1 Ilu' inRyosil, chin cole'u', na cho'n k'uklij inc'u'l te'ju'.

2 Nin ilu' Kataj Jehová ilenin na walnin teru':

“Yi ilu' yi Ryos yi at banl tuch'u'.

Na xiquij chin tanu'.

Nin cho'n na saj imbanl tuch'u'.”

3 Nin yi e' xansa'nche't, ya'stzun yi e' yi na chintzatzin scye'j.

4 Ma yi e' wunak yi wi'nin bnixe'n chiryosil cya'n, yi e' yi na chijoy junt chiryosil, sjalok wi'nin bis o'kl cya'n.

Ma in wetz, qui'c mu'ẍ tal nink xom inwi' scye'j, tan pate'n intx'ixwatz ẍchiwutz cyetz chiryosila'tz.

Qui'c mu'ẍ tal nink tz'el tzaj chibi', yi e'chk chiryosila'tz le intzi'.

5 Kataj Jehová, ntin cu'n ilu', atu' le intxumu'n.

Na at yi banlu' swibaj.

Nin cho'n atin tk'abu'.

6 Chumbalaj nin yi ama'l yi ja tak'u' swetz.

Chin yube'n nin kale najlchine't.

7 Swak'e' k'ej Kataj Jehová na i' na ak'on yi balaj intxumu'n.

Na yi na el inwatl lak'bal na jilon swetz tan makle'n inwutz.

8 Ilenin at i' le intxumu'n.

Nin na el intxum tetz yi xomij i' swe'j.

Cha'stzun te cya'l jun yi nink xcye' tan xite'n intxumu'n.

9 Nin cha'stzun te na chintzatzin jalu'.

Qui'ct tzimbislej, na cho'n k'uklij inc'u'l te Wajcaw.

10 Wajcaw, quil tak'u' ama'l tan cyaje'n cyen walma' xetze'.

Nin quil tak'u' ama'l tan k'aye'n inwankil.*Hch 2:25-28; 13:35.

Na in ẍchakumu'.

In yi jun yi wi'nin ok'le'n wutz tanu'.

11 Ta', ẍchaje'u' yi be' tetz itz'ajbil swetz.

Na at wi'nin tzatzin te'ju' Ta'.

Na cho'n na jal kutz'ajbil tuch'u', tetz ben k'ej ben sak.

<- Salmos 15Salmos 17 ->