1 Artwa anper arey-angker weth, Ahithophel, ra angkew arrpemarl alerikw David-wenhew Absalom-ew, “Alerl atha rlwaney ahawarr-rnem 12,000, aynengkw renh alwerneyew rlengk ingwel. 2 Aleyan ra arlka apmwanem alhengkerr-then. Rap apateyelpeyenh, ayengarl ikwer arwapeny aremerreyelpeyenh, antwerrkeyew. Ikwerenh-rnem mentyarl anterrey. Renhantap atha ipmew-antey atweyenh. 3 Ingwer-rneman atha arlweleyenh, akngey-alpeyenh nhenh-warl. Rernemarl areyn, atyetyart ikwer-rnem-wenh ipma, rernemap inkwerelhemel mwerr-antey antelhenhey-alpeyenh.”

4 Alerikw David-wenh artwamp Israel-wenh-rnem-then rernem angkerrew, “Ya, alakenhan mwerrarl.”

5 Alerikw David-wenh angkew-anem, “Kel. Kwertengerl Hushai weth, iley renh-anem, apetyeyew anewantherr-warl. Angka ikwerenhew-tangkwel anantherr awelheyew.” 6 Hushai rarl apetyew, alerikw David-wenhel renh ilew, artwa anper arey-angkerarl angkew-angkwarr. Rap ayernew, “Nthakenh ngan iterreyel, Hushai? Angka artwa anper arey-angker-wenhew anantherr awelhem? Arrangkw apek? Nthakenharlap anantherr irrem?”

7 Hushai-elan irrtywerremel tyernew, “Artwa anper arey-angker yanhan arratyarl angkem. Aleyanap arrangkwarl. Angka yanhan apmwarl, rarl ngwamp ilew. 8 Ntwa aynengkw ngkwenh iterl-areyelarl, ran ahawarr rlterrkarl. Artwa ahawarr ikwerenh-rnem rlterrk arrpemarl, atnwenth ahelengkw-rnem-apeny. Ran tyak innga, arlengarl ayntey-alhem arntarnt-arelhemel ahawarr-rnem-wetyan. 9 Apwert intey-warl apek ra irrtyert-aylpenh, apwert-ampenyel. Nthakenh renh arey-alhey-angenh. Ra aremerremel atwewerr anenhantherrenh, ahawarr akngerr ipmew atwewerr. Anantherr mpwelhemer-tangkwel. Alakenh awenty ingwer-rnem iterrem, ‘Atyewey pwertay! David-rnemelan rernemant althenew Absalom-rnem!’ 10 Rernem alakenh iterrenty, rernemap atererrem. Arnkaty-rneman atererrewerr arrpemarl. Ingkerrelan iterl-areyel, aynengkw ngkwenh ikwerenh-rnem-then rlterrkarl. Nthakenh antengeley-angenh, arrangkw.

11 Alakenh-wety nga irremer: ahawarr-rnem-tangkwel akarrelemer Israel-itwew apmer arrpanenh-itwew, akngerr innga alperr-apeny. Ntwarrp renh-rnem yerl-akngem. 12 Nthakenh aynengkw irrtyert-aylpey-angenh anewantherr-wety. Anantherr renh arey-alhem, renh atwemel artewenty, rap anamerlarl ilwem. Ikwerenh-rnem ilwem arrpemarl. 13 Ra irrtyert-aylpentyan tawen anyent-itwew apek. Anantherr ingkerrenh lhelpelhelem warlan, apwert-rnem rwepel iytarr-akngemel arleng. Apmer aketh-anem aynteyelpeyew. Intem anantherr alakenh irrayntem antwerrkeyew-atety.”

14 Alerikw David-wenhel artwamp Israel-wenh-rnemel-then rernem awew, rernemap angkerrew, “Angka arrwekelenyan artwa anper arey-angker-wenhan mwerr-wenyarl. Angka kwertengerl Hushai-wenhan mwerrarl.” INGKARTel renh-rnem arnep-arnew, alakenh iterreyew. Ra ilkelhew, rernem apenteyew angka anyelkel-antey Hushai-wenharl, alerikw David-wenh renh irrwerneyew. INGKARTel artwerelew, rernem awewerr angka artwa anper arey-angker-wenh. ...

<- 2 Samuel 162 Samuel 18 ->