ܐ ܬܣܠܘܢܝܩܝ̈ܐ 5

1 ܐܝܼܢܵܐ ܒܘܼܬ ܙܲܒ݂ܢܹ̈ܐ ܘܥܕܵܢܹ̈ܐ، ܐܲܚܘܿܢܘܵܬ‌ܝܼ̈، ܠܹܐ ܝܬܘܿܢ ܣܢܝܼܩܹܐ ܕܟܵܬܒܹܢ ܐܸܠܵܘܟ݂ܘܿܢ، 2 ܣܵܒܵܒ ܒܓܵܢܵܘܟ݂ܘܿܢ ܪܵܒܵܐ ܨܦܵܝܝܼ ܟܹܐ ܝܵܕܥܝܼܬܘܿܢ ܕܝܵܘܡܵܐ ܕܡܵܪܝܵܐ ܒܸܬ ܐܵܬܹ‌ܐ ܐܲܝܟ݂ ܓܹܢܵܒ݂ܵܐ ܒܠܲܝܠܹܐ. 3 ܐܝܼܡܲܢ ܕܐܢܵܫܹ̈ܐ ܗܵܘܝܼ ܒܹܐܡܵܪܵܐ، ”ܫܠܵܡܵܐ ܘܫܲܝܢܵܐ،“ ܗ̇ܝܓܵܗ ܡܸܢܫܸܠܬܵܢܹܐ ܚܪܵܒ݂ܵܐ ܒܸܬ ܐܵܬܹ‌ܐ ܥܲܠܵܝܗ‌ܝ، ܐܲܝܟ݂ ܚܸܒ݂ܠܹ̈ܐ ܥܲܠܔ ܒܲܟ݂ܬܵ‌ܐ ܒܛܝܼܢܬܵ‌ܐ، ܘܠܹܐ ܦܵܪܩܝܼ. 4 ܐܝܼܢܵܐ ܐܲܚܬܘܿܢ ܐܲܚܘܿܢܘܵܬ‌ܝܼ̈، ܠܹܐ ܝܬܘܿܢ ܓܵܘ ܚܸܫܟܵܐ، ܕܗ̇ܘ ܝܵܘܡܵܐ ܐܲܝܟ݂ ܓܹܢܵܒ݂ܵܐ ܡܵܛܹܐ ܠܵܘܟ݂ܘܿܢ. 5 ܣܵܒܵܒ ܐܲܚܬܘܿܢ ܟܠܵܘܟ݂ܘܿܢ ܒܢܘܿܢܹ̈ܐ ܕܒܲܗܪܵܐ ܝܬܘܿܢ ܘܒܢܘܿܢܹ̈ܐ ܕܝܵܘܡܵܐ. ܠܹܐ ܝܘܲܚ ܒܢܘܿܢܹ̈ܐ ܕܠܲܝܠܹܐ ܘܠܵܐ ܒܢܘܿܢܹ̈ܐ ܕܚܸܫܟܵܐ. 6 ܒܘܼܬ ܐܵܗܵܐ ܠܵܐ ܕܵܡܟܲܚ ܐܲܝܟ݂ ܐܚܹܪ̈ܢܹܐ، ܐܸܠܵܐ ܗܵܘܲܚ ܒܫܵܗܲܪܬܵ‌ܐ ܘܪܥܝܼܫܹܐ. 7 ܣܵܒܵܒ ܐܵܢܝܼ ܕܟܹܐ ܕܵܡܟ݂ܝܼ، ܒܠܲܝܠܹܐ ܟܹܐ ܕܵܡܟ݂ܝܼ، ܘܐܵܢܝܼ ܕܟܹܐ ܪܵܘܝܼ، ܒܠܲܝܠܹܐ ܟܹܐ ܪܵܘܝܼ. 8 ܐܝܼܢܵܐ ܐܲܚܢܲܢ ܕܝܼܘܲܚ ܐܢܵܫܹ̈ܐ ܕܐܝܼܡܵܡܵܐ، ܗܵܘܲܚ ܪܥܝܼܫܹܐ، ܠܒ݂ܝܼܫܹܐ ܫܸܪܝܵܢܵܐ ܕܗܲܝܡܵܢܘܼܬܵ‌ܐ ܘܕܚܘܼܒܵܐ، ܘܣܲܢܘܲܪܬܵ‌ܐ ܕܗܹܒ݂ܝܼ ܕܦܘܼܪܩܵܢܵܐ. 9 ܣܵܒܵܒ ܐܲܠܵܗܵܐ ܠܹܐ ܝܠܹܗ ܪܫܝܼܡܲܢ ܠܟܲܪܒܵܐ ܐܸܠܵܐ ܕܩܲܒܠܲܚ ܦܘܼܪܩܵܢܵܐ ܒܝܲܕ ܡܵܪܲܢ ܝܼܫܘܿܥ ܡܫܝܼܚܵܐ، 10 ܗ̇ܘ ܕܡܝܼܬ ܠܹܗ ܡ̣ܢ ܓܹܒܲܢ، ܕܐܸܢ ܪܥܝܼܫܹܐ ܝܘܲܚ ܘܐܸܢ ܕܡܝܼܟܹܐ ܝܘܲܚ، ܡܥܘܼܕܵܠܹܐ ܚܵܝܲܚ ܥܲܡܹܗ. 11 ܒܘܼܬ ܐܵܗܵܐ ܗܲܒ݂ܠܘܼܢ ܠܸܒܵܐ ܚܲܕ ܠܗ̇ܘ ܐܚܹܪܢܵܐ، ܘܒܢܹܝܡܘܼܢ ܚܲܕ ܠܗ̇ܘ ܐܚܹܪܢܵܐ، ܗܲܪ ܐܲܝܟ݂ ܕܝܼܬܘܿܢ ܒܸܥܒ݂ܵܕܵܐ.

ܢܨܝܗܬ̈‌ܐ ܘܫܠܡ̈ܐ

12 ܐܵܕܝܼܵܐ ܒܸܛܠܵܒܵܐ ܝܘܲܚ ܡܸܢܵܘܟ݂ܘܿܢ ܐܲܚܘܿܢܘܵܬܹ̈‌ܐ، ܕܡܝܲܩܪܝܼܬܘܿܢ ܠܐܵܢܝܼ ܕܒܸܦܠܵܚܵܐ ܝܢܵܐ ܩܸܫܝܵܐ ܓܵܘܵܘܟ݂ܘܿܢ، ܘܕܝܼܢܵܐ ܡܗܲܕܘܼܝܵܘܟ݂ܘܿܢ ܒܡܵܪܝܵܐ ܘܡܲܠܘܼܦܵܘܟ݂ܘܿܢ. 13 ܡܝܲܩܪܘܼܢ ܠܗܘܿܢ ܪܵܒܵܐ ܒܚܘܼܒܵܐ ܒܘܼܬ ܦܘܼܠܚܵܢܵܝ̈ܗ‌ܝ. ܚܹܝܡܘܼܢ ܒܫܠܵܡܵܐ ܚܲܕ ܥܲܡ ܗ̇ܘ ܐܚܹܪܢܵܐ. 14 ܘܦܲܪܦܘܼܠܹܐ ܝܘܲܚ ܒܝܼܵܘܟ݂ܘܿܢ ܐܲܚܘܿܢܘܵܬܹ̈‌ܐ، ܡܲܢܟܸܣܘܼܢ ܠܡܲܟܣܸܠܵܢܹ̈ܐ، ܣܢܘܿܕܘܼܢ ܠܙܵܕܘܿܥܹ̈ܐ، ܗܲܝܸܪܘܼܢ ܠܙܲܒܘܼܢܹ̈ܐ، ܡܲܪܝܸܟ݂ܘܼܢ ܒܹܐܢܵܐ ܥܲܠܔ ܟܠܵܝܗ‌ܝ ܐܢܵܫܹ̈ܐ. 15 ܗܘܹܝܡܘܼܢ ܗܸܫܝܲܪ ܕܐܢܵܫܵܐ ܡܸܢܵܘܟ݂ܘܿܢ ܠܵܐ ܦܵܪܹܥ ܒܝܼܫܬܵ‌ܐ ܡ̣ܢ ܓܹܒܵܐ ܕܒܝܼܫܬܵ‌ܐ، ܐܝܼܢܵܐ ܒܟܠܔ ܙܲܒ݂ܢܵܐ ܥܒ݂ܘܿܕܘܼܢ ܛܵܒ݂ܬܵ‌ܐ ܚܲܕ ܠܗ̇ܘ ܐܚܹܪܢܵܐ ܘܠܟܠܵܝܗ‌ܝ ܐܢܵܫܹ̈ܐ. 16 ܚܕܹܝܡܘܼܢ ܒܟܠܔ ܙܲܒ݂ܢܵܐ. 17 ܨܲܠܹܝܡܘܼܢ ܕܠܵܐ ܫܠܵܝܬܵ‌ܐ. 18 ܗܘܹܝܡܘܼܢ ܫܲܟܘܼܪܹܐ ܥܲܠܔ ܟܠܔ ܡܸܢܕܝܼ، ܣܵܒܵܒ ܐܵܗܵܐ ܝܠܹܗ ܨܸܒ݂ܝܵܢܵܐ ܕܐܲܠܵܗܵܐ ܐܸܠܵܘܟ݂ܘܿܢ ܒܝܼܫܘܿܥ ܡܫܝܼܚܵܐ. 19 ܠܵܐ ܡܲܟ̰ܡܸܥܝܼܬܘܿܢ ܠܪܘܼܚܵܐ. 20 ܠܵܐ ܡܲܣܠܹܝܬܘܿܢ ܠܢܒ݂ܝܼܵܘܵܬܹ̈‌ܐ. 21 ܨܲܚܨܹܝܡܘܼܢ ܠܟܠܵܝܗ‌ܝ ܡܸܢܕܝܼܵܢܹ̈ܐ. ܕܒ݂ܘܿܩܘܼܢ ܒܡܸܢܕܝܼ ܕܝܼܠܹܗ ܫܲܦܝܼܪܵܐ. 22 ܪܚܘܿܩܘܼܢ ܡ̣ܢ ܟܠܔ ܐܵܕܫܵܐ ܕܒܝܼܫܬܵ‌ܐ. 23 ܘܐܲܠܵܗܵܐ ܕܫܠܵܡܵܐ ܒܓܵܢܹܗ ܡܩܲܕܸܫ ܠܵܘܟ݂ܘܿܢ ܒܡܸܠܝܘܼܬܵ‌ܐ، ܘܟܠܵܗ̇ ܪܘܼܚܵܘܟ݂ܘܿܢ ܘܓܵܢܵܘܟ݂ܘܿܢ ܘܦܲܓ݂ܪܵܘܟ݂ܘܿܢ ܢܵܛܹܪ ܕܠܵܐ ܡܘܼܡܵܐ ܒܐܬܵܝܬܵ‌ܐ ܕܡܵܪܲܢ ܝܼܫܘܿܥ ܡܫܝܼܚܵܐ. 24 ܡܗܘܼܡܢܵܐ ܝܠܹܗ ܗ̇ܘ ܕܩܵܡ ܩܵܪܹܐ ܠܵܘܟ݂ܘܿܢ، ܘܗ̇ܘ ܒܸܬ ܬܲܡܸܡ ܐܵܗܵܐ. 25 ܐܲܚܘܿܢܘܵܬܹ̈‌ܐ، ܨܲܠܹܝܡܘܼܢ ܡ̣ܢ ܓܹܒܲܢ. 26 ܗܲܒ݂ܠܘܼܢ ܫܠܵܡܵܐ ܠܟܠܵܝܗ‌ܝ ܐܲܚܘܿܢܘܵܬܹ̈‌ܐ ܒܢܫܘܼܩܬܵ‌ܐ ܩܲܕܝܼܫܬܵ‌ܐ. 27 ܡܲܡܘܼܝܹܐ ܝܘܸܢ ܐܸܠܵܘܟ݂ܘܿܢ ܒܡܵܪܲܢ ܕܦܵܝܫܵܐ ܩܪܝܼܬܵ‌ܐ ܐܵܗܵܐ ܐܸܓܲܪܬܵ‌ܐ ܠܟܠܵܝܗ‌ܝ ܐܲܚܘܿܢܘܵܬܹ̈‌ܐ. 28 ܫܵܦܵܩܲܬ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡܵܘܟ݂ܘܿܢ. ܐܵܡܹܝܢ.

<- ܐ ܬܣܠܘܢܝܩܝ̈ܐ 4