ጳዉሎስ ሮሜ መኒሃ
ከተቦ ሶህኑተ
ኣጉስ
ሶቀማንቾ ጳዉሎሴ ሶህኑት ሮሜ መኒሃ ከተበሞሁ ጳዉሎስ ሮሜን ሄኣ ዱእ ምነተ ለኦተ ያጆቤቺሃ ተቃጠብ አገርታገ አኦታት። ጳውሎሴ ያደት ሮሜን ሄኣ አመዕናኖን ሜጡበ ቀዉ ጌሰ አዕዮች ኤተሮን እሰ ሀዕልታንስ ስፔነ ዬኖቤቹ መሮታት እቅ፤ መሲህ ኢሳን አመዕነትተኔሃ ደጎሃለከ አመዕናኑት ሄእንከሰ ሆጎን ለሊሱ ሀስሰኖሰ መሲህ ኢሳን አመዕን ትምርት መት-መቲን ከተቦኡ፤ ጳዉሎሴ ሶህኑት ዊም ደገመኖሁ ከን ሶህኖኒት።
ጳዉሎስ ሮሜን ደገንታ አመዕናኖተ ወገሬትስ ህግሾችለከ ዱአ አኦሰተ ተብሳሃ ኣሴሳች ኤተሮን ሶህኖስ ቡዕለ እኮ ጠዉ (1፥17) «መገኒች ደገመኖ ፈየ እሄን አመዕነቲን፥ አመዕነቲሃ እኮገ እንጂላን ለልዮኡ» ይታ ላገተ እሁስ ለሊሰኖ።
ከኒች ኤተሮን ጳዉሎስ ከ ሰውት አልባሽ ከተበኖ፤ አይሁድ መኑሁ አይሁደ እህቡ ጉዕሙንኩ ጩቢሃ ጠገንቶእረ እኮቤቺሃ መገኒን ሀራዕረሙ ሀስሰኖሰ፤ መኑ መገኒን ሀራዕረሞተ አታለኖሁ መሲህ ኢሲን አመዕኖኒት፤ ህከን መገኒን ሜጡበ እክ ሃዕሮ ሜጦመ ላሉት ሃዕሮ ሄኡ እሁስ ጳዉሎስ አልባሽ ኩሎኡ። አመዕናንቹ መገኒን ሜጡበ ወገሬቱ ሄአኖስ፤ መገን ጠሊለ አያኒን ጩብችለከ ሬሆ ዎልቃች ነጠ ፉሸኖ፤ ፎሎጭ 5 ኬሽ 8 ኢለ ጳዉሎስ መገን ሕጉለከ አመዕናኖ ሄኡ አአኖ መገን አያን ዎልቃ አላመስ መሃጎሬ ለሊሰኖ፤ ህከኒች ኤተሮን ጳዉሎስ «መገኑ መኒሃ ዮስ አለመ ኣዜን አይሁዱሁ አይሁደ እህቡ መኑሁ ሀት እክ ሜጡ እኮተ አታልታአ?» የኖ ጠዕምቶተ መስለ ኣሰኖ።
ለንኪሃ ጳዉሎስ ጠወዕዮገን አይሁድ መኑ ኢሰ ቶጉዕነ ፈቁሰ መገንተ ያደ፤ ሁኩንን እኮሁ መሲህ ኢሲ አዲን መገኑ ለልሾ ጡም ኣስቱተ ጉዕመ መን ዘርተ ሀንቀፍ አፊሃት። እሁን ቤሉ አይሁድ መኑ ኢሰ ቶገ ወክቱ አሜተኖገ ጳዉሎስ አመዕነኖ፤ መጨረሻን ጳዉሎስ መሲህ ኢሰ አመዕንት ሀት እክ ሄኡ ሀስሰኖስጎሬ በትሽን አመዕናኑት ገገዉንከሰ ኢተ ዎቃሃ አዎኑ ሀስሰኖሰገ ኩለኖ፤ መገኑ ካደምተኔሃ፥ አመዕናኑት ባዲሃሰለከ ገይሀሳ ዮሰ ኤገተ፥ መት-መቶ ጠውን ኬአ ጠዕምቱተ ሂር ኩለኖ።
መጻፉስ አፎሃ
መጻፉስ ኣዜን አፎ ቡዕለ እኮ ሰውት (1፥1-17)
ጡሙ መኒሃ ጉዕሚንከ ሀስሰኖሃ እሁስ (1፥18—3፥20)
መገን ጡም ዎቃሃ (3፥21—4፥25)
መሲህ ኢሲን ደገመኖ ሃዕሮ ሄኡ (5፥1—8፥39)
እስራኤል መኑ መገን ያዳን (9፥1—11፥36)
አመዕናኑት ሀት እክ ሄኡ ሀስሰኖሳሃ እሁስ (12፥1—15፥13)
መጨረሽስ ሰውትለከ ወገሬት (15፥14—16፥27)

