2 ܩܲܒܠܘܼܢ ܠܲܢ. ܠܐܢܵܫܵܐ ܠܵܐ ܙܠܝܼܡ ܠܲܢ، ܘܠܐܢܵܫܵܐ ܠܵܐ ܡܘܼܚܪܸܒ݂ ܠܲܢ، ܘܠܐܢܵܫܵܐ ܠܵܐ ܥܒ݂ܝܼܕ ܠܲܢ ܠܹܐܒܹ̈ܐ. 3 ܠܹܐ ܝܠܵܗ̇ ܠܸܕܝܵܢܵܘܟ݂ܘܿܢ ܒܹܐܡܵܪܵܐ ܝܘܸܢ ܐܵܗܵܐ، ܡ̣ܢ ܩܲܕܡܵܝܬܵ‌ܐ ܐܡܝܼܪܝܼ ܐܸܠܵܘܟ݂ܘܿܢ ܕܐܲܚܬܘܿܢ ܓܵܘ ܠܸܒܲܢ ܝܼܬܘܿܢ، ܠܸܡܝܵܬܵ‌ܐ ܘܠܸܚܵܝܵܐ ܡܥܘܼܕܵܠܹܐ. 4 ܐܝܼܬ ܠܝܼ ܒܸܣܬܵܝܘܼܬܵ‌ܐ ܓܘܼܪܬܵ‌ܐ ܒܝܼܵܘܟ݂ܘܿܢ، ܐܝܼܬ ܠܝܼ ܫܘܼܒ݂ܗܵܪܵܐ ܓܘܼܪܵܐ ܐܸܠܵܘܟ݂ܘܿܢ، ܘܦܝܼܫܵܐ ܝܘܸܢ ܡܸܠܝܵܐ ܝܵܗܒ݂ܵܠܬܵ‌ܐ ܕܠܸܒܵܐ، ܘܒܟܠܵܝܗ‌ܝ ܐܘܼܠܨܵܢܹ̈ܐ ܡܸܠܝܵܐ ܝܘܸܢ ܚܲܕܘܼܬܵ‌ܐ.

5 ܣܵܒܵܒ ܐܝܼܡܲܢ ܕܐܬܹ‌ܐ ܠܲܢ ܠܡܵܩܹܕܘܿܢܝܼܵܐ، ܐܵܗܵܐ ܦܲܓ݂ܪܲܢ ܠܲܝܬ ܗܘܵܐ ܠܹܗ ܢܝܵܚܵܐ، ܐܸܠܵܐ ܒܟܠܔ ܡܸܢܕܝܼ ܦܝܼܫ ܠܲܢ ܡܘܼܠܝܸܨܹܐ، ܦܠܵܫܹ̈ܐ ܡ̣ܢ ܠܒܲܕܲܪ ܘܙܕܘܼܥܝܵܬܹ̈‌ܐ ܡ̣ܢ ܠܓܵܘܵܐ. 6 ܐܝܼܢܵܐ ܐܲܠܵܗܵܐ، ܕܟܹܐ ܝܵܗܒܹܠܔ ܠܸܒܵܐ ܠܡܲܟܝܼܟܹ̈ܐ، ܝܘܼܗܒܹܠܔ ܠܹܗ ܠܸܒܵܐ ܐܸܠܲܢ ܒܐܬܵܝܬܵ‌ܐ ܕܛܸܛܘܿܣ. 7 ܘܠܵܐ ܐܲܚܟ̰ܝܼ ܒܐܬܵܝܬܹܗ ܐܝܼܢܵܐ ܐܘܼܦ ܒܝܵܗܒ݂ܵܠܬܵ‌ܐ ܕܠܸܒܵܐ ܕܝܘܼܗܒܹܠܔ ܠܵܘܟ݂ܘܿܢ ܐܸܠܹܗ. ܡܘܼܚܒܸܪܹܗ ܐܸܠܲܢ ܒܘܼܬ ܪܲܚܪܲܚܬܵܘܟ݂ܘܿܢ ܠܸܚܙܵܝܵܐ ܐܸܠܲܢ، ܘܦܵܫܲܡܬܵܘܟ݂ܘܿܢ ܓܘܼܪܬܵ‌ܐ، ܘܩܲܝܪܲܬܵܘܟ݂ܘܿܢ ܠܟܸܣܠܝܼ، ܕܗܵܕܟ݂ܵܐ ܚܲܕܘܼܬ‌ܝܼ ܒܘܼܫ ܓܘܼܪܬܵ‌ܐ ܗܘܹܐ ܠܵܗ̇ ܡ̣ܢ ܩܲܕܡܵܝܬܵ‌ܐ.

