1 Chumbalaj nin yi ketz kaRyosil ske'j, yi o' xonl Israel, yi o' yi skoj cu'n te kalma'.

2 Mu'ẍt qui nchincu' wuxtx'otx'.

Mu'ẍt qui nchinje' jiẍp,

3 tan paj yi ja chi'ch inc'u'l scye'j yi e' mal nak, yi e' yi wi'nin jale'n chipu'k, yi e' yi na cyocsaj quib nim tu cyajtza'kl.

4 Qui na chitxum yi nink chiquim, na qui'c ya'bil scyetz.

5 Qui na sotz chic'u'l.

Qui'c na chibislej, na at tircu'n scyuch'.

6 Cha'stzun te na cyocsaj quib nim tu cyajtza'kl.

Ej nin ntin chibuchle'n yi e' mas wunak cyak'un.

7 Chin xo'wbil nin chiwutz, na ja saj chin chic'atzaj.

Nin ntin xtxumle'n e'chk yab ajtza'kl cya'n.

8 Na na chitze'en ske'j. Nin na cyocsaj quib nim.

Nin na chitzol kayol, yi na cho'c tan kaxo'wse'n.

Nin na cyal yi chocopon tan kabiyle'n.

9 Na cho'c tan telse'n k'ej cyakil yi at tcya'j.

Nin na cho'c tan yolche'n cyakil yi at bene'n tzi'n wi munt.

10 Cha'stzun te at wi'nin tanum Ryos yi na xom chiwi' scye'j, na qui'c chipaltil na quil nin.

11 Nin je na cyal yi e' mal naka'tz:

“¿Tz'elepon pe' xtxum yi wi'tz Ajcaw sketz? ¡Qui' bin!

¿Stile' pe' yi mbil kaban? ¡Qui' bin!” che'ch.

12 Ya'stzun quitane'n yi e' mal naka'tz.

At cyakil yi tajwe'n scyetz, poro ilenin ẍkan tzaj nink na cyaj.

13 Cha'stzun te na no'c tan xtxumle'n, yi qui'c na tak' swetz yi na injoy puntil tan qui injuchul wil.

14 Na qui'c nin jun tkuj yi qui'k bis o'kl tzinwutz.

Nin qui'c nin jun k'ej yi qui'k na ul incaws.

15 Poro Ta', yi nink nchinxom te chitxumu'n yi e' mal naka'tz, ja klo' el chik'ej yi e' nitxajilu' wa'n.

16 Ja no'c tan xtxumle'n, yi mbi tzuntz na chiriquin yi e' wunaka'tz.

Poro qui nin me'l intxum tetz.

17 Ja el intxum tetz, poro jalen yi wopone'n xe ca'lu' Ta'.

Ja el intxum tetz yi na'l chopone't yi e'a'tz.

18 Na ntin at pasensu' scye'j.

Na tz'opon jun k'ej yi ẍchijepon trimp nin ẍchitzajk junawes.

19 Yi e'a'tz, ẍchitzajk junawes.

Na yil tz'opon yi chi'oril ẍchixitok cyera'tz tan xo'w.

20 Ya'stzun sbajok scye'j yil cawunu'.

Na cho'n cunin ẍchibne' yi e' mal naka'tz chi na ban yi na wit jun.

Na quil tz'icy' scyetz yil tz'ocu' tan tak'le'n chicaws.

Tz'ak'lok chicaws, na qui na pek'u' te chitxumu'n.

21 Poro yi in wetz, ja chimbisun, nin ja skej intzi', tan paj yi sotzaj c'u'lal yi atin cu'nt.

22 Poro i'tz tan paj yi quinin el intxum tetz yi tajbilu' Wajcaw.

Na ni'cu'n mimban swutzu' chi tane'n jun txuc yi qui'c tajtza'kl.

23 Ma jalu' ntyoẍtu' yi ja el intxum tetz, yi ba'n yi xomchin te'ju', na ch'inu'n chin tanu'.

24 Nin na tzanu' tan ẍchajle'n yi e'chk balaj ajtza'kl swetz.

Ej nin sjalok ink'ej yil nopon swutzu'.

25 Cya'l jun at tcya'j yi list tan wuch'eye'n, ntin cu'n ilu'.

Yi ko ya'tz, qui'c bin na tak' yi e'chk takle'n tetz tzone'j wuxtx'otx'.

26 Or chin tzaj, na innach.

Poro xomiju' swe'j Wajcaw. Nin at ninu' tan wuch'eye'n.

27 Poro cyakil yi e' yi quil chixom te tajbilu', chisotzok cyera'tz.

Ncha'tz cyakil yi e' yi quil k'uke' chic'u'l te'ju', ẍchitzajk tanu'.

28 Poro yi in wetz, chinxomok te'ju'.

Na ya'stzun yi mas balaj.

Na ilu' Wajcaw, ilu' inRyosil, nin ilu' colol wetz.

Cha'stzun te tajwe'n tan intxolil cyakil yi e'chk takle'n balaj yi ja bnix tanu'.

<- Salmos 72Salmos 74 ->