ጳዉሎስ ገላትይ መኒሃ

ከተቦ ሶህኑተ

ኣጉስ

ኢስ ጡምስተኔሃ ጠወአኖ እንጂል ላገት ጉዕመ ቤቾን ዱዱብሰንተን አይሁደ እህቡ መኑ ቶገንስ መርቶ ጌሰ «አመዕናኑተ እኮተ ሙስ ሕገ አኡ ሀስሰኖንዶ ሀስሰኖበአ?» ይታ ጠዕምቱት ኬኦኡ፤ ቀቅቾ እስያን ሮም ገሾን እኮእ ገላቲያን ሄኣ አመዕናኖ በላን «መኑ መገን ብሬን ፈየ እሄን ጠለዕል ኢሳን አመዕኑ እሁዕነ ሙሲ አዲን ኣሰሞ ሕገ አኡ ሀስሰኖ» ይተን ጳዉሎሴ ግባ መኑ ሄኦ እቅ።

ጳዉሎስ ካን ገላትያ መኒሃ ከተቦሁ ከን ትምርቴን ጉረተ ኣጎሰ መነ ጌጥዬ አመዕነት ዎቃሃ አዎንሲሃት፤ ጳዉሎስ መሲህ ኢስ አሳቤቹ እሁስ ተሬገጭ ጀመረኖ፤ አሳቤቹ እሆተ ገኤሲሁ መገን ቤሉ መነ እሁ ሆጉስለከ እስ ሶቀሙ አይሁደ እህበ መኒሃ እሁስ ሂር ኩለኖ፤ መጨረሽ ፎሎጭ ኣዜን አመዕነት ዎቆሁ ኢሳን አመዕኒን ደገመኖ ኢታች ቡቀኖሃ እሁስ ኩለኖ።

መጻፉስ አፎሃ

ኣጉስ (1፥1-10)

ጳዉሎሴ አሳቤቹ እህስ ሹምነቱ (1፥11—2፥21)

መገን ኣስቶ እንጂለ (3፥1—4፥31)

አመዕነቲን ነጠ ፉሉለከ ሹምነቱ (5፥1—6፥10)

መጨረሸስ (6፥11-18)

1-2 አን አሳቤቹ ጳዉሎስለከ ኢን ሜጡበ ዮ አመዕናኑተ ጉዕመንከ አመኦሱት ገለትይ ባዶን ዮ አመዕናኑተ ሶንኮምሃን፤ አን አሳቤቹ እኮም መኒች ህከረንገ መን አዲን እሁዕነ መሲህ ኢሲንለከ ኢሰ ሬሆች ኬሾ አነ መገኒንት።

3 አናኔ መገን አዲችለከ ቀርቾ መሲህ ኢሲች ኣስቱትለከ ወገሬቱሁ ክዕኔሃ እሁን።

4 ኢስን ከን ሂለ ዘማኒች ፌሶኔተ አናኔ መገን ሰውቲን ጩብሀኔ ገዉስ ህግሽ ኣሴእ። 5 ዘላለሚሃ መገኒሃ ኬዕምኙ እሁንስ! ኣሚዕን።

6 መሲህ ኣስቶን ገኤህዕኔ መገን አዲች ደዕልቴን አደ እኬን ዎሎ ተሽት ላገቤቹ ፈንቀሉክዕኔ አጀብሲሰኖኤ። 7 ህካን ያሚሁ ጉረተ ኣግሶተለከ መሲህ እንጂል ላገተ ሾክሶተ ሀሳ መት-መቱ መኑ ዮቤቺሃት ቤሉ ዎሉ እንጂል ላገት ዮቤቺሃበአ። 8 ጠዉ እኮጎሬ ዎዕነ ዱዱብስኖንክዕኔ እንጂል ላጋን ቶቀምባሃ ዎሉ ነኡ እንኮምዕቃ ሰሜ መላይከት እኮ እቃ ዱዱብስቶህዕኔጎሬ ቦሮረንቶኢሃ እኩን። 9 ወዕናሃ ይኖንክዕኔገ አኒሁ ቴሁ ያንክዕኔ፤ አዪሁ አዕኑ ቶጌንተ እንጂል ላጋ ቤሉ ዎሉ ቶቀምባ እንጂል ላገተ ዱዱብሴህዕኔጎሬ ቦሮረሞኢሃ እሁን።