1 መሲህ ኢስ ካዲንቹ እኮ ሶቀም ሆጎተ ገአሞ መገን እንጂለ ተማርሶተ መጠረሞ ጳዉሎሴች ሶሃሞሃ።

2 ሁኩንን እንጂሉ መገኑ ነብያኖን ጠሊለ መጻፋን ሄጭ ኣሴ ተብሴታ ላገ። 3 ኩ እንጂሉንኩ ደውዴ ዘሬች እለም መንቹ እኮ ቤትስተኔሃ ጠወአኖ። 4 መገኑ ገውንኩስ ጠሊለ አያን ዎልቃን ቀርቹኔ መሲህ ኢሰ ሬሆች ኬሽ ቤቱ እሁስ ዊመ ዎልቃን ደግሲሾ። 5 መሲህ ሱዕምተኔሃ አይሁደ እክበሩ ጉዕሙንኩ አመዕንቶተለከ አዘዘንታገ አኢሃ እስ መሳን ሶቀሚሃ አበቀኣኔ ኣስቱተ ቶንጎም። 6 ህከን መኒን ሜጡበ አዕኑሁ መሲህ ኢስረ እኮኖተ ገአንቴንታእራን።

7 መገኑ ኢቴህዕኔለከ ጠሊላኑተ እኮኖተ ገአንቴንተ ሮም ከተማን ሄኤነንተሩ ጉዕሙንኩክዕኔ አናኔ መገኒችለከ ቀርቹሃኔ መሲህ ኢሲች ኣስቱትለከ ወገሬቱሁ ክዕኔኤሃ እሁን።

ገለት ዱአ

8 አመዕነቱክዕኔ ባዶን ጉዕማንን ሞጮጨሞቤቺሃ ጉዕምክዕኔተኔንከ ሄጭ መሲህ ኢስ መሳን ጉዕሚክዕኔተኔሃ ኢ ቀርቹ መገኑኤ ገለትጫም። 9 ጉዕመ ወክት ዱአ አአን ቃጋንክዕኔገ ቤትስተኔሃ ጠወአኖ እንጂለ ተማርሲን ዊመ ቀልብንከኤ ካደማም መገኑኤ ምስክርሃን። 10 ቴሱ አበ ዱንኬሚች ኤተሮን መጨረሻን መገኑ ዬጎሬ ክዕኔቤቹ አሜቶተ ዎቆኤ ብዝ ዮተ ጉዕመ ወክት ዱአ አኣም። 11 አመዕነቲን ጠረኝቴነንተገ አአኖህዕኔ አያን በረከተ ቤሆህዕኔተ ይ ለኦህዕኔተ ሀሳም። 12 ህት ዬሚንኩ አን ክዕኔ አመዕነቲንለከ አዕኑሁ ኢ አመዕነቲን ገገዉንኩኔ ጠረኝጨቀሞታት። 13 አመኤ ኦሶ! አይሁደ እህበ ዎሎ መንቤቾን ልግብ አቶተ ደጎምገን ህትን ክዕኔ በላን አቶተ ደጎተ ሀሾም እቅ፤ ጠዉ እኮጎሬ ክዕኔቤቹ አሜቶተ ልግብ ወክት ያጅ ከበሬ ኢለ መኩ ሆጉስ ደጎኖተ ሀሳም። [a] 14 ግርክ መኒለከ ግርከ እህበ መኒሃ፥ ኤንኬዕናማተለከ ገወ መኒሃ ግዳጁ ዮኤ። 15 ህካን እኮቤቺሃ ክዕኔንከ ሮም ከተማን ዮንተ መኒሃ ተሽት ላገተ ተማርሶተ ሄዕላታም።

እንጂል ላገት መገን ዎልቀተ እሁስ

16 አን እንጂል ላጋን ሙላምበአ፤ ተሽት ላገት አይሁዲሃለከ ግርክ መኒሃ አመዕንታ መኒሃ ጉዕሚንከ መገን ወልቀት ፈይሲሃት። [b] 17 ፈዩ መንቹ አመዕነቲን ሄኡ ደአኖ የመም ከተበሞገን መገኑ መነ ፈየ እሁሰ ወለአኖሁ ዎዕኔች ኤተሩ ኢለ ጠለዕል አመዕነቲን እሁስ ህከን ተሽት ላጋን ለሌእ። [c]

