ሶቀማንቾ ጳዉሎሴ ለንክ ሶህኑተ

ቆሮንቶስ መኒሃ

ኣጉስ

ጳዉሎስ ቆሮንቶስ መኒሃ ከተቦ ለንክ ሶህኑት ከተበሞሁ ቆሮንቶሳን ሄኦ መገኑ አመዕኔ መን ጭምት ምናን ሄዕዮሰ ሜጡ እሁ አበ ሂለ እኮ ወክቴንት እቅ። መት-መቱ አመዕናኑት ጳዉሎሴ አሌን መት-መቱ ሂለ ጠወ ጠወኦስ ጎሬ ጳዉሎስ ሀራሩተ ከለቆተ አበ ሀሾ፤ ሁኩንን እኮ ወክት አቡ ሙንዲኑት ሞጮጨንቶስገ ኩለኖ።

ሶህኖስ ዎኔ ክፍላን ጳዉሎስ ቆሮንቶሳን ዮ መገኑ አመዕኔ መን ጭምት ዱእ ምናን ዮስ ጠውተኔሃ ኩል አመዕናኖ ኣዜን ኬዕዮ ጠዊሃ ጠረኘ መስለ ሚሃ ኣሴጎሬ ሂር ኩለኖ። ህከኔን ሜጡ አዕይ ኩ እስ ጠረኙ መስሉ ቶበት ሀራዕረንቶተ አዕዮሳሃ እኮቤቺሃ ሞጮጨሞስ ሙንዲኑተ ኩለኖ። ህከኒች ኤተሮን ይሁዳን ሄኦ አመዕናኑተ ሀዕሎኖተ ኒያችሰ ኬስ ኣቶተ ኩለኖ። መጨረሽ ፎሎጮን ጳዎሎስ አሳበ አሌን ኬዕዮ ክሲሃ መከላከያ ኣሰኖ። ቆሮንቶሳን መገኑ አመዕንቶ መን ዱእ ምኒ መት-መቱሰ ገውሰ ሀንቅ አሳበተ አት ጳዎሎሴ ክዝብ ሶቀማንቹ ይት ከሰሳሲት እቅ።

መጻፉስ አፎሃ

ኣጉስ (1፥1-11)

ጳዉሎሴለከ ቆሮንቶስ አመዕናኑተ (1፥12—7፥16)

ይሁዳን ሄኣ አመዕናኖተ ሀዕሌመሰገ (8፥1—9፥15)

ጳዉሎስ ሶቀምስ ደኝነቲሃስ ሆንጠህሾ ጠወ (10፥1—13፥10)

መጨረሸስ (13፥11-14)

ቆሮንቶሳን ዮ መገን አመዕናኖ ጭምት ዱእ ምናችለከ ህትን ዊመ አካይያን ዮ አመዕናኖተ ጉዕሚንከ

2 አንችኔ መገንቺ፥ ቀርቹሃኔ መሲህ ኢስ ኣስቱትለከ ወገሬቱ ክዕኔሃ እሁን።

3 ማርቶ አነ እኮሃ ጠረኝመተ ጉዕመንከ ኣሰኖ ህትን ቀርቹሃኔ መሲህ ኢስ አነ መገኒሃ ገለቱ ኢሉስ። 4 ነኡን መገኒች ኣእኖም ጠረኝማን ኦርሸ ኣዜን ዮእረ ጉዕመንከ ጠረኝሱ አታልኖተ መገኑ ኔሳሃ ኦርሻን ጉዕማንን ጠረኝሰኖኔ። 5 መሰንትስ መሲህ ኦርሸተ በትኝስ ቤቀሞምገን ጠረኝመታ መሲህ አዲን በትንስ ደእናም። 6 ህትን ነኡ ኦርሸተ ቶንጋሚሁ አዕኑ ጠረኝቶኖተለከ ጡምቶኖታት፤ ህትን ነኡ ጠረኝኖምጎሬ አዕኑሁ ነኡ ቶንጋም ደኒን ኦርሸተ አታዕሊን ቶጌን ጠረኝቴነንተ፤ 7 ህከኒሃ ኒ ኦርሸተ ቤቀንቴነንተሀንገን ሙንዲኑኔ ቤቀንቴነንተገ ደንጋምቤቺሃ ክዕኔ አሌን ዮኔ ተብሶሁ ጠረኘሃን።