10 ህከረ አን ሀሳሚሁ መኑ ገለትጮኤታትንዶ? ህከረንገ መገኑ ገለትጮኤታት? ህከረንገ አን መነ ሙንዲሲሶተ ሀሳሚት? ቴሶ ኢለ መነ ሙንዲሲሶተ ሀሾም እቃን መሲህ ካዲንቹ እሆተ አታላምበአ እቅ።

11 አመኤ ኦሶ! አን ዱዱብሴንክዕኔ እንጂል ላገት መኒች እሁ ሆጉሴ ደጎኖተ ሀሳም። 12 መሰንትስ ህካን ኤሳሃ ደግስሾኤሁ መሲህ ኢሳት ቤሉ አን ቶጎሚሁ መኒችበአ፤ ህከረንገ መኑ ተማርስዮኤበአ።

13 ወዕና አይሁድ አመዕነቶን ዮም ወክት ሀት ዮም ጎሬ ሞጮጭቴንታአ፤ አመዕናኑተ ሸረን ቤሶተ አጰማሚት እቅ። [a] 14 አይሁድ አመዕነቱ አገሪን ዘሬኤ በሊች ኢ ደረቦች ጉዕሚችን በተኣምየ እቅ፤ ህትን አናከኤ ሴረ በአኖበእገ ጠረኝሽ ሀሳም እቅ። [b] 15 ጠዉ እኮጎሬ እለሙዕነ ሄጭ መገኑ መጠሮኤ፤ ኣስቶንከስ ገኤኤ። 16 አይሁደ እህበ መኒሃ ቤትስተኔሃ ተሽት ላገተ ዱዱብሶተ መገኑ ቤቱስ ለሊሶኤተ ኢቴ ወክት አን አዬኒ አማዕለሞምበአ። [c] 17 ህትን ኢች ብርተ አሳበተ እኮሀኑኡቤቹ ደቀሞተ ዬሩሳሌም ከተመ መሮምበአ፤ ጠዉ እኮጎሬ ሄጭ አረብ ባዱ መሮም፤ ህከኒች ኤተሮን ደማስቆ ከተመ ፈንቀሎም። 18 ሰሶ ዘማኒች ኤተሮን ኬፋ ዬኖ ጴጥሮሴ ለኦተ ዬሩሳሌመ ኦሮዕይ እሲን ሜጡበ ቶነ ኦንቱ በር ዱንኬም። [d] 19 ጠዉ እኮጎሬ ቀርቾ ኢስ አመቤቲ ያቁብ ቤሉ አሳባች ዎሉ መቱሃ ለዕዮምበአ።

20 ኩ ከተቦንክዕኔሁ ክዝብ እሁ ሆጉስ መገን ብሬን ተሬገጭ ኩላንክዕኔ።

21 ህከኒች ኤተሮን ሶርይለከ ክልቅይ ባዱ ኦሮዕዮም። 22 ይሁድ ባዶን ዮ አመዕናኑት ሚንተ ሚኔን ለአቀንት ከሰበአ። 23 ጠዉ እኮጎሬ እሰ «ወዕና ኔሳሃ ኦርሰኖኔ መንቹ ወዕና ቤሶተ አጰመን ሄዕዮ አመዕነቱ ገዉንኩስ ዱዱብሰኖት» ዬኖሃ ሞጮጭቶ እቅ። 24 ኢ መሳን መገኑ ገለትጭታኢት እቅ።

ገለትይ 2 ->