MAK 4

Kitige8inni adisokan

(Inabin acitc Matio 13.1-9; Lok 8.4-8)

1 Jesos mina8adj ki madjita e kikinoamagedj tcigagam Galilee sagaiganikag. Kitci manebanin a8iagon e ma8adjiidindjin 8ajagam 8inikag, pidonag dac ki iji nda abigoban. Ag8idinoban ii tciman nibikag, a8iagog dac tcigagam te8agoban. 2 Adisokanan dac odabadjitonagobanin e kikinoamagedj mane kegoni.

Ogi inan dac: 3 “Ndotamok! Nigodin pejig kitige8inni ki nda kitigegoban. 4 Meg8adj dac e taji kitigegobanen odanominiman okitigan akikag, nandam mikanakag ki inagodjino8an. Pinecijag dac ogi pi nda am8a8an. 5 Kodagiag dac anominag ka iji asini8akamiganig ki inagodjinog, ka iji ega kipagakamiganig. Teci8ag dac ki madjigi8ag anominag, ega e manenig akini. 6 Apitc dac ka ani icpagodjig kizis, ki ick8ade8an ini kitiganijican acitc ki pate8an, ega tibise e kin8agin 8adabin. 7 Nandam dac kodagiag anominag ka iji minesatigo8anig ki inagodjinog. Meg8adj dac ka pimigigin ka min8acigin kitiganan, minesatigog acitc ki ani madjigi8ag, midac ka iji ani kib8anamockigadegin kidji gi minogigin ka min8acigin kitiganan, ka8in dac ki odji mini8asino8an. 8 Kodagiag dac nandam anominag ka iji min8acinig akini ki inagodjinog. Kitiganan dac ki madjiginon acitc ki minoginon, acitc minan ki nta8iginon, nanandam nenisomidana8edon e azaodegin, nanandam dac nenigod8asomidana8edon, acitc dac nanandam memidasomidana8edon e azaodegin.”

9 Jesos kiabadj ki ikido: “Kakina kina8a keckito8eg kidji nisidotameg, 8e8enda ndotamok.”

8egonen 8edji abadjitodjin adisokanan Jesos

(Inabin acitc Matio 13.10-17; Lok 8.9-10)

10 Apitc Jesos ka naganadjin ini kitci mane a8iagon, mi eta ka midatcin acitc nijindjin okikinoamaganan acitc pagi kodagian a8iagon o8idjiogobanin. Ogi k8ag8edjimigon dac kidji 8idama8adjin adi ekidomaganigin ini adisokanan. 11 Ogi nak8e8ajian dac: “Kina8a kigi odisigona8a kidji kikendameg Kije Manido Odogima8i8in, ega 8ikad a8iag kagi kikendag. Kodagiag dac a8iagog adisokanan nidabadjitonan kidji kikinoama8ag8a kakina kegoni, 12 kidji gi iji8ebizi8adj ii ka iji mazinadenig Kije Manidon Omazinaiganikag:

‘8e8enda oga kijigabadana8a, ka8in dac oga nisida8inasina8a.

Oga paietetana8a, ka8in dac oga nisidotasina8a.

Kicpin dac teb8e nisidotamo8apan ii,

kada an8endizobanig

acitc Kije Manidon oda kasiamago8an ka iji patadi8adj.’ ”Ésaïe 6.9-10

Jesos 8a8idamage adi ekidomaganig
kitige8inni adisokani

(Inabin acitc Matio 13.18-23; Lok 8.11-15)

13 Jesos dac ogi inan: “Kana kinisidotasina8a ii adisokan? Adi dac ke todameg kidji nisidotameg kodagian adisokanan? 14 Kitige8inni mi aa ka tibadjimodj Kije Manidon omin8adjimo8ini. 15 Nandam a8iagog e nodamo8adj Kije Manidon omin8adjimo8ini, mi maia tabickotc anominag mikanakag kagi inagodjino8agobanen ejinagozi8adj. Apitc nodamo8adj min8adjimo8ini, teci8ag kitci madji manidon opi nda manibidoni ii min8adjimo8ini kagi kitigani8anig 8ina8akag. 16 Nandam dac kodagiag a8iagog e nodamo8adj min8adjimo8ini, mi maia tabickotc anominag ka iji asini8akamiganig kagi inagodjino8agobanen ejinagozi8adj. Onodana8a min8adjimo8ini acitc teci8ag oteb8etana8a e modjigendamo8adj. 17 Ka8in dac macka8izimagasini oteb8etamo8ini8a, acitc ka8in kin8ej okana8endasina8a. Apitc dac madjise8adj, kek8an nanekadjiagani8i8adj Kije Manidon omin8adjimo8ini odji, teci8ag o8ebinana8a oteb8etamo8ini8a. 18 Nandam dac kodagiag a8iagog, mi maia tabickotc anominag ka iji minesatigo8anig akini kagi inagodjino8agobanen ejinagozi8adj. Onodana8a Kije Manidon omin8adjimo8ini. 19 Pekic dac odanimendamiigona8an kegonan ka nda8endamo8adjin kidji pimadjio8adj, acitc omotci nda8endana8a kidji 8anadizi8adj, ega e kikendamo8adj ega odji pejig e apitendag8anig, acitc kodag mosa8endamo8ini ododisigona8a. Kib8anamockigade dac ii min8adjimo8in, ka8in dac odji pejig abadasini opimadizi8ini8akag. 20 Nandam dac kiabadj kodagiag a8iagog, mi maia tabickotc anominag ka iji min8acinig akini kagi inagodjino8agobanen ejinagozi8adj. Onodana8a min8adjimo8ini, oteb8etana8a, acitc odabadjitona8a opimadizi8ini8akag, nandam pagi eta, nandam enigok, acitc nandam okitci abadjitona8a,” ki ikido.

