4 Peter-el-anem angka ikwer-rnem ilek, 5 “Ayeng Joppa tawen-el anenh. Arlta ingwerelan ayeng Akngey-warl angkek, ayeng ankwanem aynterl-arrernek, atha altyerr-anem arek. Atha arek angel-el ampwal kalikw ilkwapeny alker-they atwarrelhilek atyeng-warl. 6 Kalikw-apeny kwen-itwek, atha atnwenth ingwerek-ingwer arek, ahernel alheyel-rnem-then thip-rnem-then. 7 Athanem awek ayenharl ilek, ‘Peter-ay, akemirray! Aker atwemel arlkwa!’ 8 Ayeng angkek, ‘Ingkartay, atha aker nthakenh arlkwey-angenh, ngarl weth arrwekel atnwenth arlkwekerr arrkngert angkek.’ 9 Athanem awek Akngey alker-they angkek, ‘Aray, Akngeyel alakenh-anyem ilenty, kel mwerr. Irrpelthirrey-angenh ikwer, ntwa aker arlkwetyek arwa alhewer.’ 10 Alakenh-anyem atyeng ilek irrpety-inger. Ikwer-penh Akngeyel kalikw-apeny alker-warl-anem aleth-antey akngeynek. 11 Ikwer-penh artwa irrpety warl arriw-itwel rtneyarr-alhek. Caesarea tawen-they rernem apetyek. 12 Itnweng Rlwartel ayenh ilek, ayeng alhewer alhetyek. Artwa Jesus-arl apenteyel 6-pel Joppa-areny-rnem atyeng-angkwarr alhek arrpemarl Caesarea tawen-warl. Aley rernem anwekantherr-itwel aneyel. Cornelius-kenh warl-warl anwantherr aylpenhek. 13 Cornelius ranem anwekantherr ilek angel-elarl ikwer-warl aremirrek. Angel-el renh ilanthek, ‘Angkakert Joppa-warl thwena, Simon ikwer yangkelhetyek. Simon itna ingweran Peter-arl. 14 Simon Peter ranem ngkweng angka Akngey-kenh iletyek, ntwa angka Akngey-kenh iterl-aretyek. Akngeyel arrenhantherr ingkerrenh itethileyenh.’ 15 Ayeng Cornelius-kenh-rnemek angkek. Itnweng Rlwart ra ikwer-rnem-warl antelhek-anem, ra arrwekel anwekantherr-warl antelhek-apeny. 16 Ayeng iylpangkek-anem, Ingkartarl anwenhantherr arrwekel ilek, ‘John-el ingkerrenh kwatyelant baptise-emelem. Akngeyel arrenhantherr Itnweng Rlwartelant baptise-emelem.’ 17 Athanem iterl-arek, rernemarl Ingkart Jesus Christ tnakem, anwantherr renh tnakeyel-apeny. Akngeyel-anem Itnweng Rlwart renh thwenek ikwer-rnem-warl, rarl renh anwekantherr-warl arrwekel thwenek-apeny. Alakenhaym ayeng nthakenh Akngeyek irrpelthirrey-angenh.”
18 Rernem Peter awek-penh rernem akateyelpek-anem ilterrey-angenh. Rernem Akngey-anem tnakek. Rernem angkerrenh, “Innganem Akngey Jew-weny-rnemek yangkelhek, rernem ikwer-warl angkepirretyek, rernem-anem iteth intem-antey anetyek.”
20 Ikwer-penhan Jesus-arl apenteyel irrpety apmer Cyprus-areny Cyrene-areny-rnem-then tawen Antioch-warl alhek, angka Jesus-kenh akalty-anthetyek artwa Greek-arl angkeyel-rnemek. 21 Ingkartel renh-rnem rlterrkilek. Akngerrel-anem Ingkart renh tnakek, ikwer-warl angkepirremel. 22 Jerusalem tyaty-areny ingwer-rnemel awek, rernemarl Ingkart-warl angkepirrek, rernem-anem Barnabas renh thwenek Antioch tawen-warl.
23 Antioch-itwek Barnabas ra iterl-arek, Ingkartelarl renh-rnem arntarnt-arek, ranem inkwerelhek. Renh-rnem ilek, Ingkart-angkwarr aleth apenterl-ayntetyek. 24 Barnabas ra artwa mwerr anenh. Itnweng Rlwartel renh rlterrkilenh. Ra Ingkart tnakenh. Renh awek-penh akngerr ingwer-rnem Ingkart-angkwarr apenterl-ayntetyek angkepirrek arrpemarl.
25 Barnabas Tarsus tawen-warl alhek, Saul-ek nthwetyek. 26 Renh arey-alhemel ra ikwer-akert Antioch tawen-warl tyaty-areny-rnem-warl anyentirrek. Ratherr-anem renh-rnem akalty-anthek aherrety anyentel. Antioch-arenyel-rnem Jesus-arl apenteyel-rnem itnewek Christian-rnem.
27 Ratherr Antioch tawen-itwek anenharl-antey, Akngey-kenh angkakert irrpety Jerusalem-they apetyek. 28 Artwa anyent Agabus Jesus-arl apenteyel-rnem ilek, aherrety amern-wenyarl aneyenh apmer arrpanenhek. Renh-tangkwel Itnweng Rlwartel ilek aherrety arrer-anem amern-weny. Kel alakenh-anyem innga ayntek Claudius Atyetyart ilkwa Rome-itwel anenh-angkwarr. 29 Akngerr ingwer-rnemel-anem man iweynek Jesus-arl apenteyel ingwer-rnemek, Judea-itwel anenh-rnemek. Anyentel-anyentel rernem man thwenek, irrepern-rnemek. 30 Rernem man renh Barnabas-atherr Paul-atherr anthek, ratherr atyetyart tyaty-areny-rnemek man anthetyek, ingkart Judea-areny-rnem man anthetyek.
<- Acts 10Acts 12 ->