ጴጥሮስ ከተቦሃ

ዎኔ ሶህኑተ

ኣጉስ

ዎኔ ሶቀማንቾ ጴጥሮሴ ሶህኑት ከተበንቶኢሁ ሶህኖስ ኣዜን «መገኑ መጠሮ ኡመቲሃ» የመም ገአመኖለከ ቀዎ እስይ ቅልብ አዲን ብንይቶ አመዕናኖታት፤ ሶህኖስ ቡዕለ እኮ ጠዉ አመዕነትሰ መሳን ሸረሙለከ ኦርሸት ኢልቶሰ አመዕናኑተ ጠረኝሲሃት፤ ከተቦሲሁ ህካን አዕዮሁ ሬሁስ፥ ሬሆች ኬኡስለከ ፈንቀል አሜትስ ተብሳሃ ኩለኖ፤ መሲህ ኢስ ተሽት ላገተ አነበባሀኑኡተ ቃግሲሃት፤ መሲህ ኢስ ሄዕዮ ሃል ምሳልተ አዕይ ኦሪሸተ አታዕሊን ቶጉ ሀስሰኖገ ቃግሰኖ፤ ህከኒንን በርግ ኦሪሸት አመዕነትሰ ጠረኝመተ ፌተንታኢሃ እሁስ «መሲህ ኢስ ለለኖ በር» ሀስሰኖ ወጥሰ ደእታኢሃ እሁስ ቃግሰኖሰ፤

ከተቦሲሁ ኦሪሻን አታዕልቶተ ጠረኝሰኖሀኒች በትሽ አነበባእሩ መሲህ አዎንታስሩ ሄኡ ሀስሰኖሰ ሃሊን ሄኦተ ቃግሰኖሰ።

መጻፉስ አፎሃ

ኣጉስ (1፥1-2)

መገኑ ጡምሳንቹ እሁስ ቃግሰኖ ጠወ (1፥3-12)

ጠሊለ ሄኡ ሄኦኖተ ኣሰንቶ ሸዘነተ (1፥13—2፥10)

ኦርሸ ወክት አመዕናኑት አኡ ሀስሰኖሰ ጠወ (2፥11—4፥19)

አመዕናኖ ገዉ ሆፍሱለከ ክድመተ (5፥1-11)

መጨረሸስ (5፥12-14)

1-2 መሲህ ኢስ አሳቤቹ እኮም ጴጥሮሴች አኑ መገኑ ሄጭ ደግንከስ መጠሮህዕኔሀኑኡተ፥ መሲህ ኢሲሃ አዘዘንቶኖተለከ ቄጊንከስ ሄበ መራጨ አኤናን ነጠ እኮኖተ ጠሊለ አያኒን አደ እኬንተሀኑኡሃ ጳንጦስያን፥ ገላትያን፥ ቀጳዶቅያን፥ እስይ ባዶንለከ ቢታን ባዶን ኮሀ እኬን ብንይቴን ሄኤነንተሀኑኡተ ጉዕሚንከክዕኔ ሶሀንቶእተ ሶህኑ፤

ክዕኔንከ መገን ኣስቱትለከ ወገሬቱ በተኡንክዕኔ።

3 መሲህ ኢስ ሬሆች ኬእ መሳን ሄአኖ ተብሳ ኣሴኔሁ አበ አሙዚን ለንክ ሃዕሮ እለንሸ ኣሴኔ ቀርቹሃኔ መሲህ ኢስ አኑ መገኑ ገለትጨሙን። 4 እስን በእቡ፥ ሸምቡለከ ባልቅቡ እርስተ ሰማን ቅጥአዕዮህዕኔ። 5 አዕኑ ጎፍሜ በር ለለኖ ጡሚሃ አመዕነት መሳን መገን ዎልቃን አገረንቴንታአ። 6 ህካን እኮቤቺሃ ቀዎ ወክቲሃ አደደ ፌተነ ኣዜን ህጉክዕኔ ሻዝሰኖሃለከ ፈቅባሃ እኮጎሬሁ ጡሞንከክዕኔ ተሽ ዩንክዕኔ። 7 ሁኩ ፌተነት ኢልታህዕኔሁ አመዕነቱክዕኔ ሀንቅ እሁስ አጥራመትሃት፤ በአኖ ወርቁ ጊራን ፌተነመኖ፤ ሀንቅ አመዕነቱክዕኔ በአኖ ወርቂች በትሽ ዋጉ ዮሲሁ ህት ፌተነሙ ሀስሰኖስ፤ ሁኩ ሀንቅ አመዕነቱክዕኔ መሲህ ኢስ ፈንቀል አሜተኖ ወክት ገለት፥ ኬዕምኝለከ ናዱ ደግሲሰኖህዕኔ። 8 መሲህ ኢሰ ለኤንበጎሬሁ ኢትቴነንተስ፤ ቴሁ መሃ እሱ ለኤንበጎሬሁ እሶን አመዕንቴንታአ፤ ላጋን ኩሌን አታሌንበለከ ከበጀሞ ተሽቲን ተሽ የኖህዕኔ። 9 መሰንትስ አመዕነትክዕኔ ጎፍሞሃ እኮ ነብሴክዕኔ ጡሙ ደዕቴንተቤቺሃት።