8asakonendjigani adisokan

(Inabin acitc Lok 8.16-18)

21 Jesos kiabadj ogi inan a8iagon: “A8iagigotc na o8asakonendjigan odaton anamig akikokag konigotc anamig onibe8inikag? Kana na8adj kada minosesinoban kidji iji atodj 8asakonendjiganatigokag? 22 Kakina mega kegon ka kadjigadeg kada nag8an, acitc kakina kegon ega maci ka kikendjigadeg kakina a8iag oga kikendan. 23 Kakina kina8a keckito8eg kidji nisidotameg, 8e8enda ndotamok.”

24 “Iag8amendamok 8e8enda kidji ndotameg! Adi kagi iji toda8eg8a kidjipimadizimi8ag, mi iidi Kije Manido ke todago8eg, acitc 8a8adj kiga todago8a na8adj a8acamej apitc8in kagi iji todameg. 25 A8iag mega kegoni ka aiag, a8acamej oga odisigon. Aa dac a8iag ega kegoni ka aiag, misa8adj pagi eta kegoni aiag kada makamagani8i,” ki ikido Jesos.

Kitiganan e madjigigin adisokan

26 Kiabadj Jesos ki ikidogoban: “8adan oo ejinag8anig Kije Manido Odogima8i8in. Pejig nabe kitige anominan okitigan akikag. 27 Taso tibik dac niba acitc 8anicka e kijeba8acinig. Meg8adj dac ii, igi anominag sagigi8ag, acitc kitiganan ani madjiginon. Aa dac nabe ka8in maia okikendasin adi ejisenig kidji nta8iginigin okitiganan. 28 Aki mega tibina8e odobigitonan ini kitiganan, nitam kidji mijacko8agin, mina8adj kidji ani kitigani8anigin, ick8eag dac kidji kiji nta8igi8adj anominag iima kitiganikag. 29 Apitc dac igi anominag ick8a kijigi8adj, aa nabe kickija8ani odabadjiton, aja e ijisenig kidji ma8adjitodjin okitiganan,” ki ikido.

Ma8adji ka kitci agasiminagizidj anomin adisokan

(Inabin acitc Matio 13.31-32,34; Lok 13.18-19)

30 Jesos kiabadj ki ikidogoban: “Adi dac kegi ikido8aban kidji 8abadai8eian adi ejinag8anig Kije Manido Odogima8i8in? 8egoneni adisokan kegi abadjito8aban kidji mikodaman Odogima8i8in? 31 Mi oo ejinag8anig. Mi maia tabickotc anomines ejinag8anig, ma8adji ka kitci agasiminagizidj kakina ka taci8adj anominag apitc kitigani8anig. 32 Apitc dac kitigani8ag aa anomin, kitci madjigi acitc na8adj ani mitcakozi apitc8in kodagian kitiganan. Kitci madjiginon 8adik8anan acitc dac pinecijag pi nda 8asasonike8ag iima, ega kidji nigodi8adj,” ki ikido.

33 Jesos ogi abadjitonagobanin kitci mane adisokanan ini ka inakaneanigin kidji gi tibadjimodj Kije Manidon omin8adjimo8ini, inigik a8iagog eji kackito8agobanen kidji nisidotamo8adj. 34 Ka8in kegoni ikidosiban ega e abadjitodjin adisokanan. Anic dac apitc ako e 8idji8apanin eta okikinoamaganan, ega e tendjin kodagian a8iagon, kitci 8e8enda o8idama8agoban ini adisokanan, 8e8enda kakina kegoni kidji gi nisidotamindjin.

Jesos okibitinan e kitci nodinig

(Inabin acitc Matio 8.23-27; Lok 8.22-25)

35 Apitc e ani onag8icinig ii e kijiganig, Jesos ogi inan okikinoamaganan: “Ijadan 8edi agamig sagaiganikag.” 36 Ogi nagana8an dac ini8e kitci mane a8iagon. Aja tegoban Jesos tcimanikag, okikinoamaganan dac ki pozi8an iima pidonag acitc ogi madji8inigon. Kodagian a8iagon pecodj taji agomonigobanin, ogi nosoneogo8an dac. 37 Kegapitc ki madji kitci nodini acitc ki kitci mamagaani. Kitci pizibigoban ii tciman, maia kegat kozabi8agoban. 38 Meg8adj dac ii, Jesos odakeonag taji nibagoban, apik8ecimoban. Okikinoamaganan ogi pi kockonigon, acitc ogi igon: “Kikinoamage8inni! Aja kiga nisaba8emin! Kana kinigodinendasin?”

39 Jesos dac ki kockozi acitc ogi kitci aiamiton e kitci nodinig acitc e kitci mamagaanig: “Pekadj! Pekadizik!” Midac teci8ag ki kitci pekadani acitc ki kitci an8atini.

40 Jesos dac ogi inan okikinoamaganan: “8egonen 8edji kitci segizieg? Kana maci kiteb8etasina8a?”

41 Ki kitci segizi8agoban dac acitc ki k8ag8edjimidi8ag: “A8enen dac aa nabe maiagotc? 8a8adj e nodinig acitc nibini onadotagon!”

<- MAK 3 MAK 5 ->