ጳዉሎስ ቆላስያስ መኒሃ
ከተቦ ሶህኑተ
አጉስ
ኩ ሶህኑት ከተበንቶኢሁ ቀዉ እስያ ዬኖ ኤፌሶን ከተማን ሸርቂን ቆላስያስ ከተማን ሄኣ መገን አመዕናኖ ዱእ ምኒሃት፤ ኩ መገን አመዕናኖ ዱእ ምነት ኡርቶኢሁ ጳዉሎሴን እህበጎሬሁ ሮም ግዛት እኮ እስያ ሀዕኑረ ከተማ እኮ ኤፌሶኒች እንጂለ ተማርስታእረ ሶኮሃ እኮቤቺሃ ቆላስያስ መኒሃ ሹምነቱ ዮሰ እቅ፤ ቆላስያስ መገን አመዕናኖ ዱእ መን ኣዜን «መገኑ ደጎተለከ ዊመ ጡሙ ደእቶተ ጉዕሙንኩ መኑ ጠሊልመ አያን ዎልቀተለከ ሹምነቲሃ ሰገዱ ሀስሰኖ» ይታ ክዝብ አስተማረት ሄኡሰ ጳዉሎስ ሞጮጭዮ እቅ፤ ሁኩ አስተማረት ይታ ዎሉ ጠዉ «ጉዕሙንኩ መኑ ጡርከም ሴሪሃ ጠገሙለከ እቸታ ዎሉ ሴረሃ አገሩ ሀስሰኖስ» የኖሃን።
ጳዉሎስ ከ ሶህኑተ ከተቦሁ ሀንቅ አመዕነቲ ሶህኑተ ሆንጠህሲን እሰ ክዝብ ትምርት ቶጉ ግብሃት፤ ሆንጠህሾ መስሊች ቡዕሉስ «መሲህ ኢስ ዊመ ጡሙ ኣሰኖ፤ ሁኩ ዎሉ አመዕነቱለከ አኤኖርቹ እኮጎሬ እሲች ቄርስታአ» የኖሃን፤ መገኑ መሲህ ኢሲን ኣዱንያ አል ከለቆ፤ እስ አዲንን ገይስቤቹ ፈንቀሽ ኤበኖስ፤ ኣዱንያ አሉ ጡም ተብሶሁ ሄአኖሲሁ መሲህ ኢሰ ቀልቢን አመዕኒንት፤ ከን ሃሊን ጳዉሎስ ኩ ሎሩ ትምርቱ አመዕናኖ ሄኦን ሀት አት ሆጎን ሆስሳጎሬ ኩለኖ።
ከ ሶህኑተ ጳዉሎሴች ቶግ ቆላስያሰ ኢልሶተ ሶሀሞ ቲቶን ሜጡበ ሄዕዮ አናሲሞሴ እኮገ ለኡ ሀስሰኖ፤ ህካን እኮቤቺሃ ጳዉሎስ አናሲሞሴ ዬኖ ሮስችተኔሃ ፊልሞኒሃ ዎልት ሶህኑተ ከተቦኡ፤
መጻፉስ አፎሃ
ኣጉስ (1፥1-8)
መሲህ ኢስ ሀለትለከ ሆጉተ (1፥9—2፥19)
መሲህ ኢሲን ሃዕሮ ሄኡ (2፥20—4፥6)
መጨረሸስ (4፥7-18)

1 መገን ሀስሻን መሲህ ኢሲ አሳቤቹ እኮም ጳዉሎሴችለከ አመኔቤቲች ጢሞትዎሴች ሶሀንቶእተ ሶህኑ።

2 ቈላስያሳን ሄኣሀኑኡ መሲሂን ጠሊልቶ አመዕነንቶ አመዕናኖተ መገኒች አኒችኔ ኣስቱትለከ ወገሬቱ እሁንክዕኔ።

ጳዉሎስ መገኑ ገለትጩስ

3 ክዕኔሃ ዱአ አዕናም ወክት ቀርችኔ መሲህ ኢስ አነ መገኑ ጉዕመ ወክት ገለትጭናንስ። 4 መሲህ ኢሳን ዮህዕኔ አመዕነቱለከ አመዕናኖተ ጉዕሚንከ ዮህዕኔ ኢተተ ሞጮጭኖም። 5 ሀንቅ ላገተ እኮ እንጂለ ሄጭ ክዕኔቤቹ ኢሌ ወክት እሲን ዮ ተብሳሃ ሞጮጭቴንታአ፤ ህካን እኮቤቺሃ አመዕነቱክዕኔለከ ኢተክዕኔ እጃረንቶኢሁ ሰማን ተቃጠብ አገረኖ ህከን ተብሴ አሌኒት። 6 አዕኑ እንጂለ ሞጮጭቴንታችለከ መገን ኣስቶ ሀንቅ ደጌንተ በር ጀመር ኩ ኢንጂሉ ክዕኔ በላን እኮሀንገን ኣዱንያ አሌን ጉዕማንን አቶት አሌንትለከ ነጵ አሌኒት። 7 ህካንን ክዕኔተኔሃ መሲህ አመዕነሞ ካዲንቹ እኮሃለከ ኒን [a] ሜጡበ አአኖ ኢተሞ ኤጵፋራ ኩሎህዕኔ። [b] 8 ህትን እስ መገን አያኒን ገገዉክዕኔ ኢተቀሙክዕኔ ኩሎኔ።

