ሶቀማንቾ ጳዉሎሴ ዎኔ ሶህኑተ
ቆሮንቶስ መኒሃ
ኣጉስ
ጳዉሎስ ቆሮንቶስ መኒሃ ከተቦ ዎኔ ሶህኑት ከተበንቶኢሁ ቆሮንቶሳን ዱእ ምኒ ኣዜን አመዕነት ሄእ አሌን ኬዕዮ ኦርሻተ ሂሬኖ ዎቃሃ ደግሲስሃ ሰውዪኒት። ህከ ወክት ቆሮንቶስ ከተሙ ግሪክ ሀዕኑረ ከተመ እህችስ አበ አካይያ ዬኖ ሮም ባዲሃ ወኔሃ ከተመ እቅ። ሁኩ ከተሙ ሎሩ ንግዱ፥ አደዱ ሴሩ አልባዕሌቤቺሃ ሂሉ ኮፍአአኖ ጠዉ፥ አደደ ሀይማኖቲን ደገሞሃ ቤቹ እቅ።
ሶቀማንቹ በትሽ መገኑ ኡጬኖ ዱእ ምኒ ኣዜን ሄኦ አደዶመተኔሃ፥ ሂለ ኮፍአአኖ ጠውተኔሃ፥ ዝነተ አዕለከ ጎጆሃ እህተኔሃ፥ አመዕናኖ ሴርተኔሃ፥ ጠሊለ አያን ኣስቶተኔሃለከ ሬሆች ኬኢተኔሃት እቅ፤ ህትን ሶቀማንቹ ተሽት ላገተ ከን ጠዕምቶ አሌን አዕይ አገዕሪን ሆንጠህሰኖ።
«ኢተቀሙ» መገኑ መን እላተ ኣሴ ኣስቶች በተአኖሃ እሁስ ኩለኖሁ ቶነ ሰቅ ፎሎጩ ከን መጻፍ ኣዚች በትሽ ደገሞእሃን።
መጻፉስ አፎሃ
ኣጉስ (1፥1-9)
ዱእ ምነ በላን ኬኦ አደዶመተኔሃ (1፥10—4፥21)
ኮፍአአኖ ሀልለከ አበሮስ ሄኡ (5፥1—7፥40)
አመዕናኖለከ አመዕንበ መንተኔሃ (8፥1—11፥1)
አመዕነቱለከ መገኑ ኡጬኖ ሴረ (11፥2—14፥40)
መሲህ ኢስለከ አመዕናኖ ሬሆች ኬእተኔሃ (15፥1-58)
ይሁድ ባዶን ሄኦ ኦርጨቀንቶ አመዕናኑተ ሀዕሉ (16፥1-4)
መጨረሸስ (16፥5-24)

1 መሲህ ኢስ ሶቀማንቹ እሆተ መገን ሰውቲሃ ገአሞም አን ጰዉሎሴችለከ አመኔቤቲች ሶስቴኔሴች 2 መሲህ ኢስ ጠሊለ አዕዮሀኑኡተለከ ጠሊላኑተ እኮተ መገኑ ገኤሰ ቆሮንቶስ ከተማን መገን አመዕናኖ ጭምት ዱእ ምኒሃ፥ እሰለከ ኒ ቀርቹ እኮ ቀርቹሃኔ መሲህ ኢስ ሱዕመስ ጉዕመ ቤቾን ገአንቶሀኑኡተ ጉዕሚንከ ሶኮምተ ሶህኑ።

3 አንችኔ መገኒችለከ ቀርቹሃኔ መሲህ ኢሲች ኣስቱትለከ ወገሬቱ ክዕኔሃ እሁን።

ጳዉሎስ መገኑ ገለትጬገ

4 መሲህ ኢስ አዲን ኣሰሞህዕኔ መገን ኣስቶተኔሃ ክዕኔ መሳን አን ጉዕመ ወክትንከ መገኑኤ ገለትጫም። 5 መሰንትስ አዕኑ ጠወኤነንተ ጠዊን፥ ኤንኬዕኒን ጉዕማንን መሲህ ኢስን ጉዕመ አዲንን ቀባጣመተ እኬንታአ። 6 ህትን ነኡ መሲህ ኢስተኔሃ ኩልኖንክዕኔ ጠዉ ክዕኔ በላን ጠረኝዮኡ። 7 ህከኒች ኤተሮን ቀርችኔ መሲህ ኢስ አሜቱ አገርቴነን መገን ኣስቶች መቱርቹሁ ሆፈአኖህዕኔበአ። 8 እስን ቀርቹኔ መሲህ ኢስ ፈንቀል አሜተኖ በር ህንቄኖህዕኔርቹ ዮህዕኔበእረ እኮኖተ መጨርሸ ኢለ ጠረኝቴን ሄኤነንተገ አሰኖህዕኔ። 9 መሰንትስ ቤትንከስ ቀርቹሃኔ መሲህ ኢሲን ሜጡበ እሁ ሄኦህዕኔተ ገኤህዕኔ መገኑ አመዕነሞእሃን።

