Nga anwekantherr awelheyek. Artwa 4-pel nherneman anwekantherr-itwek aneyel, rernem Akngey alhelek, ngkwarl antywey-angenh anetyek, altethen akelhemel. 24 Nga artwa nhernem-angkwarr tyaty ilkwewarl alha, Ikwer-penhan arrantherr atyetyart tyaty-areny-warl ilelhey-alhemel, Akngey-anem tyenkerr anthenherr-arey. Artwa alta akelhentyel nga Moses-kenh angka apenteyel-antey ipmey-angenh-antey.

25 Jew-weny-rnem ngenharl akalty-anthek-rnemel rernem Jesus renh tnakeyel. Anantherr kel pip ikwer-rnem-warl thwenek, rernem Akngey-kenh angka arraty-angkwarr apenterl-ayntetyek. Nthakenh rernem amern-then aker-then arlkwey-angenh akalty-anthenh-anthenh irrtywerrey-angker-rnem-kenh. Rernem arrknga antywey-angenh aker arrkngakert antywey-angenh anetyek, rernem ingwer-kenh anew ikngwey-angenh anetyek.”

26 Arlta ingwerelan artwa 4-pel ikwer-rnem-angkwarr Akngey-kenh warl ilkwewarl alhek lhewelhetyek, Moses-kenh-angkwarr. Rantey arrpemarl alhek atyetyart tyaty-areny inetyek, rernem Akngey tyenkerr anthetyek. Rernem alhek atyetyart tyaty-areny, iletyek ilengerek-atwety rernem tyenkerr Akngey anthetyek.

27 Arlta 6-penh, Jew Asia-areny irrpety rernem Paul tyaty ilkwitwek arek. Rernem Paul renh anterrkwek. Akngerr ingwer-rnem Paul-they ahelirrek. 28 “Artwa Israel-kenh-rnemay! Artwa nhenhey ra, apmer arrpanenh-warl Moses-kenh angka apmwangkwarr ilerl-apeyel, apmwangkwarr ileyel warl nhenhek Paul-el Jew-weny-rnem atnwenhek Jew-kenh tyaty ilkwewarl, nthakenh alhey-angenh-warl.” 29 Rernem Trophimus arek, Paul-angkwarr anerl-alhenh, Paul-el tyaty ilkwa amek-amek-warl atnwenhenty-arrpantey rernem ayntarrp-ilek. Trophimus ra Ephesus tawen-areny anenh.

30 Tawen-areny akngerr ahelirrek. Rernemap Jew-rnem-kenh tyaty ilkwewarl anterrekan. Rernem apatemel arlkalhelirrenh. Paul-anem rernem anterrkwek, tyaty ilkwethey aketh-warl-anem iytarr-akngek. Kel keyt-anem martek. 31 Akngerr rernem renh ipmek atwetyek-arrpantey iytarr-akngek. Ingwerel Rome-areny ahelengkw atyetyart renh ilek, “Jerusalem-areny-rnem ahel atwerreyel!” 32 Ahelengkw-rnemek yangkelhek, ra renh-rnem artweriletyek irlkenty-akert. Ahelengkw-rnem rernem arnarek apetyenharl, rernem Paul renh atwey-angenh-anem, menty arek.

33 Atyetyartel ahelengkw-rnem irrpety thwenek, rernem Paul renh anterrkwek, rernem renh tyeyn atherrel arertnetyek. Ranem renh-rnem ayernek, “Artwa angwenharlap ran nhenhey? Apmwel-areth apek mpwarek? Nthakenharl ran irrek wenh? Ilek-they arrantherr atwetyek renh?” 34 Artwamp ranem renh-rnem ywarn-antey awelhek, akngerr rernem ingkerrenh artewentyel arlkalhelirrekarl. Alakenh-anyem ra ahelengkw ikwerenh-rnem ilanthek, rernem Paul ahelengkw-rnem-kenh tyayl-warl renh akngeynetyek. 35 Rernem renh irrwerlap-aylpwer-akngek tyayl-warl, ingwerel-rnem renh atwekerr. 36 Akngerr ingwer-rneman arlkerl-apenh, “Renh ipmek atwenherr-arey!”

37 Rernem Paul renh ahelengkw-kenh apmer-warl akngeynek, Paul-el ahelengkw atyetyart renh ayernek, “Mwerr ayeng ngkweng-warl angkem?” Atyetyartel renh ywemek. Rap tyernek, “Angka Greek ngan angkeyel. 38 Atha ngenh iterl-areyel, ngan Egypt-areny, ntwarl apmwerrkel ingkerrenh irrwernek, aha pweytilek. Nga yerlirrek irlkenty-akert artwa 4,000 ahern arlpaw-warl, ahel atwerretyek.”

39 Paul ilelhek, “Arrangkw, ayeng artwa Jew-arl aneyel, tawen Tarsus-areny, tawen ilkwa apmer Cilicia-itwel. Ntwa apek ayenh tyarlewem, ayeng ilelhetyek artwa nhenh-rnem-warl?”

40 Artwamp ra angkek, “Kel, angka!”

Paul-anem ikwer-rnem angkek, “Arrantherr akatemel awelhenherr-arey atyeng!” Rernem kel akatek, Paul ranem Hebrew angkel ilelhek ikwer-rnem-warl.

<- Acts 20Acts 22 ->