8 ܐܘܼܦ ܐܸܢ ܕܩܵܡ ܡܲܦܫܸܡܸܢܵܘܟ݂ܘܿܢ ܒܐܸܓܲܪܬ‌ܝܼ، ܐܝܼܢܵܐ ܠܹܐ ܝܘܸܢ ܦܫܝܼܡܵܐ، ܐܘܼܦ ܐܸܢ ܕܦܫܝܼܡ ܠܝܼ ܣܵܒܵܒ ܒܸܚܙܵܝܵܐ ܝܘܸܢ ܕܐܸܓܲܪܬ‌ܝܼ ܩܵܡ ܡܲܦܫܸܡܵܐ ܠܵܘܟ݂ܘܿܢ، ܐܝܼܢܵܐ ܐܲܚܟ̰ܝܼ ܩܵܐ ܚܕܵܐ ܥܕܵܢܵܐ ܟܪܝܼܬܵ‌ܐ. 9 ܐܵܕܝܼܵܐ ܒܸܚܕܵܝܵܐ ܝܘܸܢ، ܠܵܐ ܕܦܫܝܼܡ ܠܵܘܟ݂ܘܿܢ، ܐܸܠܵܐ ܕܦܫܝܼܡ ܠܵܘܟ݂ܘܿܢ ܠܬܝܵܒ݂ܘܼܬܵ‌ܐ، ܕܝܼܠܵܗ̇ ܚܕܵܐ ܦܵܫܲܡܬܵ‌ܐ ܡ̣ܢ ܐܲܠܵܗܵܐ، ܘܗܵܕܟ݂ܵܐ ܠܵܐ ܩܘܼܒܸܠܔ ܠܵܘܟ݂ܘܿܢ ܚܘܼܣܪܵܢܵܐ ܡܸܢܲܢ. 10 ܦܵܫܲܡܬܵ‌ܐ ܕܝܼܠܵܗ̇ ܡ̣ܢ ܐܲܠܵܗܵܐ ܟܹܐ ܡܲܝܬܝܵܐ ܬܝܵܒ݂ܘܼܬܵ‌ܐ ܠܦܘܼܪܩܵܢܵܐ ܕܠܲܝܬ ܦܵܫܲܡܬܵ‌ܐ ܒܝܼܘܼܗ̇، ܐܝܼܢܵܐ ܦܵܫܲܡܬܵ‌ܐ ܕܝܼܠܵܗ̇ ܡ̣ܢ ܕܘܼܢܝܹܐ ܟܹܐ ܡܲܝܬܝܵܐ ܡܵܘܬܵ‌ܐ. 11 ܚܙܹܝܡܘܼܢ ܡܘܼܕܝܼ ܥܒ݂ܝܼܕ ܠܵܗ̇ ܐܵܗܵܐ ܦܵܫܲܡܬܵ‌ܐ ܐܲܠܵܗܵܝܬܵ‌ܐ ܓܵܘܵܘܟ݂ܘܿܢ: ܗ̇ܝ ܡܘܼܒܪܹܐ ܠܵܗ̇ ܚܦܝܼܛܘܼܬܵ‌ܐ، ܘܝܵܗܒ݂ܵܠܬܵ‌ܐ ܕܓ̰ܘܼܘܵܒ، ܘܟܲܪܒܵܐ، ܘܙܕܘܼܥܬܵ‌ܐ، ܘܪܲܚܪܲܚܬܵ‌ܐ ܓܘܼܪܬܵ‌ܐ، ܘܛܢܵܢܵܐ، ܘܫܩܵܠܬܵ‌ܐ ܕܬܘܼܥܠܵܐ. ܒܟܠܔ ܡܸܢܕܝܼ ܡܘܼܚܙܹܐ ܠܵܘܟ݂ܘܿܢ ܓܵܢܵܘܟ݂ܘܿܢ ܕܕܸܟ݂ܝܹ̈ܐ ܝܬܘܿܢ ܒܐܵܗܵܐ ܫܘܼܠܵܐ. 12 ܐܘܼܦ ܐܸܢ ܕܟܬܝܼܒ݂ ܠܝܼ ܐܸܠܵܘܟ݂ܘܿܢ، ܠܹܐ ܝܗܘܵܐ ܒܘܼܬ ܗ̇ܘ ܕܥܒ݂ܝܼܕܵܐ ܝܠܹܗ ܓܢܵܗܵܐ، ܘܠܵܐ ܒܘܼܬ ܗ̇ܘ ܕܓܢܵܗܵܐ ܦܝܼܫܬܵ‌ܐ ܝܠܵܗ̇ ܥܒ݂ܝܼܕܬܵ‌ܐ ܐܸܠܹܗ، ܐܸܠܵܐ ܕܚܦܝܼܛܘܼܬܵܘܟ݂ܘܿܢ ܒܘܼܬ ܕܝܼܲܢ ܦܵܝܫܵܐ ܝܕܝܼܥܬܵ‌ܐ ܐܸܠܵܘܟ݂ܘܿܢ ܩܲܕܡ ܐܲܠܵܗܵܐ. 13 ܒܟܠܵܗ̇ ܐܵܗܵܐ ܦܝܼܫܹܐ ܝܘܲܚ ܝܘܼܗܒܹܐ ܠܸܒܵܐ، ܘܥܲܡ ܐܵܗܵܐ ܝܵܗܒ݂ܵܠܬܵ‌ܐ ܕܠܸܒܵܐ ܒܘܼܫ ܙܵܘܕܵܐ ܚܕܹܐ ܠܲܢ ܒܚܲܕܘܼܬܵ‌ܐ ܕܛܸܛܘܿܣ، ܣܵܒܵܒ ܚܝܼܵܠܘܼ̈ܗ‌ܝ ܢܝܼܚ ܠܗܘܿܢ ܒܝܼܵܘܟ݂ܘܿܢ. 14 ܚܩܝܼܪܝܼ ܐܸܠܵܘܟ݂ܘܿܢ ܠܟܸܣܠܹܗ، ܘܠܹܐ ܝܘܸܢ ܒܸܢܟ݂ܵܦܵܐ ܒܐܵܗܵܐ. ܐܝܼܢܵܐ ܕܵܐܟ݂ܝܼ ܕܐܡܝܼܪܝܼ ܟܠܔ ܡܸܢܕܝܼ ܐܸܠܵܘܟ݂ܘܿܢ ܒܫܪܵܪܵܐ، ܗܵܕܟ݂ܵܐ ܐܘܼܦ ܚܩܵܪܬܲܢ ܒܝܼܵܘܟ݂ܘܿܢ ܩܲܕܡ ܛܸܛܘܿܣ ܦܝܼܫ ܠܵܗ̇ ܝܕܝܼܥܬܵ‌ܐ ܫܪܵܪܵܐ. 15 ܐܘܼܦ ܚܘܼܒܹܗ ܐܸܠܵܘܟ݂ܘܿܢ ܓܘܼܪܵܐ ܝܠܹܗ، ܒܘܼܫ ܙܵܘܕܵܐ ܐܝܼܡܲܢ ܕܒܸܕܟ݂ܵܪܵܐ ܝܠܹܗ ܡܲܨܝܲܬܬܵ‌ܐ ܕܟܠܵܘܟ݂ܘܿܢ، ܕܵܐܟ݂ܝܼ ܒܙܕܘܼܥܬܵ‌ܐ ܘܒܪܲܬܪܲܬܬܵ‌ܐ ܩܘܼܒܸܠܔ ܠܵܘܟ݂ܘܿܢ ܐܸܠܹܗ. 16 ܒܸܚܕܵܝܵܐ ܝܘܸܢ ܕܐܝܼܬ ܠܝܼ ܗܹܒ݂ܝܼ ܒܝܼܵܘܟ݂ܘܿܢ ܒܟܠܔ ܡܸܢܕܝܼ.

<- ܒ ܩܘܪ̈ܢܬܝܐ 6ܒ ܩܘܪ̈ܢܬܝܐ 8 ->