አመዕናኖ በላን አደዶመት ሄኡ ሀስሰኖበኢሃ እሁስ

10 አመኤ ኦሶ! መቱ ጠወ ጠወኦኖተ፥ መቱ ቀልቡለከ መቱ ሰውቱ ሄኡክዕኔ ቤሉ በላንከክዕኔ አደዶመት ሄኣበእገ ቀርቹሃኔ መሲህ ኢስ ሱዕሚን ኡጫንክዕኔ። 11 መሰንትስ አመኤ ኦሶ! በላንከክዕኔ ብተት ሄኡስ ቀሎኤ ምኒ መኑ ኩሎኤ። 12 ህካን ዩ መት-መቱክዕኔ «አን ጳዉሎሴሃ» ህከረንገ «አን አጵሎሴሃ» ህከረንገ «አን ጴጥሮሴሃ» ህከረንገ «አን መሲህረ» ይቴነንታት። [a] 13 መሲህ ቤሀሞእንዶ? ህትን ጳዉሎስ ክዕኔተኔሃ ሰቀለሞእንዶ? ህከረንገ ጠመቀንቴንታሁ ጳዉሎሴ ሱዕሚንትንዶ? 14 አን ቀርስጶሴለከ ጋዮሴ ቤሉ ክዕኔተ መቱክዕኔ ጠመቆምበእቤቺሃ መገኑ ገለትጫም። [b] 15 ህካን እኮቤቺሃ አዪሁ ክዕኔተ «ጳዉሎሴ ሱዕሚን ጠመቀንቴንታእረ» ዮተ አታለኖበአ። 16 ህትን እስጥፋኖሴ ምኒ መነ ጠመቆም፤ ህከን ቤሉ ዎሉ መነ ጠመቆምጎር ደጎምበአ [c] 17 መሰንትስ መሲህ ሶኮኤሁ ተሽት ላገተ ዱዱብሶታት ቤሉ ጠመቆታትበአ፤ ዱዱብሳሚንኩ መሲህ መስቀሉ ተሰ እሀኖበእገ መን ሀይማን ደገንቶ ላጋኒበአ።

መሲህ መገን ሀይመተለከ ወልቀተ እሁስ

18 መስቀልተኔሃ ኩሌኖ ጠዉ በኣ መኒሃ ገዊመተ እኮጎሬ ኔሳሃ ጡምናም መኒሃ መገንተ ዎልቀ።

19 መሰንትስ «ሀይቾ መን ሀይመንተ ቤሳም፤

ኤንኬዕናሞ መን ኤንኬዕኑ ከማም» የመም ከተበሞኡ። [d]

20 ህካን እኮቤቺሃ ሀይቹ መንቹ አዬት? ሕግ አስተማርቹ አዬት? ከን ኣዱንያ አሌን አጥራመች ደገኖሁ አዬት? መገኑ ከን ኣዱንያ አል ሀይመተ ገዊመተ እሀኖገ አዕዮበእንዶ?[e]

21 መሰንትስ መገኑ ሀይማንከስ ከን ኣዱንያ አል መኑ ገይስ ሀይማን መገኑ ደጋበእገ ሀይማን አዕዮሰ፤ ጠዉ እኮጎሬ ገዊመገ ዎለአመኖ ነኡ ተማርስናም እንጂሉ አመዕንታእረ ጡምሶተ መገን አምሩ እኮኡ። 22 አይሁድ መኑ መላተ ለኡ ኢትታአ፤ ህትን ግሪክ መኑ ሀይመተ ሃሸኣአ። 23 ጠዉ እኮጎሬ ነኡ አይሁዲሃ ጉፍቹ እኮሃ አይሁደ እህበ መኒሃ ገዊመተ እኮ ሰቀለም ሬዮ መሲህ ዱዱብስናም። 24 ህትን ገአሞ መኒሃ አይሁዲሃ እካን ግሪክ አፎን ጠወአኖ መኒሃ መሲህ መገንተ ዎልቀተለከ መገንተ ሀይመ። 25 መሰንትስ መገን ገዊመት መን ሀይማች በተኣአ፤ ህትን መገን ላፍመት መን ዎልቃች በተኣአ።

26 አመኤ ኦሶ! ክዕኔተ መገኑ ገኤህዕኔ ወክት ሀትኔ መነ እኬንታጎሬ ሰውይዬ፤ መን ሰውቲን በላንከክዕኔ አኡ ሀይመተ ህከረንገ ልግቡ ጠረኙ ህከረንገ ልግቡ ሎርሎሩ መኑ ዮበአ። 27 ጠዉ እኮጎሬ ሀይመተ ሙልሶተ መገኑ ከን ኣዱንያ አል ገወ መነ መጠሮ፤ ህትን ዎልቃመተ ሙልሶተ መገኑ ከን ኣዱንያ አል ላፈ መነ መጠሮ። 28 ከን ኣዱንያ አል ሎረ ጠወ ሆፍሶተ መገኑ ከን ኣዱንያ አል ቀዉ ጠዋሃ፥ ህንቀሞ ጠወለከ ተሰ እኮ ጠወሃ መጠሮ። 29 ህካን አዕዮንኩ ማለ ኦደዕዮሁ ጉዕሙንኩ መገን ብሬን ቦነኖበእጋት። 30 እኮጎሬ ክዕኔተ መገኑ መሲህ ኢሲን ሜጡበ ሜጦመት ሄኣህዕኔገ አዕዮ፤ ህካን እኮቤቺሃ መገኑ መሲህ ኢሰ ሀይመኔ፥ ፈይመኔ፥ ጠሊልመኔለከ ወዝኑኔ እሀኖገ አዕዮስ። 31 ጠሊለ መጻፋን ከተበሞገን «ድከአኖሁ ቀርቾን ድከኡን።»[f]

ዎኔ ቆሮንቶስ 2 ->