ጳዉሎስ ቲቶሃ ከተቦ ሶህኑተ ኣጉስ ቲቱ ሀንቅ መገኑ አመዕንዮበእ ኡመቲች አመዕነት አደ ፈንቀሎሃ እሀን ጳውሎሴሃ እንጂል ሆጎን መዴስ እክ ሀዕለኖስ ሆጎስያ ጃለ እቅ፤ ጳዉሎስ ከ ሶህኑተ ከተቦሁ ኡምሪን ቀው እኮ ሆጎስ ጃሊሃ ቲቶሃ እኮቤቺሃ ቲቱ ህከ ወክት ዱእ ምኒ ሆጉተ አገረን ቀርጤሳን ሄአኖ እቅ። ሶህኑስ ለልሳኢሁ ሰሱ ቡዕለ እኮ ጠውኒት፦ 1. ጳዉሎስ ቀርጤስ ባድ መን ሂለ ሃል ደገኖቤቺሃ ህከን ባዶን አመዕናኖ ጭምት አዎንሳኑት ሀትናሙ እሁ ሀስሰኖ ጎሬ ቲቶሃ ጠረኝሽ ሸዘነተ ኣሴስ። 2. አመዕናኖ ጭምት ኣዜን ባልቆ ጎነለከ ሜንቱ ህትን ወደልቹ ጎነለከ ሜንት ካዲመተ ሀት ተማርሱ ሀስሰኖ ጎሬ ቲቶሃ ሸዘነተ ኣስዮኡ። 3. መጨረሻን አመዕናኑት ሀት ሄኡ ሀስሰኖሰ ጎሬ ወገሬቲንለከ ኢታን ሄአን አመዕናኖ ጭምት በሊች ብተተ፥ ኦደተለከ መለዕለንሸ ቤሶተ ጳዉሎስ ቲቶ ሸዦስ። መጻፉስ አፎሃ ኣጉስ (1፥1-4) ዱእ ምኒ አዎንሳኑተ (1፥5-16) መገን ምኔን ካድመ አደደ ሆጎ ወጥ (2፥1-15) ሸዘነተለከ ኤገተ (3፥1-11) መጨረሸስ (3፥12-15)
1 መገን ካዲንቹለከ መሲህ ኢስ አሳቤቹ እኮም ጳዉሎስ መገኑ መጠሮሰ መነ አመዕነትቤቹ ገኢሃለከ መገኑ አጉድ ሀት እክ ሄኡ ሀስሰኖሰ ጎሬ ለሊሰኖ ሀንቅ ደጎተ ተማርሶተ ሹመ እኮም ጳዉሎሴች ሶሀሞእሃ፦
2 ሁኩ ሀንቁ ዘላለሚሃ ሄኡ ተሬገጥሲሽ ኣሰኖ፤ ህካንን ዘላለሚሃ ሄኡ ኣሰኖኔገ ዘመኒች ብርተ ሄጭ ጠወዕዮሁ ክዝብበሃ መገኑ። 3 ዘማኑስ ኢሌ ወክት ፌሳንቹሃኔ መገን ትዛዚን አን ዱዱብሶተ ኣሰሞኤ ዱዱብስ ኤገ መሳን መገኑ ሶህኑስ ለልሾ።
4 ሜጡበ አመዕንኖም አመዕነቲን ሀንቅ ቤቱኤ እኮ ቲቶ አነ እኮ መገኒችለከ ፌሳንቾ መሲህ ኢሲች ኣስቱትለከ ወገሬቱ ኬሳሃ እሁን። [a]
10 ልግቡ መኑ በትሽን አይሁድ አድረ እኮእሩ ጡርከሜኖ ሴረ አዎንታሩ፥ አዘዘንትበረለከ ተሰ እኮ ጠወ ጠወአን ሉሲሳእሩ ዮኡ። 11 ከ መናከተ ሰዕም ይታገ አኡ ሀስሰኖ፤ እሰን ገበእበ ትርፈ ደእቶተ ገበእበ ጠወ ተማርስተን አበሮሱ ጉዕመንከ ኩማዳአ። 12 እሳች መቱስ ገይሰ ራጋንቹ «ቀርጤስ መኑ ጉዕመ ወክት ክዝበኛኑተ፥ ሂለ ቡሳወ እኮእራ፥ ሆጉተ ኢትቲበለከ ጎራሜቻኖታን» ዬእ። 13 ኩ መሰከረሞ ጠዉንኩ ሀንቅሃን፤ ህካን እኮቤቺሃ ዊሙ አመዕነቱ ሄኦሰተ ከ መነ ጠረኝስ ኡሙዕር። 14 አይሁድ መን ማቁተ አዎንትበገለከ ሀንቅ ግብ ኦዳ መን ትዛዝ ሞጮጭትበገ ጠረኝስ ኡሙዕርሰ። 15 ነጠ መኒሃ ጉዕሙርቹንኩ ነጠሃን፤ ጠው እኮጎሬ ንጃሶሀኑኡተለከ አመዕንትበሀኑኡተ መቱርቹሁ ነጣበአ፤ ህትን ቀልቡሰለከ ሰው ይታርቹ ንጃሾእሃን። 16 እሰን «መገኑ ደንጋም» ይተን ሆጎንተሰ እሱ ለገኣእረ፤ ህትን ኮፍ ይታእረ፥ አዘዘንትበረለከ ጡመ ሆጉተ አኡ አታልትበረ።