8 አመኤ ኦሶ! እስይ ባዶን ኢልቶኔ ኦርሸተ ደጎኖተ ሀንሳም፤ ሁኩንን ኢልቶኔ ኦርሸት አታዕልናም ጌሲች በተኣን ፎሊን ሄዕናም ተብሳሃ ሙርኖም እቅ። [b] 9 ህትን ሬሁተ ፈረዴመአንገ አዕን ቀልቤኔ ሰውይኖም እቅ፤ እኮጎሬ ሁኩ ጉዕሙንኩ ጠዉ አሌኔ ኢሌኢሁ ሬቶ መነ ሬሆች ኬሰኖ መገኖን ድከዕንት ቤሉ ገይኔ ዎልቃን ድከዕንበጋት። 10 መገኑ ሬሆች ጡምሾኔ፤ ቴሁ ጡምሰኖኔ፤ ህትን ከ ኤተሩሃ ፌሰኖኔገ መገኖን ተብሳሃ አዕናም። 11 አዕኑሁ ኔሳሃ ዱአ አቴነን ሀዕሉ ሀስሰኖህዕኔ፤ ህትን አበ ዱኢን ነኡ መገን ሀዕለንሸ ደእናም ወክት ልግቡ መኑ ኒ መሳን መገኑ ገለትጨኖ።

12 ነኡ ድከዕናምርቹ ከኒት፤ ከን ዱንየ አሌን በትሽን ክዕኔን ሜጡበ ዮኔ ደቀንሹ መገኒች ደዕኖም አመዕነንሺን ሄዕኖምገ ቀልቡኔ መሰከረኖ፤ ሁኩንን መን ሀይማን እሁዕነ መገን ኣስቶኒት።

13-14 መሰንትስ አዕኑ አነበቢሃለከ አጥራመቲሃ አታልቴነንተሀን ቤሉ ዎሉ መቱርቹሃ ከተባንክዕኔበአ፤ ህካን እኮቤቺሃ ቀርቹኔ ኢስ አሜተኖ በር ነኡ ክዕኔን ድከዕኖተለከ አዕኑ ኒን ድከኦኖተ ከኒች ብርተ ኒተኔሃ ቀዉንከ አጥራመቴነንታሁ ኤተሮንገ ሹልቴን አጥራመቴነንተገ ተብሳሃ አዕናም።

15 ከን ጠዋን ሀንቀኘ እኮምቤቺሃ አዕኑ ኢን ለሙ ወክት ደግለሸቀንቶኖተ ይ ጉዕመርቺችን ሄጭ ክዕኔቤቹ አሜቶተ ሀሾም። 16 አንን መቄዶን ባዱ መረንለከ ህከንቤቺች አሜተን ክዕኔቤቹ አሜቶተ ሰውይዮም እቅ፤ ህትን ክዕኔቤቺች ይሁድ ባዱ መራም ወክት ዎቄሃኤ ሽንቅተ ኣቴን ህርሲሴነንተኤገ ሰውይዮም እቅ። [c] 17 ህትን አን ያጆም ወክት ሸኬምንዶ? ህትን አን ሰውያሚሁ መን ሰውትገ መቱርቹ «እሁን» ይ ፈንቀሽንገ «እሁንከ» የንትንዶ? 18 መገኑ ሀንቅንከ አመነሞኢሃ እኮገን ነኡሁ ኩልናንክዕኔ ላገት «እሁን» ይን «እሁንከ» ይኖታበአ። 19 አን ስላስለከ [d] ጢማቶስ ተማርሰኖህዕኔሁ መገን ቤቱ መሲህ ኢስ ጉዕመ ወክት «ኤ ሀንቄንከ» መቶረ «እሁን» መቶረ «እሁንከ ዩሃበአ።»[e] 20 መገኑ ኣሴኔ ተብሶሁ ጉዕሙንኩ «እሁን» እኮሁ መሲህት፤ ነኡ መሲህን መገን ኬዕምኚሃ «ኣሚዕን» ይናሚሁ ከኒሃት። 21 ኔሳሃ ክዕኔን ሜጡበ መሲህን ጠረኝናምገ አዕዮኔሁ መገኑሃን፤ ቡሮኔሁ እሶት። 22 እስረ እሁኔ ለሊሰኖ ገይስ ማተመ ኒ አሌን አዕዮሁለከ ጠሊለ አያነስ ሩብት እሆተ ቀልቤንከኔ አፉሼኢሁ እሶት።

23 አን ቆሮንቶስ ከተመ ፈንቀል አሜቱዕነ ፈቆሚሁ ኡሙዕር ሻዝሳንክዕኔበእገ ይዪት፤ ህከኒሃ መገኑ ምስክርሃእ። 24 አዕኑ አመዕነቶንከክዕኔ ጠረኝቴን ኡርቴነንተረ እኬንተቤቺሃ አዕኑ ሙንደኦኖተ ክዕኔን ሜጡበ አዕናምሀን ቤሉ አመዕነትክዕኔ አሌን ቀርቻኑተ እንካምበአ።