1 ܦܲܪܸܩ، ܝܵܐ ܡܵܪܝܵܐ، ܒܗ̇ܝ ܕܬܝܼܡ ܠܹܗ ܙܲܕܝܼܩܵܐ،

ܒܗ̇ܝ ܕܦܪܝܼܩ ܠܗܘܿܢ ܡܗܘܼܡܢܹ̈ܐ ܡ̣ܢ ܓܵܘ ܒܢܲܝ̈ܢܵܫܵܐ.

2 ܣܪܝܼܩܘܼܬܵ‌ܐ ܟܹܐ ܗܲܡܙܸܡܝܼ ܐܢܵܫܵܐ ܥܲܡ ܚܲܒ݂ܪܹܗ؛

ܒܣܸܦܘܵܬܹ̈‌ܐ ܟ̰ܘܼܥܝܹ̈ܐ، ܒܬܪܹܝ ܠܸܒܹ̈ܐ ܦܪ̈ܝܼܫܹܐ ܟܹܐ ܗܲܡܙܸܡܝܼ.

3 ܒܸܬ ܩܵܛܹܥ ܡܵܪܝܵܐ ܟܠܵܝܗ‌ܝ ܣܸܦܘܵܬܹ̈‌ܐ ܟ̰ܘܼܥܝܹ̈ܐ،

ܘܠܸܫܵܢܵܐ ܕܗܲܡܙܸܡ ܡܸܢܕܝܼܵܢܹ̈ܐ ܓܘܼܪܹ̈ܐ.

4 ܐܵܢܝܼ ܕܐܡܝܼܪܗܘܿܢ: ”ܒܠܸܫܵܢܲܢ ܒܸܬ ܙܲܪܒܸܢܲܚ،

ܣܸܦܘܵܬܲܢ̈ ܕܝܼܲܢ ܝܼܢܵܐ، ܡܵܢܝܼ ܝܠܹܗ ܡܵܪܵܐ ܥܲܠܲܢ؟“

5 ”ܡ̣ܢ ܥܸܠܬܵ‌ܐ ܕܛܠܘܼܡܝܵܐ ܕܡܸܣܟܹܢܹ̈ܐ،

ܡ̣ܢ ܥܸܠܬܵ‌ܐ ܕܬܲܢܲܚܬܵ‌ܐ ܕܣܢܝܼܩܹ̈ܐ،

ܐܵܕܝܼܵܐ ܒܸܬ ܩܵܝܡܹܢ،“ ܒܹܐܡܵܪܵܐ ܝܠܹܗ ܡܵܪܝܵܐ،

”ܒܸܬ ܡܲܬܒܸܢܗܘܿܢ ܒܫܲܝܢܵܐ، ܐܲܝܟܵܐ ܕܪܲܚܪܘܼܚܹܐ ܝܢܵܐ ܕܗܵܘܝܼ.“

6 ܗܹܡܸܙܡܵܢܹ̈ܐ ܕܡܵܪܝܵܐ، ܗܹܡܸܙܡܵܢܹ̈ܐ ܕܸܟ݂ܝܹ̈ܐ ܝܢܵܐ،

ܐܲܝܟ݂ ܣܹܐܡܵܐ ܨܘܼܪܸܦܵܐ ܒܐܲܬܘܼܢܵܐ ܕܐܲܪܥܵܐ،

ܨܘܼܦܝܵܐ ܫܒܲܥ ܓܵܗܹ̈ܐ.

7 ܐܲܢ݇ܬ، ܝܵܐ ܡܵܪܝܵܐ، ܒܸܬ ܢܵܛܪܹܬ ܠܗܘܿܢ،

ܒܸܬ ܚܲܡܹܝܬ ܠܗܘܿܢ ܡ̣ܢ ܐܵܗܵܐ ܕܵܪܵܐ ܗܲܠܔ ܥܵܠܲܡ.

8 ܒܟܠܔ ܓܹܒܵܐ ܪ̈ܲܫܝܼܥܹܐ ܟܹܐ ܚܵܕܪܝܼ،

ܐܝܼܡܲܢ ܕܡܲܣܠܲܝܬܵ‌ܐ ܦܵܝܫܵܐ ܡܝܘܼܩܸܪܬܵ‌ܐ ܓܵܘ ܒܢܲܝ̈ܢܵܫܵܐ.

<- ܡܙܡܘܪ̈ܐ 11ܡܙܡܘܪ̈ܐ 13 ->