1 Nidjiki8eg! Ka8in osa manekegon kidji 8i kikinoamage8inni8ieg aiamiemigi8amikag. Kikikendana8adok mega Kije Manido na8adj kidji sogakonigo8ag nina8it ka paba kikinoamageiag apitc8in kodagian a8iagon. 2 Mane8inaj kipanaagemin kina8it kakina. Kicpin a8iag ega 8ikad patadidj e anim8edj, maia kitci paiekidee aa, acitc okackitonadok kakina o8ia8 kidji tibendag.

3 8adan pebejigogack8eg. Kitci agacinojani otak8adjigani8a. Misa8adj dac, apitc ata8aiak tak8adjigani odoni8akag kidji gi odji ndotamo8adj adi eji nda8enimaiakonig kidji ija8adj, mizi8e o8ia8i8a ijamagani.

4 8adan acitc kitci tcimanan, ka kitci mamicagin acitc ka ani iji8ebasigin adi eji nda8endjigadegin apitc e kitci sogino8eg, kitci agacinoja min8aigan iima tcimanikag. Misa8adj dac aa8e ka pimibidetodj kitci tcimani okackiton kidji min8aag, min8aigani e abadjitodj. 5 Mi maia pejig8an, teb8e kitci agacinoja kidenananan. Misa8adj dac, kikitci inabadjitonanan kidji kitci inadjimidizo8ak.

8adan acitc ickode. Misa8adj kitci agasakoneg, kada kitci magakone kicpin nopimig inakoneg. 6 Mi maia tabickotc ickode ejinag8ag kidenananan. Kakinagotc madji ijitcigemagan kia8inakag, midac mizi8e kia8inan eji 8anadjitomagag. Kitci ickodekag odjimagan ii ickode kidenananakag ka tag8ag, acitc sakaigemagan kipimadizi8ininakag ka ako nta8igiak pinici kidji nibo8ak. 7 A8iagog okackitona8a kidji kikinoama8a8adjin kidji ndotago8adjin kakinagotc a8esizan nopimig ka odjindjin, acitc pinecijan, acitc a8ezisan ka pabamabikeindjin, acitc kigozan, acitc kakinagotc ka ijinagozindjin aja ogi kikinoama8a8an. 8 Anic dac ka8in a8iag 8ikad ododji kackitosin kidji nagadjitodj odenan. Kitci madji kegon ii, ega kackitomagag kidji tibendizomagag. Mi maia pitcibo8in ejinag8ag, ka kackitomagag kidji nici8emagag.

9 Kina8it dac, nanigodin kidabadjitonanan kidenananan kidji icpenimaiak ka Tibeniminak Kidadaminan, acitc nanigodin kidabadjitonanan kidji manazomaiakonig a8iagog, ke8ina8a kagi kijenimigo8adjin Kije Manidon tabickotc 8in ka ijinagozindjin kidji ijinagozi8adj. 10 Nidjiki8eg! Ka8in ii kada ijisesinon, kidji abadjito8ak kidenananan nanigodin kidji icpenimaiak Kije Manido acitc nanigodin kidji manazomaiakonig a8iagog! 11 Ka8in 8ikad ijisesinon ka min8agamig nibi acitc ka madjagamig pejig8an kidji odji sagidajiga8ig. 12 Nidjiki8eg! Miskominatigon ka8in kadagi cominici8asino8an acitc ka8in 8abiminag kadagi iji nta8igisi8ag cominici8atigokag. Ka8in kek8an kadagi odji sagidajiga8isinon ka min8agamig nibi iima kabe ka odji sagidajiga8ig ka madjagamig nibi.

13 Te na pejig a8iag ii e tacieg maia e kagita8endag acitc e kitci omidonendjiganidj? Kada 8abadai8e teb8e e kagita8endag e mino inakamigizidj. Kada mino ijitcige e tabasenimidizodj, acitc e kagita8endag adigotc enakamigizidj. 14 Kicpin dac pejig ii e tacieg odji odendag acitc 8in eta 8i mik8enimidizodj, ka8in kada min8adjimidizosiban kidji ikidodj: “Kenin nikitci kagita8endag.” Ka8in iidi iji kagina8ickikegon. 15 Ii mega ka ijinag8ag kagita8endamo8in ka8in Kije Manidokag odjimagasinon, tiegodj ooma akig iji tibendag8an, a8iagokag ega ka kigickago8adjin Mino Manidon iji tag8an ii, acitc madji manidokag odjimagan. 16 Apitcigotc mega odenimidi8adj a8iagog acitc 8ina8a eta mik8enimidizo8adj, aja ki8ack8eiendamog acitc kakinagotc ka ijinag8anigin madji kegonan opamendana8an.

17 Kagita8endamo8in dac Kije Manidokag ka odjimagag kitci pakan ijinag8an. A8iag ka aiag Kije Manidon okagita8endamo8ini kitci paiekidee, o8idoka8an kodagian kidji mino 8idji8idindjin pekadendamo8inikag, nokadizi, onadota8an adi ekidondjin kodagian a8iagon, okitci kidimageniman o8idjipimadiziman, kabe mino ijitcige, ka8in opepakanenimasin a8iagon, acitc ka8in kimodizisi. 18 A8iag pekadendamo8inikag ka iji 8idoka8adjin kodagian a8iagon kidji mino 8idji8idindjin, mi maia tabickotc ka kitigedj mino anominan ejinagozidj. Egi ijitcigedj iidi, kada odji k8aiak8adizinani8ani.

<- JAK 2JAK 4 ->