9 ህካን እኮቤቺሃ ከ ጠወ ሞጮጭኖም በሬች ጀመር አዕኑ ሀይመተለከ ሰውት ጉዕመንከ መገን ሰውት ደጌነንተ ዊሙ ደጉ ሄኦህዕኔተ ክዕኔሃ ዱአ አኡለከ መገኑ ኡጩ ኡጉርኖምበአ። 10 ህትን ቀርቺሃ ሀስሰኖገ ሄኤነንለከ ጉዕማንከ ጠዋን እሱ ሙንዲሲሴነን ጡመ ሆጎን አቶተ አቶቴነን መገኑ ደጊን ነጵቶኖተ ዱአ አዕናም። 11 አታዕሊን ጉዕመንከ ጠወ አታሊሃ ተቃጠቤንተረ እኮኖተ ቀርቹ ሎረ ዎልቃን ጠረኝመስ ጉዕመንከ ኣሱንክዕኔ። 12 ህትን ኑር ዎምነት ኣዜን ጠሊላኖን ሜጡበ ርስተ ቤቀንቴነንተገ አበቀዕዮህዕኔ መገኑ አነ ሙንዲኖን ገለትጭዬስ። 13 እስ ቱንስች ዎልቃች ጡምሽኔ ኢተሞ ቤትስ ዎምነቴን ኣንጋምገ አዕዮኔ። 14 እሲን ዎዘም ጩብኔ ማርቱተ ደእኖም።

መሲህ ሆጎተኔሃ [c]

15 ቤቱስ ለልበ መገን ሀንቅተ ምሳል፤ እስን ክልቀቲች ጉዕሚችን ሀንገፈሃን። 16 መሰንትስ ሰማንለከ ኡላን ዮእሩ ጉዕሙንኩ ለለኖሁለከ ለለኖበእሁ ዎልቃመትለከ ገሽታእሩ ሀለቀትለከ ሹመት ጉዕሙንኩ ከለቀንቶኢሁ እስ አዲንት፤ ጉዕሙርቹንኩ እስ አዲን እሲንከ ከለቀሞኡ። 17 እስን ጉዕመርቺች ብርንተ ሄዕዮ፤ ጉዕሙርቹንኩ አጳቀም ኡሬኢሁ እሲንት። 18 እስን ገይስ ጅስመ እኮ መገን አመዕናኖ ዱእ ምኒሃ ቡዕለሃን፤ እስ ጉዕመ ጠዊሃ ብሬተ፤ ጉዕመ ጠዋንን ዎኔሃ እሆተ ሬሆች ኬእንከስ ዎዕኔሃን። [d] 19 አኑ መገኑ ቤትስ ኣዜን መገኑ ዊመ ዊሚን ሄአኖገ ኢትዮኡ። 20 መስቀል አሌን ዱንተዕዮ ቄጊንከስ ወገሬት አኢን ኡላን እኮ ሰማን ዮ ጠወ ጉዕመንከ እስ አዲን እሲን ሀራርሴእ። [e]

21 ሰውቲንከክዕኔለከ ሂለ ሆጎንተክዕኔ ባለጋረ እኬን መገኒች ቄዕርቴን ሄኤነንተ እቅ። 22 ቴሱ እኮጎሬ ሆፍኙለከ ቀነጤኖህዕኔርቹ ዮህዕኔበእረ ጠሊላኑተ አዕይ እስ ብሬን ሆንጠህሶህዕኔተ መሲህ ጅስምስ ሬሆ አዲን ሀራርሴህዕኔ። 23 አመዕነቲንከክዕኔ እጃረንቴን ጠጰ ገቴን ኡሪን ሞጮጭቴንተ እንጅሊን ተብሴች ሌንቄቅቶኑዕናን ጠረኝቴን ሄዕዬ። አዕኑ ሞጮጭቴንታሁለከ ሰሜች ዎሮን ዮ ክልቀቲሃ ጉዕሚንከ ዱዱብሰሞ እንጂሉ ከኒት፤ አን ጳዉሎስ ከ እንጂሊሃ ካዲንቹ እኮም።

ጳዉሎሴ ሶቀም ሆጉተ

24 ቴሁ ክዕኔተኔሃ ቶጎም ኦርሻን ሙንደኣም፤ መሲህ ጅስመስ እኮ መገን አመዕናኖ ዱእ ምኒሃ ኣኤ ኦርሻች ሆፈአኖሃ ማሊንከኤ ዊንሻም። 25 መገን ላጋች መቱርቹሃ ፌሱዕናን ክዕኔሃ ኩሎተ መገኒች ኣሰሞኤ ኤጋን መገን አመዕናኖ ዱእ ምኒሃ ካዲንቹ እኮም። 26 ኩ ላገት ልግቤ ዘመኒሃ ክልቀቲሃ ጉዕሚንከ ለሉዕናን ምስጥር እክ ሄዕዮ እቅ፤ ቴሁ እኮጎሬ መገኑ አመዕንታ መኒሃ ጉዕሚንከ ለልሾኡ። 27 መገኑ ከ ምስጥር እሳሃ ለሊሾሰ፤ ሁኩንን አይሁደ እህበ መን በላን አበተ ቀባጡ፤ ካን ዩ መሲህ ክዕኔ ኣዜን ሄእሃስ እስን ኬዕምኚሃኔ ተብሳሃ። 28 ነኡ መሲህ አዋጅናም፤ መኑ ጉዕሙንኩ ጉዕመንከ መነ መሲሂን አመዕነቲንከስ ጠረኘ አዕን ሆንጠህንሶተ ሀይመተ ጉዕመንከ ተማርስነን ሸንዛም። 29 እስ ሎረ ዎልቃን ኣዜንከኤ አአኖቤቺሃ ህከን ዎልቃን አጰመን ቆንዶዳም።

ቆላስያስ 2 ->