መን ሂልመተኔሃ

18 መኑ ሂልማንተስ ሀንቁ ለለኖበእገ አታአ፤ መገኑ ዋጅትበቤቺሃለከ ፈይመት ዮሰበእቤቺሃ እሰ አሌን መገን ኡሙዕርት ሰሜች አሜታአ። 19 መሰንትስ መገንተኔሃ ደገሙ ሀስሰኖሃ ጉዕመንከ መገኑ ለልሾሰቤቺሃ እሳሃ ኑር እክ ለልዮእሃን። 20 ኣዱንያ አሉ ከለቀሞ በሬች ኬሽ መኒሃ ለለኖበእ መገን ሃሉ ሁኩንን ዘላለሚሃ ሄኣ ወልቀስለከ ቀርቹ እሁስ እስ ከለቆ ጠው መሳን ዊመ እክ ለሌቤቺሃ መኑ ቤሳ ቤሲሃ መሰት ዮሰበአ። 21 ህትን እሰ መገኑ ደገን መገኑ እህሃስ ሀስሰኖ ኬዕምኝለከ እሱ ገለትጩ ግቦኡ፤ ሰውቱንኩሰ ተሰ እኮ፤ አጥረመትቡ ቀልቡሰ ቱንስቹ እኮ። [d] 22 «ነኡ ሀይቻኑተ» ይተንን ገዋኑተ እኮኡ። 23 ሄአኖ መገኑ ከበጅታ ወጥ ሄእበ መን ምስሊሃ፥ ጭኦተ፥ ሾል ሎከት ዮስ ግዚሃለከ ኡለ አሌን ጎሾሸንትኣ ግዝ ደኒን መክሴመ ምስሊሃ ኬዕምኝ ኣቶኡ። [e]

24 ህካን እኮቤቺሃ ገገዉንኩሰ ገይሰ ጅስም አሌን ሙልሰኖርቹ አቶተ መገኑ ንጃሱ ዊሞ ሂለ ሄዕላቻተሰ ጠገንቶረ እካገ ህግሽ ኣሴሰ። 25 ሁኩን እኮሁ መገን ሀንቅ ክዝቢን ዶርቶቤቺሃቲ፥ ካሊቅ ወጥ ከለቀሞሀኒሃ ሰገዶቤቺሃለከ ካደንቶቤቺሃት፤ እኮጎሬ መገኑ ዘማኒሃ ጉዕሚንከ ገለትጨሞሃ እሁን፤ ኣሚዕን።

26 መኑ ህካን አቶ መሳን መገኑ ገበእበ ሙልሰኖ ሄዕላቻተሰ ህግሽ ኣሴሰ፤ ሜንቱሰ ሆሮ ጎንን ኦሰኡ አጉርት ሮሰሞበእ ሃሌን ዶርቶኡ። 27 ህትን ጎኑ ሮሰሞ ሃሌን ሜንቲን ኦሰኡ አጉርት ጎኑ ጎኒን ሜጡበ ሙልሰኖ ጠወ አቶኡ፤ ሉጨንሽሰ መሳን ሀስሰኖሰ ቅጣት ገይንከሰ ቶጋአ።

28 መኑ መገኑ ደጎተ ሀሱሆጎቤቺሃ አኡ ገበእበ ጠወ አቶተ መገኑ ሂለ ሰውቲሃ ህግሽ ኣሴሰ። 29 ህካን እኮቤቺሃ ብድሊን፥ ሂልማን፥ እዲድማን፥ ተንኮን፥ ምቀኝማን፥ ነብሳሃ ሾን፥ ብታን፥ ጣንሶን፥ ሂለ ሄዕላቻን ጉዕሚን ዊንቶእሩለከ ህትን ሄዕምታእራን። 30 መን ሱዕመ ቤሳእሩ፥ መገኑ ግባእሩ፥ መነ ሆፍሳእሩ፥ ቦንታእሩ፥ ገዎንከሰ ድከኣእሩ፥ ሂለርቹ ሀሳእሩ፥ አኒሃለከ አመታ አዘዘንትበሩ፥ 31 ሰውይታበእሩ፥ ዉለ ድጅታሩ፥ ኢተት ዮሰበእሩ፥ ጎደበ ጠረኛኖታን። 32 «ህትኔ ጠወ አታ መኑ ጉዕሙንኩ ሬሁ ሀስሰኖሰ» የኖ መገን ሕገ ደገን ህካን ጉዕመንከ አታአ፤ ጠለዕል ህካን አኡ እሁዕነ ህት አታ መነ ኬሰንስታአ።

ሮሜ 2 ->