10 ህካን እኮቤቺሃ ጡምተኔሃ ክዕኔሃ እሀኖ ኣስቱተ ራጎ ነብያከት አበ መረመርቶኡ። 11 እሰን ኣዜንከሰ ሄዕዮ መሲህ አያኑ መሲሁ አሌን ኢልታ ኦርሸተለከ ኦርሻች ኤተሮን አሜተኖ ኬዕምኝተኔሃ ሄጭ ለልሾ እቅ፤ እሰን ሁኩን ጉዕሙንኩ መ ወክትለከ ሀት እክ እሀኖጎሬ መረመርቶ እቅ። 12 ከን ጠውተኔሃ ነብያከት ካደንታ እቂሁ ክዕኔታት ቤሉ ገዉሰ እሁ ሆጉስ ለልዮሰ፤ ከ ጠወ ክዕኔሃ ዱዱብስቶኢሁ እንጂለ ክዕኔሃ ኤቦ መናከት ሰሜች ሶሀሞ ጠሊለ አያኒንት።

13 ህካን እኮቤቺሃ ቀልብክዕኔ ኬሴን ሆጎተ ቅጥ ይዬ፤ መሲህ ኢስ ፈንቀል አሜተኖ ወክት ደእቴነንተ መገን ኣስቱተ ዊመ ቀልቢን ተብሳሃ አዕዬ። 14 ትዛዝ ቶጋ እለገ እኬን ደጉ ሆጊን ዎዕነ ዮህዕኔ ሂለ ሄዕላቸተ አዎንቶኖቼ። 15 ጠዉ እኮጎሬ ገኤህዕኔ መገኑ ጠሊለ እኮገን አዕኑሁ ሄኦንከክዕኔ ጉዕማንን ጠሊላኑተ እኬ። 16 መሰንትስ «አን ጠሊለ እኮምቤቺሃ አዕኑሁ ጠሊላኑተ እኬ» የመም ከተበሞኡ። [a]

17 አዬሃ ጎሉዕናን ጉዕሚንከስ ሆጎስገ ፈረደኖ መገኑ «ኒ አነ» ይቴን ገእቴነንታሃ እኮች ከን ኣዱንያ አሌን ኮሀ እኬን ዮንተ ጌሳን መገኑ ዋጅቴነን ሄዕዬ። 18 አዕኑ አናካችክዕኔ ረገኤንተ ተሰ ሄኢች ወዘንቴንታሁ በአኖ ብሪን ህከረንገ ዎርቂን እሁ ሆጉስ ደጌነንተ። 19 አዕኑ ወዘንቴንታሁ ጤዕየት ህከረንገ ኩሌኖስርቹ ዮበእ ነጠ ሆልቹ እኮ መሲህ ኬዕምኝ ቄጊኒት። 20 እስ ለሌኢሁ ኣዱንያ አሉ ከለቀሙዕነ ብሬን እሀን ቴሱ ጎፍሜ ዘማኔን ክዕኔተኔሃ ለልዮኡ። 21 አመዕነቱክዕኔለከ ተብሶክዕኔ መገኖን እክ መሲህ መሳን እሱ ሬሆች ኬሾስለከ ኬዕምኝ ኣሴ መገኖን አመዕነንቴነንተ።

22 አመዕናኖተ አጉጣቀንሱ ዮበእ ኢተት ሄኦህዕኔተ ሀንቂሃ አዘዘንቴን ነብሳክዕኔ ነጠ አቴንታአ፤ ህካን እኮቤቺሃ ዊመ [b] ቀልቢንከክዕኔ መት-መቲንከክዕኔ ጠረኝቴን ኢተቀሜ። 23 ለንኪሃ እለንቴንታሁ ሄአኖለከ ዘላለሚሃ ኡር ሄአኖ መገን ላጋን በእበ ዘሬቺት ቤሉ በኣ ዘሬቺበአ። 24 መሰንትስ