56
ܠܪܝܫ ܓܘܕܐ ܕܙܡܪ̈ܐ: ܥܠܔ ܝܵܘܢܲܬ ܐܹܠܸܡ ܪܚܘܿܩܝܼܡ. ܡܸܟ݂ܬܵܡ ܕܕܘܝܕ، ܐܝܡܢ ܕܕܒ݂ܝܩ ܠܗܘܢ ܐܠܗ ܦܠܫܬܝ̈ܐ ܒܓܬ.
1 ܪܲܚܸܡ ܥܲܠܝܼ، ܝܵܐ ܐܲܠܵܗܵܐ، ܒܗ̇ܝ ܕܩܵܡ ܕܵܐܹܫ ܠܝܼ ܒܲܪܢܵܫܵܐ،
ܟܠܹܗ ܝܵܘܡܵܐ ܦܵܠܫܵܢܹ̈ܐ ܡܲܠܝܘܼܨܝܼ ܝܢܵܐ.
2 ܩܵܡ ܕܵܝܫܝܼ ܠܝܼ ܕܸܫ̃ܡܸܢܝܼ̈ ܟܠܹܗ ܝܵܘܡܵܐ،
ܒܗ̇ܝ ܕܪܵܒܵܐ ܝܢܵܐ ܦܵܠܫܵܢܹ̈ܐ ܥܲܡܝܼ ܒܚܬܝܼܪܘܼܬܵܐ.
3 ܝܵܘܡܵܐ ܕܙܵܕܥܹܢ ܐܵܢܵܐ،
ܒܝܼܘܼܟ݂ ܒܸܬ ܣܵܒܪܹܢ.
4 ܒܐܲܠܵܗܵܐ، ܗ̇ܘ ܕܟܹܐ ܚܵܩܪܹܢ ܗܹܡܸܙܡܵܢܹܗ،
ܒܐܲܠܵܗܵܐ ܣܒܝܼܪܝܼ، ܠܹܐ ܙܵܕܥܹܢ.
ܡܘܼܕܝܼ ܡܵܨܹܐ ܥܵܒܹܕ ܒܲܪܢܵܫܵܐ ܐܸܠܝܼ؟
5 ܟܠܹܗ ܝܵܘܡܵܐ ܗܹܡܸܙܡܵܢܝܼ̈ ܟܹܐ ܡܲܦܟ̰ܸܠܝܼ،
ܟܠܵܝܗܝ ܚܘܼܫܵܒ݂ܵܝ̈ܗܝ ܒܘܼܬ ܕܝܼܝܼ ܠܒܝܼܫܬܵܐ ܝܢܵܐ.
6 ܓ̰ܡܝܼܥ ܠܗܘܿܢ، ܝܬܝܼܒ݂ ܠܗܘܿܢ ܒܟܡܹܐܢܵܐ ܐܵܢܝܼ،
ܢܛܝܼܪܗܘܿܢ ܥܸܩܒܝܼ̈،
ܒܸܣܦܵܪܵܐ ܕܫܵܩܠܝܼ ܠܓܵܢܝܼ.
7 ܠܲܝܬ ܚܠܵܨܵܐ ܐܸܠܵܝܗܝ ܡ̣ܢ ܥܸܠܬܵܐ ܕܥܵܘܠܵܝܗܝ،
ܡܲܨܠܝܼ ܠܗܘܿܢ ܥܲܡܡܹ̈ܐ ܒܚܸܡܬܵܐ، ܝܵܐ ܐܲܠܵܗܵܐ.
8 ܚܕܵܪ̈ܝܵܬܝܼ ܡܢܹܐ ܠܘܼܟ݂ ܐܲܢ݇ܬ،
ܡܲܬܸܒ݂ ܕܸܡܥܝܼ̈ ܒܓܘܼܕܘܼܟ݂.
ܗܵܐ، ܠܹܐ ܝܢܵܐ ܒܟܬܵܒ݂ܘܼܟ݂؟
9 ܗ̇ܝܓܵܗ ܒܸܬ ܕܵܝܪܝܼ ܕܸܫ̃ܡܸܢܝܼ̈ ܠܒܵܬܪܵܐ ܒܝܵܘܡܵܐ ܕܩܵܪܹܝܢ،
ܐܵܗܵܐ ܝܕܝܼܥ ܠܝܼ، ܕܐܲܠܵܗܵܐ ܩܵܬܝܼ ܝܠܹܗ.
10 ܒܐܲܠܵܗܵܐ، ܗ̇ܘ ܕܟܹܐ ܚܵܩܪܹܢ ܗܹܡܸܙܡܵܢܹܗ،
ܒܡܵܪܝܵܐ، ܗ̇ܘ ܕܟܹܐ ܚܵܩܪܹܢ ܗܹܡܸܙܡܵܢܹܗ،
11 ܒܐܲܠܵܗܵܐ ܣܒܝܼܪܝܼ، ܠܹܐ ܙܵܕܥܹܢ؛
ܡܘܼܕܝܼ ܡܵܨܹܐ ܥܵܒܹܕ ܒܲܪܢܵܫܵܐ ܐܸܠܝܼ؟
12 ܘܵܠܝܼܬܝܼ ܝܢܵܐ ܢܸܕܪܹ̈ܐ ܕܐܸܠܘܼܟ݂، ܝܵܐ ܐܲܠܵܗܵܐ،
ܒܸܬ ܬܲܡܸܡܸܢ ܕܸܒ݂ܚܹ̈ܐ ܕܫܲܟܲܪ̈ܝܵܬܹܐ ܐܸܠܘܼܟ݂،
13 ܒܗ̇ܝ ܕܩܵܡ ܦܲܨܹܝܬ ܠܵܗ̇ ܓܵܢܝܼ ܡ̣ܢ ܡܵܘܬܵܐ،
ܗܹܐ، ܐܲܩܠܵܬܝܼ̈ ܡ̣ܢ ܬܲܪܩܲܠܬܵܐ،
ܕܚܵܕܪܹܢ ܩܲܕܡ ܐܲܠܵܗܵܐ